Read zande 2 Pekapai 25 Bible Online

2 Pekapai 25 - zande bible

2 Pekapai 25

¹Garã Amasaya adu 25 ho ko atona zoga rago ni, ko ki zogo rago Yerusarema yo tipa garã 29, rimo nako nangia Yoadana ni boro Yerusarema.

²Ko, ki mangi gu pai naru aru bangiri Yekova, ono kpotoko yo adu nga ziazia dunduko te.

³Si adu wa gere, ho ngbi anyaka ni ku be ko, ko ki imi gu gako amoyambu naimi bakindo nangia bako.

⁴Ono ko aimo nga awiriyo te, ko amangi he kuti gu pai dũ ni keke he rogo rugute, du rogo gu kitabu nga ga Mose, wa Yekova arugu he, ki ya, “I aímo nga abaagude ku ba awiriyo te, watadu i aimo nga agude ku ba abayo a te; ono aboro ni ba sa sa ka kpida kina pa gayo ingapai.”

⁵Ku ri agi apai re Amasaya ki dungura aboro Yuda, ki ringbisi yo wa du pa ngbatunga abayo ku tii be abarutirivura nga ga akutu yo, na ku tii be agu abarutirivura nga ga akama yo nga aboro Yuda na aboro Benyamina dunduko. Ko ki gedi yo tona ti agu yo du garãyo 20 na ku mbata yo, ki bi yo wa aboro 300,000 ni siasia yo, narengbe ka ndu ka so vura, nga agu yo narengbe ka zada baso na bakikii vurakube.

⁶Ko ki ngbe airanyaka ni kangarã aboro 100,000 dagba aYisaraere yo tipa ataranda feda 100.

⁷Ono ga Mbori kumba ki ye koyo du ko ni ki ya, “Ako bakindo, ka rikavura nga ga aYisaraere ndu nga na mo ya, bambiko Yekova na aYisaraere te, na agu yo nga awiri Efuraima dunduko a te.

⁸Ono ka mo berẽ he ya mo andu, mo ki mangi he ki du nyanyaki tipa so vura, Mbori abá ro ku sande barangba avuraro; bambiko tandu ti Mbori ka unda boro watadu ka ba ni ku sande a.”

⁹Amasaya ki ya fu ga Mbori kumba, “Ono gini pai ani ka manga tipa agu ataranda feda 100 nga gu fu mi fu gu rikavura nga ga aYisaraere yo?” Ga Mbori kumba ki ya fu ko, “Yekova rengbe ka fu bakere he foro ki susi gure.”

¹⁰Amasaya ki kparaka gu rikavura naye fuo ko Efuraima yo, i ga berewe ku kpuyo yo. Si du gayo zinga ki rungudi kuti Yuda gbe, i ki karaga tiyo ku kpuyo yo na nzengerenzengere zinga.

¹¹Ono Amasaya ki nyakasi tiko, ki ngbe ku mbata yo fu gako aboro, ki ndu sa Ngboongboorago Tikpo, ki imi aboro Seira wa 10,000.

¹²Aboro Yuda ki ga na akura yo ni ungayo wa aboro 10,000, ki ye na yo ku ri mbia yo ki nibafu yo ku sende yo ri mbia yo; i ki kuadi akuadi rukutu.

¹³Ono agu aboro nga ga gu rikavura Amasaya akaraga yo ku sa yo, ka ko aida nga i ndu na ko sa vura vu i ati ku ri agu abaakporo du Yuda yo, tona Somorona yo ki da ku Bete-orona yo, ki imi agu yo dagba yo wa aboro 3,000, ki rogo bakere gbugbu ahe be yo.

¹⁴Si adu wa gere, fuo yega Amasaya pati imo aEdome yo, ko ki ye na agu ambori nangia ga aboro Seira, ki moi he si du ni gako ambori, ko ki ninugadi barangba ha, ki nifu fuõngua fu he.

¹⁵Si du ga Yekova zinga arungudi ti ni kuti Amasaya ko ki kedi nebi koyo du ko ni, naaya fu ko, “Tipagine mo agbata pa ga aboro ambori ti ni, nga agu ambori naabatasa nga gayo aboro be ro ya?”

¹⁶Si ki ta du wa gere, wa nebi afura na ko, bakindo ki ya fu ko, “Ani moi ro ni ga bakindo bororondo? Mo mbu nga ha! Tipagine mo ka kpi ti ni?” Nebi ki mbu gumba ha, ono ko ki ya, “Mi ini he ya Mbori ringbisi pai ka gbarasa ro, bambiko mo mangi gi pai re ka mo adega nga turo sa gi rugapai ya.”

¹⁷Amasaya bakindo aYudo ki yambu gako aboro rondo ki kedi sunge koyo du Yoasa ni wiri Yoaza, Yoaza angia wiri Yeu, bakindo aYisaraere. Amasaya ki ya, “Mo yé, uni ngere bangirani na mo.”

¹⁸Yoasa bakindo aYisaraere ki kedi sunge koyo du Amasaya ni bakindo aYudo, ki ya, “Gu sukokoso naadu Rebanona yo akedi sunge koyo du ngua kedara ni naadu Rebanona vo, ki ya, ‘Mo fú wiro fu wire ni diako’; nyurinde asusi yo naadu Rebanona yo, ki simbi sakokoso ku sande.

¹⁹Ya mowẽ, ‘Mo ngére, mi mangi Edome’, ngbaduro ki nitumba ro sa abiatise. Mo nyé ku kpuro yo awere; tipagine mo ka zingisa pai ti ni si mbusi ro, mo ki ti, nga kina ro na aYudo a?”

²⁰Ono Amasaya adega nga tuko sa gu pai te re; bambiko si aye be Mbori, ya ko fu yo ku be avurayo, bambiko i agbata agu ambori nga ga aEdome.

²¹Si du Yoasa bakindo aYisaraere ki ndu; ko na Amasaya bakindo aYudo i ki ngere bangiri yo gu ni koyo du gu ni ni Bete-semese yo, nga ga aYudo bakporo.

²²AYisaraere ki di be aYudo, aYudo ni ba sa sa ki gbandaka ku rogo gayo abamburoko.

²³Yoasa bakindo aYisaraere ki zi Amasaya bakindo aYudo Bete-semese yo, Amasaya angia wiri Yoasa, Yoasa ki ngia wiri Yoaza. Yoasa ki ye na ko ku Yerusarema yo, ki kuadi ngapa bakporo Yerusarema tona ti Ngbadimo Efuraima sa Ngbadimo Tukpuhe wa bagiza mbiribe 400.

²⁴Ko ki rogo adahabu na feda dunduko, na agu aũsunge dunduko i abi rogo ga Mbori bambu yo na be Obedeedome; na rogo baiga kikiipaahe ku bakindo yo, na agu aboro i adika yo ni ngbaanga, ko ki karaga tiko ku Somorona yo.

²⁵Amasaya nangia wiri Yoasa bakindo aYudo ki raki fuo kpio Yoasa wiri Yoaza, bakindo aYisaraere tipa garã 15.

²⁶Were kura ga Amasaya mangapai, bambata ha na yangara ha, ati si ni keke he rogo gu Kitabu Peka pa Abakindo aYudo na aYisaraere?

²⁷Were tona ti gu rago Amasaya ambu peka Yekova i ata bura ko Yerusarema yo, ko ki nioro ku Rakisa yo. Ono i akedi aboro fuo ko ku Rakisa yo, ki imi ko yo.

²⁸I ki ye na kangbako ri afarasi; ki kpisidi he fuo atitako rogo ga Dawidi bakporo.