Read zande 2 Pekapai 33 Bible Online

2 Pekapai 33 - zande bible

2 Pekapai 33

¹Garã Manase adu 12 ho ko atona zoga rago ni, ko ki zogo rago Yerusarema yo tipa garã 55.

²Ko ki nimangi gu pai nadu ni gbigbita ba bangiri Yekova, ni gu kere gbegberẽ sino nangia ga arikaaboro nangia agu yo Yekova ado vo ku sa yo barangba awiri aYisaraere.

³Bambiko ko ududua gu tumbatumba arago berewe Izikiya nangia bako akuadi he, ko ki dudua abamotumo fu a Bara, ki mangi aAsera nga ngbama, ki niirisi rimbasa aũngbangbaturũ, ki nimangi pa ha.

⁴Ko ki dudua abamotumo rogo ga Yekova bambu yo, nga gu Yekova aya tipa ba. “Yerusarema yo mi ka maa rimore ni, nikanye anye kindi.”

⁵Ko ki dudua abamotumo tipa rimbasa aũngbangbaturũ dunduko rogo agu avurukporo ue naadu pati ga Yekova bambu.

⁶Ko amangi awiriko i susi rogo we ni motumo rogo gu ngboongboorago nga ga wiri Inomi, ki nimangi angua, na pa asoroka, ki nisana agumba sangbaatoro na abinza. Ko amangi gbigbitapai ni dungu he ku bangiri Yekova, ka gara gako zinga kuti ko.

⁷Ko ki moi gu sese kpiahe ko amangi ku rogo ga Mbori bambu yo, nga gu Mbori aya tipa ba fu Dawidi na fu Soromo nangia wiriko, “Rogo gi bambu re, na Yerusarema no, nga gu sia mi dagba angbatunga aYisaraere dunduko, mi amáa rimore yo nye anye kindi.

⁸Mi adía nga ndu aYisaraere ti gu ringara mi aringbisi fu atitaroni a te, kina gu ka i ka kuti gu pai dunduko mi arugu yo kuti ni, ki nimangi he ku sangba gu rugute yo mi afu ku be Mose, na arugapai, na asarangbanga.”

⁹Manase ki ingisi aboro Yuda na araki Yerusarema vo, si du i amangi gu pai ti ni naadu ni gnigbita ha ki susi gu pai arikaaboro anamanga nga agu yo Yekova agbarasi yo barangba awiri aYisaraere.

¹⁰Yekova ki gumba pai fu Manase na fu gako aboro, ono ka i agia nga ha ya.

¹¹Si du Yekova aye na agu abarutirivura ti ni nga ga bakindo aAsuro yo, nazi Manase ni vovo ko ki vo ko na aganziri sirigi ki ga na ko ku Babera yo.

¹²Ho ko adu ni rogo fudifudipai ko ki nigbata Yekova gako Mbori ki niumbasi tiko gbe bara bangiri gu Mbori nga ga abako ko.

¹³Ko ki kpari fu Mbori. Mbori ki gi gako kpesarawati ki gi gako kpe ki karaga ko berewe ku Yerusarema yo ku rogo gako ngbi Manase ki ini he ya Yekova du ni Mbori.

¹⁴Fuo gure ko ki dua ngapa bakporo ku zegi yo pati ga Dawidi bakporo ku dioyo Giona yo, rogo ngboongboorago, nga pati barima ti Nghadimo Atĩo, ko ki ke na ni pati Oferẽ kirikiri, ki dua ba ku ari ni bagbanga ba gbe, ko ki moi eere abarutirivura rogo agu abaakporo ngapa dunduko naadu Yuda yo.

¹⁵Ko ki rogo kungba ambori ku sa yo na gu kpiahe naadu rogo ga Yekova bambu yo, na agu abamotumo dunduko ko ududua ha ri gu gangara nga ga ga Yekova bambu na Yerusarema yo a, ki bafu he ku zegi gii bakporo yo.

¹⁶Ko ki dua ga Yekova bamotumo berewe, ki tumo ni amotumo zereda na amotumo tambuahe auru he; ki rugu aYudo i mangi pa Yekova nga ga aYisaraere Mbori.

¹⁷Wa si avura du wo, aboro atumo kindi ri tumbatumba arago yo, ono fu kina Yekova gayo Mbori.

¹⁸Were pa kura ga Manase apai, na pa gako kpe fu gako Mbori, na agu apai nangia ga ababiapai naagumba pai fu ko ti rimo Yekova ga aYisaraere Mbori, mo ngére, si ni keke he rogo gu Kitabu Peka pa Abakindo aYisaraere.

¹⁹Gako kpe a, na waĩ ko azungadi Mbori, na pa gako ingaapai na gako tiandika, na pa agu aba ko adudua tumbatumba arago rogo ho dunduko ki mamoi aAsera nga ngbama na sese kpiahe rogo ho, mbata ko nikaumbasi tiko, mo ngére, si ni keke be rogo gu Kitabu Pekapai yo nga ga Ababiapai

²⁰Manase ki kpi fuo atitako, i ki kpisidi ko kina rogo gako bambu; Amona nangia wiriko ki zogo rago ku ba ko.

²¹Garã Amona adu 22 ho ko atona zoga rago ni, ko ki zogo rago Yerusarema yo tipa garã ue.

²²Ko ki nimangi gu pai nadu ni gbigbita ha bangiri Yekova, wa Manase nangia bako amangi. Amona ki nitumo fu agu akpiahe dunduko bako nangia Manase amangi, ki nimangi pa ha.

²³Ka ko aumbasi nga tiko ku bangiri Yekova, wa Manase nangia bako aumbasi tiko ya, ono gi Amona re ati ndika ati ki susi.

²⁴Gako amoyambu ata bura ko ki imi ko kina dimo kpuko yo.

²⁵Ono aboro gu ringara re ki imi agu aboro nata bura Bakindo Amona; aboro gu ringara re ki moi Yosiya nangia wiriko ni bakindo ku ba ko.