Read zande 2 Pekapai 24 Bible Online

2 Pekapai 24 - zande bible

2 Pekapai 24

¹Garã Yoasa adu saba ho ko atona zoga rago ni, ko ki zogo rago garã ki du 40 Yerusarema yo; rimo nako nangia Sibaya ni boro Bera-saba.

²Yoasa ki mangi gu pai naru aru bangiri Yekova ti gu rago dunduko Yoyada boromotumo adu ho.

³Yoyada ki rogo ade fu ko ue, ko ki batika akumbagude na adegude.

⁴Fuo gure, Yoasa ki niberẽ pa mbakada ga Yekova bambu berewe.

⁵Ko ki dungura aboromotumo na aRevi, ki ya fu yo, “Oni ndú ku rogo agu abaakporo du Yuda yo, ka dungura marã be aYisaraere dunduko ka mbakada ga gaani Mbori bambu na ni na garã na agarã. Oni ki bi he ya oni ípisi gu pai re.” Ono ka aRevi aipisa nga ha ya.

⁶Bakindo ki yambu Yoyada nangia baira aboromotumo, ki ya fu ko, “Tipagine mo asana nga aRevi ti ni i ye na marã rũhe Yuda yo na Yerusarema yo nga gu Mose ga Yekova moyambu arugu pa ha na be gbuu aYisaraere tipa bamburoko dezirepai ya?”

⁷Bambiko awiri Ataraya, gu gbegberẽ de re, i akuadi ga Mbori bambu; na gu kparakpara ahe dunduko nangia ga ga Yekova bambu i amangi apai na ni fu aBara.

⁸Si du bakindo ki rugu pai, i ki mbakadi sanduki igamarã, ki moi he zegi pangbadimo ga Yekova bambu.

⁹I ki taki pande he rogo Yuda na Yerusarema yo, ya i ye na gu rũhe tipa Yekova Mose ga Mbori moyambu agumba pa ha fu aYisaraere ngbakungba yo.

¹⁰Abazogo dunduko na aboro ki ningi ki ye na gayo marã rũhe ki nibafu he ku sanduki igamarã yo, daho i adigisi pa ha ni dunduko.

¹¹Ho aRevi aniye ni na sanduki igamarã fu ga bakindo abairasunge, i ki bi he ya bakere marã du yo, ga bakindo bakeapai na ga gbia aboromotumo barumbatayo aniye ka zaka gu sanduki igamarã re ki rogo marã yo ki karaga sanduki ku ba ha yo berewe. Wo i anamanga na uru na uru, ki dungura marã adungura kpaima.

¹²Bakindo na Yoyada ki fu ra fu agu yo nadu ku ri sunge ga Yekova bambu, i ki ngbe abaduabambu na ami na abasekengua ka mbakada ga Yekova bambu berewe, na agu yo a namanga sunge na marã na sirigi i bungia ga Yekova bambu.

¹³Si du aborosunge ki nimangi sunge, sunge bungia bambu ki nindu be yo wenengaĩ, i ki dua ga Mbori bambu berewe ku ba ha a wa si adu mbata ki nyakasi he.

¹⁴Ho i adigisi paha ni, i ki ye na yangara marã ku bara bangiri bakindo na Yoyada, i ki mangi aúsunge rogo ho tipa ga Yekova bambu, nga aũsunge sa mangapai na tipa zozo amotumo, na abaarikare, na aũsunge ni dahabu na feda. I ki nizo zozo amotumo rogo ga Yekova bambu yo kindi ti agu arago dunduko nangia ga Yoyada.

¹⁵Ono Yoyada agbinza, rameko ki rengbe, ko ki kpi; garãko adu 130 ho ko akpi ni.

¹⁶I ki kpisidi ko rogo gu bakporo nga ga Dawidi ku dagba abakindo yo, bambiko ko amangi wenepai ringara aYisaraere yo, fu Mbori na tipa gako bambu a.

¹⁷Tuo kpio Yoyada abazogo ki ye nga ga Yuda yo, ki fu irisa fu bakindo; bakindo ki gi payo.

¹⁸I ki mbu ga Yekova bambu nga ga abayo Mbori, ki nimangi pa aAsera nga ngbama na kpiahe. Zinga ki ye ku ri aYudo na ku ri aboro Yerusarema tipa gi gayo tiandika re.

¹⁹Ono Yekova ki nikedi anebi kindi koyo du yo ni, i káraga yo berewe koyo du Yekova ni; i ki yugu go gayo pai fu yo, ono i akpi nga nyemu ka dega tuyo fu yo te.

²⁰Ga Mbori Toro ki ye ku ri Zekaraya wiri Yoyada boromotumo. Ko ki ru ku ari fu aboro, ki ya fu yo, “Ya Mbori wẽ, ‘Tipagine oni agu auru ga Yekova andika ti ni, ka oni arengba nga ka u ya? Bambiko wa oni ambu Yekova, ko mbu roni a.’ ”

²¹Aboro ki ta bura Zekaraya, ki sopo ko ni ambia ku sangba bakindo yo, rogo vurukporo ga Yekova bambu.

²²Si du Yoasa nangia bakindo atingida nga pa gu weneringise Yoyada ba Zekaraya amangi he fu ko te, ono ko ki imi wiriko. Ho Zekaraya akpi ni, ko ki ya, “Yekova bí he, ki iri bape he!”

²³Ti digida garã gu rimbasa aborosovura nga ga aSurio ki ye na vura kuti Yoasa. I ki ye ku Yuda yo na Yerusarema yo, ki gbarasi abazogo aboro dunduko du dagba aboro yo, ki kedi gayo gbugbu ahe fu bakindo Damaseke.

²⁴Zavura gu rimbasa aborosovura nangia ga aSurio yo aye ni kina umba yo, Yekova ki fu bakere rimbasa aboro ku be yo, bambiko wa i ambu Yekova, nga ga abayo Mbori. Si du i asari ngbanga ti ni kuti Yoasa.

²⁵Ho aSurio aguari ni pati ko, bambiko i ambu ko na bakere oro, gako amoyambu ki ta bura ko tipa kure gu wiri Yoyada nangia boromotumo, ki imi ko kina ku auru gako barame. Ko ki kpi; i ki kpisidi ko rogo gu bakporo nangia ga Dawidi, ono i akpisida nga ko rogo ga abakindo murã yo te.

²⁶Agu yo nata bura ko i nangia Zabada wiri de rimori angia Simata boro Amona, na Yozabada wiri de rimori angia Simerita boro Moaba.

²⁷Were tipa pa awiriko, na pa gu badungu apai i amoi ku ri ko, na pa bungia ga Mbori bambu berewe si ni keke he rogo Kitabu Peka pa Abakindo. Amasaya nangia wiriko ki zogo rago ku ba ko.