Read zande 2 Pekapai 26 Bible Online

2 Pekapai 26 - zande bible

2 Pekapai 26

¹Aboro aYudo dunduko ki di Uziya, ki moi ko ni bakindo ku ba bako nangia Amasaya, ho garãko adu ni 16.

²Ko ki dua Erota ki karaga ha fu Yuda, fuo kpi bakindo fuo atitako.

³Garã Uziya adu 16 ho ko atona zoga rago ni, ko ki zogo rago Yerusarema yo tipa garã 52. Rimo nako nangia Yekiraya ni boro Yerusarema.

⁴Ko ki nimangi gu pai naru aru bangiri Yekova, a wa kina agu apai dunduko bako anamanga nangia Amasaya.

⁵Ko ki fu tiko ka gbata Mbori rago Zekaraya, nangia gu ko naaruga ko rogo gunde ti Mbori. Ho ko agbata Yekova ni, Mbori anausa gako apai.

⁶Ko ki ndu ka so vura kuti aFereseto, ki kuadi ngapa bakporo Gata na ngapa bakporo Yabene na ngapa bakporo Asedodo. Ko ki dudua abaakporo ringara Asedodo yo na dagba aFereseto yo a.

⁷Mbori ki unda ko kuti aFereseto, na kuti aboro Araba nga agu yo nanaraka Gurabara yo, na kuti aMuna.

⁸Aboro Amona ki nirũ he fu Uziya, pande wo rimoko ki gbandaka agbandaka tuturũ daku bangbanda Ezipeta yo, bambiko ko anyaki anyaka bakere gbe.

⁹Uziya ki dudua kirikiri agbata Yerusarema yo pati Ngbadimo Tukpuhe na ti Ngbadimo Ngboongboorago a, na yo ndugu bakporo asa tihe ni, ki me he nyanyaki.

¹⁰Ko ki dudua kirikiri agbata ngbakungba yo, ki geteke dungu aguga, bambiko bakere zogozogo anya adu be ko rogo ngboongboorago na kpasakpasa rago yo a. Ko adu na ababandaati na abambakadi bakakue ri abaagangara yo na rogo ringara idiidi ahe yo a, bambiko ko akpi nyemu sunge ati.

¹¹Uziya adu na rimbasa aborosovura a, narengbe tipa sovura, arikayo adu kuti gedigedi yo wa Yiere agedi yo nangia bakeapai na Maseya nangia barumbatayo, ku tii be Anania, gu ga bakindo barutirivura sa.

¹²Gu gedigedi abarumbatayo dunduko ku ri angbatunga abayo nangia airanyaka ni ngangarã aboro i adu wa aboro 2,600.

¹³Rikavura adu ku tii be yo i ayugu pa sovura fu yo, wa aboro 307,500, narengbe naso vura na bakere ome, ka unda bakindo kuti avurako.

¹⁴Uziya ki mbakadi avurakube tipa rimbasa vura dunduko, na abaso, na akpakpari marã, na marã banda ngbaduse, na amboto, na ambia tipa ba barioko.

¹⁵Ko ki mangi amasini Yerusarema yo, aboro birĩ asangi manga ha, si du ti kirikiri agbata na ti ngbaho abambu yo, ka bafa aguanza na ni na bakere ambia a. Pande wo rimoko ki gbandaka agbandaka tuturũ, bambiko i aunda ko ni iiriwo ho, daho ko adu ni nyanyaki.

¹⁶Ono ho ko adu ni nyanyaki kpotoko yo ki du na abiatise, ko mangi pai sa gbarasa tiko. Ko ki basa pa Yekova nga gako Mbori, bambiko ko andu ku rogo ga Yekova yekaru yo ka zo fuõngua ri bamotumo zo fuõngua.

¹⁷Ono Azaraya boromotumo ki rimi fuo ko koyo, na aboromotumo 80 fuo ko, nga ga Yekova yo, nangia agu yo nangia eerẽ aboro.

¹⁸I ki za Bakindo Uziya, ki ya fu ko, “Ga pai nga ha te, Uziya, ka zo fuõngua fu Yekova, ono si tipa aboromotumo nga awiri Arona, agu yo i akpara yo i nizo fuõngua. Mo kúru rogo kparakpara ba yo; bambiko mo ti ndika gbegberẽ, irisa adú nga foro be Yekova ga Mbori mbiko gi pai te re.”

¹⁹Uziya ki du na zinga. Ko adu na ũzokingire beko tipa zo fuõngua rogo ho. Ho ko adu ni na zinga kuti aboromotumo, ngbataka ki kuru ngbandia kpakpuko ni ba sa, ku bangiri aboromotumo rogo ga Yekova bambu yo, pati bamotumo zo fuõngua.

²⁰Azaraya nangia baira aboromotumo, na aboromotumo dunduko, ki ngere ka bi ko, ki bi ko na ngbataka ngbandia kpakpuko I ki tutura ko yo gburungagburunga, ii, ko ni tiko ki ipisi tiko ka kura, bambiko Yekova mangi ko.

²¹Bakindo Uziya ki du ni boro ngbataka dati rago kpioko, ki niraki ni sa ko rogo kparakpara bambu, wa ko adu ni kina boro ngbataka, bambiko i akpara ko ku sa yo ti ga Yekova bambu. Wiriko nangia Yotama adu ku ri ga bakindo aborokporo, ki ni zogo aboro ringara.

²²Were kura ga Uziya apai, bambata ha na yangara ha, Yesaya ake pa ha nangia nebi nangia wiri Amosa.

²³Si du Uziya ki kpi fuo atitako, i ki kpisidi ko fuo atitako rogo bakpisida aboro yo nga ga abakindo, bambiko i aya, “Ko nga boro ngbataka.” Yotama nangia wiriko ki zogo rago ku ba ko.