Read zande 2 Pekapai 29 Bible Online

2 Pekapai 29 - zande bible

2 Pekapai 29

¹Izikiya atona zoga rago ho garãko adu ni 25, ko ki zogo rago Yerusarema yo tipa garã 29. Rimo nako nangia Abiya wiri Zekaraya.

²Ko ki nimangi gu pai naru aru bangiri Yekova, wa kina gu pai dunduko Dawidi anamanga nangia titako.

³Ti gako bambata garã zogarogo, ti bambata diwi, ko aza angbadimo ga Yekova bambu, ki mbakadi he berewe.

⁴Ko ki ye na aboromotumo na aRevi, ki dungura yo ku rogo gu barago nadu ku uroyo,

⁵ki ya fu yo, “Oni aRevi, oni gí sangbare! Awere oni kpara tironi ziazia, ki kpára ga Yekova bambu a, nga ga abaroni Mbori, ki kusi biriko rogo ziazia ba yo.

⁶Bambiko abarani ati ndika, ki nimangi gu pai nadu ni gbigbita ha bangiri Yekova gaani Mbori I ki mbu ko ka sa kpakpuyo ku sa yo ti gu baraka nga ga Yekova, ki sa kina giiyo yo fu ko.

⁷I ki kisi ngbadimo mbaraza a ki hisi we atara, ka i azo nga fuõngua fu Mbori nga ga aYisaraere ko watadu tumo ni zozo motumo, rogo ziazia ba yo a ya.

⁸Si du ga Yekova zinga aye ti ni ku ri Yuda na Yerusarema a. Ko ki fu yo i nidu ni ũgunde, ni ũkiga, ni ũpayasi he a ngba aboro, a wa oni abi he ni bangironi.

⁹Bambiko oni ngére, i aimi abarani ni basape. Awirani nga akumba na agu awirani nga ade na adiarani i ki du ni zizi yo tipa gi pai re.

¹⁰Were si ku kpotore yo ka zunga he fu Yekova, nga ga aYisaraere Mbori, ya gako nzengerenzengere zinga guari ti rani.

¹¹Awire, ka oni gíndiga nga pai awere ya, bambiko Yekova asia roni oni niru ku bara bangiriko, ka amanga pa ko, oni ki du ni amangipa ko ki nizo fuõngua fu ko.”

¹²ARevi ki guari, Mata ki du nangia wiri Amasai, na Yoere wiri Azaraya, dagba awiri Koata yo; na dagba awiri Merari yo, Kisi ki du nangia wiri Abedi, na Azaraya wiri Yarerere; na dagba aGerusona yo, Yoa ki du nangia wiri Zima, na Edene wiri Yoa;

¹³na dagba awiri Erisaefana yo, Simeri ki du na Yoere; na dagba awiri Asafa yo, Zekaraya ki du na Matania;

¹⁴dagba awiri Emana yo, Yuere ki du na Simi; dagba awiri Yedutuna yo, Semaya ki du na Uziere.

¹⁵I ki dungura awirinayo, ki kpara tiyo, ki ndu wa sangba bakindo adu, tipa ga Yekova apai, ka girisa ga Yekova bambu.

¹⁶Aboromotumo ki rimi ku rogo gu vuru bambu du vuru ga Yekova bambu yo ka girisa ha, ki nikusi gu birikobiriko ahe dunduko i abi rogo ga Yekova yekaru yo ku vurukporo ga Yekova bambu; aRevi ki rogo ho ho ki ndu na ni ku pati gu wiridi nga Kidirona.

¹⁷Were i atona sunge kpara ziazia ba ti bambata diwi ti rameru sa, ti muambi rame nga ga gu diwi re i ki da ku mbaraza yo nga ga ga Yekova bambu. I ki girisi ga Yekova bambu rame ki du muambi, ti rame 16 ti bambata diwi i ki nyasi sunge he.

¹⁸I ki ndu koyo du Izikiya ni nangia bakindo, ki ya fu ko, “Ani girisi ga Yekova bambu dunduko, na bamotumo nga ga zozo amotumo, na agu aũsunge dunduko nga gaha, gu mbisa nga ga kpokuta yugopai na agu aũsunge nga gaha dunduko.

