Read zande 2 Pekapai 23 Bible Online

2 Pekapai 23 - zande bible

2 Pekapai 23

¹Ono ti saba garã Yoyada ki ninyakasi tiko, ki rogo abarutirivura nga ga akama yo, nangia Azaraya wiri Yeroama, na Yisamaere wiri Yoanana, na Azaraya wiri Obede, na Maseya wiri Adaya, na Erisafata wiri Zikiri, ki mangi mokido na yo.

²I ki ndu rogo ringara Yuda dunduko ki dungura aRevi rogo agu abaakporo dunduko du Yuda yo, na abarumbatayo fu ngbatunga aYisaraere, i ki ye ku Yerusarema yo.

³Gbuu dunduko ki zunga he na bakindo rogo ga Mbori bambu yo. Yoyada ki ya fu yo, “Oni ngére, wiri bakindo! Ko zógo rago a wa Yekova agumba ha tipa awiri Dawidi.

⁴Gere nga gu pai oni akamanga: gu rikaroni du wa sa dagba biata roni ninaye ti rago sabiti, dagba aboromotumo na dagba aRevi, i nikadu ni ababanda ngbadimo,

⁵gu kura rikaroni du wa sa dagba biata roni ki du pati ga bakindo bambu yo, na gu kura rikaroni berewe du wa sa dagba biata roni ki du ti gu Ngbadimo bakporo du rimoho nga Mburuhe. Aboro dunduko ki du vurukporo ga Yekova bambu yo.

⁶Ono ka boro sa aríma nga ku rogo ga Yekova bambu yo ya, kpara kina aboromotumo na agu amangipai nga ga aRevi yo; kina yo nikarima koyo, bambiko i ni ziazia yo, ono aboro dunduko nikamanga ga Yekova rugapai.

⁷ARevi nikaru pati bakindo kirikiri, aboro ni ba sa sa na kina gayo marávura be yo. Gu boro ka rimi ku dimo yo, i ki imi ni aimo. Oni ki du pati bakindo ho ko ka rima ni, na ho ko ka kura ni a.”

⁸Si du aRevi na aboro Yuda ki mangi wa Yoyada boromotumo arugu yo kuti ni dunduko. Aboro ni ba sa sa ki nirogo kina gayo aboro, agu yo ninaye ti rago sabiti, agu yo ninakura ti rago sabiti; bambiko Yoyada boromotumo ambu nga pa ringbisiringbisi pa yo te.

⁹Yoyada boromotumo ki kusi agu abaso na bakere vurakube na rukutu he a nangia ga Bakindo Dawidi, nadu rogo ga Mbori bambu yo fu abarutirivura nga ga akama yo.

¹⁰Ko ki ringbisi aboro dunduko kirikiri ku pati bakindo, aboro ni ba sa sa na kina gayo aũvura be yo, tona ku kumbabe pavuru bambu ku bani na ku garebe pavuru bambu ku bani a, ku pati bamotumo yo na bambu a.

¹¹Yoyada ki kusi wiri bakindo, ki moi kpakpari bakindo ku riko yo, ki fu dezirepai fu ko; ki moi ko ni bakindo. A Yoyada na awiriko ki mbedi ko, i ki ya, “Mbori fu gbanga rame fu bakindo.”

¹²Ho Ataraya agi woro aboro ni i nioro ki nitambua bakindo, ri ki ye koyo du aboro ni ku rogo ga Yekova bambu yo.

¹³Ri ki ngereke, bakindo aru pati gako dangba bambu pa ngbadimo, na abarutirivura na abavudi ambanya ki rundu pati bakindo. Aboro ringara dunduko ki ningi angi ki nivudi ambanya, abayango ki nitaki aũworo ahe, ki ngbe mbata yo fu aboro nibi bia tambuahe. Ataraya ki siri gari aroko, ki poi ku ari ki ya, “Pa tabura du! Pa tabura du!”

¹⁴Yoyada boromotumo ki ye na agu abarutirivura nga ga akama yo nga agu yo i amoi yo ku ri rimbasa aborosovura, ki ya fu yo, “Oni kúsi ri ku zegi yo dagba arika aboro; gu ni ka pe ri oni ími ni ni basape.” Bambiko boromotumo aya, “Ka oni ími nga ri kina rogo ga Yekova bambu yo ya.”

¹⁵Si du i ane gene ti ni fu ri; ri ki ndu barima yo nga ga afarasi ku bakindo yo, i ki imi ri yo.

¹⁶Yoyada ki zunga he ni tiko, ko na aboro dunduko na bakindo a, ya i adú ni ga Yekova aboro.

¹⁷Aboro ki ndu dunduko ku rogo ga Bara bambu yo, ki kuadi he ku sande; ki kuadi gaha abamotumo mbusumbusu na gaha kpiahe a, ki imi Matana ga Bara boromotumo barangba abamotumo.

¹⁸Yoyada ki ringbisi abarumbatayo ku ri ga Yekova bambu ku tii be aboromotumo nga aRevi na agu aRevi Dawidi akparaka yo tipa sunge rogo ga Yekova bambu yo, i nifú gu zozo amotumo nga ga Yekova, wa du he ni keke he rogo ga Mose rugute yo, na pa ngi ni bibia a, kuti sangba Dawidi.

¹⁹Ko ki moi ababandarago ku ngbadimo ga Yekova bambu yo ya a nga gu ni sa du ni birikobiriko ni ka rima koyo te.

²⁰Ko ki rogo abarutirivura nga ga akama yo, na abaworimo, na abazogo aboro, na aboro ringara dunduko; i ki kusi bakindo rogo ga Yekova bambu yo, ki kuru ngba gu ngbadimo naadu ku ngbi yo ku bakindo yo. I ki moi bakindo ku auru mbatabakindo.

²¹Si du aboro ringara dunduko ki ningi angi; bakporo ki du zezeredi, wa i naimi Ataraya ni basape.