Read zande 2 Pekapai 22 Bible Online

2 Pekapai 22 - zande bible

2 Pekapai 22

¹Agu aboro nanaraka Yerusarema ki moi Azaya nangia kiaro wiri Yorama ni bakindo ku ba ko, bambiko gu rikaaboro naye na aboro Araba aimi aunvuruako dunduko. Si du Azaya ki zogo rago nangia wiri Yorama bakindo aYudo.

²Garã Azaya adu 42 ho ko atona zoga rago ni, ko ki zogo rago Yerusarema yo garã ki du sa. Rimo nako nangia Ataraya, tita Omeri.

³Ko ki nipeke fuo kina gu pai ngbatunga Aba anamanga, bambiko nako nangia gako bororondo rogo mangapai ni gbigbita ha.

⁴Ko ki nimangi gu pai nadu ni gbigbita ha bangiri Yekova, wa ngbatunga Aba anamanga; bambiko i nangia gako abororondo fuo kpio bako, sa gbarasa ko.

⁵Ko apeke fuo gayo rugapai, ki nindu na Yorama wiri Aba bakindo aYisaraere ka so vura kuti Azaere bakindo aSurio Ramota-girada yo. ASurio hõgi Yorama,

⁶ko ki karaga tiko i husi ko Yizerere yo be agu aoro i ahõgi ko na ni Rama yo, ho ko aso vura ni kuti Azaere bakindo aSurio. Azaraya wiri Yorama bakindo aYudo ki ndu ka bi Yorama wiri Aba Yizerere yo, bambiko wa ko adu na kaza.

⁷Ono pa dia Azaya ku sa yo si aye be Mbori rogo gu pai wa ko andu ka bi Yorama. Bambiko ho ko ada yo ni ko andu na Yorama ka ngbisa Yeu wiri Nimisi, nga gu ko Yekova ambedi ko ko ba ngbatunga Aba ku sa yo.

⁸Si adu wa gere, ho Yeu asara ngbanga ngbatunga Aba ni, ko ki bi abazogo aYudo na awiri awirina Azaya, nangia agu yo namangi pa Azaya, ko ki imi yo.

⁹Ko ki gbata Azaya, i ki zi ko ho ko agbu ni Somorona yo, i ki ye na ko koyo du Yeu ni, ko ki imi ko. I ki kpisidi ko, bambiko i aya, “Ko nga tita Yosafata, nga gu ko nanagbata Yekova na kpotoko yo dũ.” Ka ngbatunga Azaya adu nga na ome ka zoga ngbi berewe ya.

¹⁰Were ho Ataraya nangia na Azaya abi he ni ya wiriri kpi, ri ki guari ki imi ngbatunga bakindo aimo dunduko nga ngbatunga Yuda.

¹¹Ono Yosabata nangia wiri bakindo ni de, ri ki di Yoasa wiri Azaya, dagba awiri bakindo nga agu yo i akaimo yo, ki merẽ na ko ki oko ko ku bamburame yo na nambutiko a. Si du Yosabata nangia wiri Bakindo Yorama ni de nangia dia Yoyada nga boromotumo, aoko ko be Ataraya, ka ri imi nga ko ya; bambiko wa Yosabata adu ni dawiri Azaya.

¹²Ko araki be yo ni okooko ko ku bambu Mbori yo tipa garã sita, Ataraya ki zogo ringara.