¹⁹Agu aũsunge dunduko Bakindo Aza abafu ku sa yo ni gako tiandika, rago gako zogarago, ani mbakadi he berewe a ki kpara ha; mo ngére, si barangba ga Yekova bamotumo.”

²⁰Izikiya nangia bakindo ki guari ngbatutu ki dungura abazogo nga ga bakporo yo, ki rimi ku rogo ga Yekova bambu yo.

²¹I ki ye na abaabagara saba, na abaakandoro saba na awiri akandoro saba, na abaameme saba tipa motumo ingapai tipa ngbi na tipa kparakpara ba na tipa Yuda. Bakindo ki rugu aboromotumo nangia awiri Arona i tumo na ami auru ga Yekova bamotumo.

²²Si du i ki iimi agu abaabagara re, aboromotumo ki di kurera, ki migidi he kuti bamotumo. I ki iimi abaakandoro a wo, ki migidi kurera kuti bamotumo; i ki iimi awiri akandoro a, ki migidi kurera kuti bamotumo.

²³I ki ye na abaameme mbembedi tipa motumo ingapai koyo du bakindo ni na gbuu, i ki mamoi beyo ku ri ra,

²⁴aboromotumo ki imi ra i ki mangi motumo ingapai ni kurera auru bamotumo, ka manga pa dada ingapai tipa aYisaraere dunduko. Bambiko wo bakindo arugu he ya i ka manga zozo motumo na motumo ingapai tipa aYisaraere dunduko.

²⁵Bakindo ki ringbisi aRevi rogo ga Yekova bambu yo na gu sirigi napaa apaa be yo, na akindondo, na anzenze, kuti sangba Dawidi na sangba Gada ga bakindo babiapai na Natana nangia nebi; bambiko rugute aye be Yekova ngba gako anebi.

²⁶ARevi ki ru na agu aũworo ahe nga ga Dawidi, na aboromotumo na ambanva be yo.

²⁷Izikiya ki rugu he i zo zozo motumo auru bamotumo. Ho pa zozo motumo atona ni, i ki tona gu bia nga ga Yekova a, na woro ambanya, wa sa na agu aũworo ahe nga ga Dawidibakindo aYisaraere.

²⁸Aborogbuu dunduko ki fu irisa, abayango ki nibi bia, abavudi mbanya ki nivu he; si ki nindu kindi daho zozo motumo anyasi ni.

²⁹Hoianyasi pa motumo ni, bakindo na agu yo naadu ho na ko ki nugadi ki fu irisa.

³⁰Bakindo Izikiya na abazogo ki rugu aRevi ya i bi bia tambuahe a fu Yekova na fugo ga Dawidi abia na ga Asafa nangia babiapai. I ki nibi bia tambuahe na ngbarago, i ki nizogo riyo ki nifu irisa.

³¹Izikiya ki karaga ha ki ya, “Awere wa kpara oni tironi fu Yekova; oni yé kono mbembedi ka fu amotumo na gamuniahe nga ga tambuahe ku rogo ga Yekova bambu.” Gbuu ki ye na amotumo na gamunihe nga ga tambuahe; agu yo dunduko naadu na nyemuhe kpotoyo yo i aye na zozo amotumo.

³²Gedigedi zozo amotumo nga gu gbuu aye na ni adu wa abaabagara 70, na abaakandoro 100, na awiri akandoro 200; gi dunduko re adu tipa zozo motumo fu Yekova.

³³Kparakpara ahe adu a wa abaabagara 600, naakandoro 3,000.

³⁴Ono wa aboromotumo ange nga ya, si du i arengba nga ti ni ka vuka gu zozo amotumo dunduko re ya. Si du awirinayo nangia aRevi aunda yo ti ni daho gu sunge re anyasi ni, na daho kura aboromotumo akpara tiyo ni ― bambiko aRevi adu ni ruru yo kpotoyo yo susi aboromotumo tipa kpara tiyo.

³⁵Zozo amotumo adu kpaima a na nzeme amotumo zereda, na mbirimbiri amotumo tipa zozo amotumo ni ba sa sa. Si du gu mangapai nadu tipa ga Yekova bambu adu ni ringbisiringbisi he berewe.

³⁶Izikiya ki ningi na aboro dunduko tipa agu apai Mbori amangi he tipa aboro; bambiko gu pai re aye rure.