Read zande 2 Pekapai 34 Bible Online

2 Pekapai 34 - zande bible

2 Pekapai 34

¹Garã Yosiya adu muambi ho ko atona zoga rago ni, ko ki zogo rago Yerusarema yo tipa garã 31.

²Ko ki mangi gu pai naru aru bangiri Yekova; ki nipeke sino Dawidi nangia titako; ka ko akpara nga ku bani ku kumbabe watadu ku garebe yo a ya.

³Bambiko ti muambi garã gako zogarago, ho ko adu ni ni paranga kindi, ko atona ka gbata ga Dawidi Mbori nangia titako. Ti 12 garã ko atona ka rogo tumbatumba arago Yuda na Yerusarema yo, na aAsera nga ngbama, na sese kpiaahe, na zaragasizaragasi kpiaahe.

⁴I ki kuadi ga Bara abamotumo kina ku bangiri ko; ko ki dewe gu duadua mbia du ni kpia uru, nagiza ku ari gbe; na Asera nga ngbama, na sese kpiaahe, na zaragasizaragasi kpiaahe, ko ki kuadi he mbusumbusu ki sa ha wa nvutu ki gbaragi he ri murã agu aboro nanatumo fu he.

⁵Ko ki zokodi meme aboromotumo ri gayo abamotumo, ki girisi Yuda na Yerusarema.

⁶Wo ko amangi rogo ga Manase bakporo a, na ga Efuraima na ga Simona, ki da ku Nafatari yo a, rogo bate yo kirikiri,

⁷ko ki kuadi abamotumo yo dũ ku sande, ki sa aAsera nga ngbama na sese kpiaahe wa nvutu, ki dedewe gu duadua ambia du ni kpia uru rogo ringara awiri aYisaraere dunduko. Ko ki karaga tiko ku Yerusarema yo.

⁸Were ti 18 garã nga ga ga Yosiya zogarago, fuo girisa ko ringara na bambu, ko ki kedi Safana nangia wiri Asaraya, na Maseya bazogo bakporo, na Yoa wiri Yoaza batingidipai, ka mbakada ga Yekova bambu berewe nga gako Mbori.

⁹I ki ye koyo du Erekiya ni nangia gbiamotumo ki fu gu marã fu ko aboro aye na ni ku rogo ga Mbori bambu yo, nga gu aRevi nangia ababanda ngbadimo adungura ha be ngbatunga Manase na Efuraima, na be gu yangara aYisaraere, na be aYudo dunduko na aBenyamina na be araki Yerusarema yo.

¹⁰I ki fu ra fu agu aboro sunge nabi pa sunge ga Yekova bambu; agu aboro sunge namangi sunge rogo ga Yekova bambu i ki fu ra tipa mbakada ha na tipa nyakasa ha berewe.

¹¹I afu ra fu abagbaki angua na abame bambu ka ngbe sekeseke mbia, na sekeseke ngua ka zunga bambu na basori bambu na ni, tipa agu abambu abakindo aYudo agbarasi he.

¹²Aboro ki mangi gu sunge re ni yososopai wenengaĩ. Abipasunge adu ku ri yo nangia Yata na Obadaya nangia aRevi dagba awiri Merari, na Zekaraya na Mesurama, dagba awiri Koata yo, i nibi pa ha. Akura yo dagba aRevi yo, nangia agu yo dunduko naadu na birĩ rogo pa aũworo bibia yo,

¹³i ki du ku ri atindi tindiro a ka ruga agu yo dunduko namanga ngbatunga asunge; kina aRevi ki du ni abakeapai, na abarumbatayo, na ababandarago.

¹⁴Ho i aye ni na gu marã naadu rogo ga Yekova bambu yo, Erekiya boromotumo ki bi kitabu yo du ga Yekova rugute rogo ho, gu ko agumba ha ku ngba Mose.

¹⁵Erekiya ki gumba pai fu Safana nangia bakeapai, “Mi bi kitabu rugute rogo ga Yekova bambu yo”; Erekiya ki kusi gu kitabu re fu Safana.

¹⁶Safana ki ndu na gu kitabu refu bakindo, ki ye na pai fu bakindo berewe, niya, “Agu apai i afu fu gamo amoyambu i namanga kina ha.

¹⁷I akusi gu marã i abi rogo ga Yekova bambu yo ki fu he ku be ababiapai na ku be aboro sunge.”

¹⁸Safana nangia bakeapai ki gumba pai fu bakindo, ki ya, “Erekiya boromotumo nifu kitabu fere.” Safana ki gedi he ku bangiri bakindo.

¹⁹Ho bakindo agi agu apa; ni nga ga rugute, ko ki siri gako aroko.

²⁰Bakindo ki rugu Erekiya, na Aikama wiri Safana, na Abidona wiri Mika, na Safana bakeapai, na Asaya ga bakindo moyambu, ki ya,

²¹“Oni ndú ka sana Yekova tipa ha fere, na tipa agu yo nanye Yisaraere no na Yuda yo, tipa agu apai nga ga gu kitabu bi yo re; bambiko ga Yekova zinga kĩ ni bakere he ki rungudi kuti rani, bambiko atitarani aka nga kuti ga Yekova pai te, ka amanga apai ku sangba agu apai dunduko du ni keke he rogo gi kitabu te re.”

²²Si du Erekiya ki ndu na agu yo bakindo aringbisi yo koyo du Uruda ni nangia denebi, nangia dia Saruma wiri Tokata, Tokata ki ngia wiri Asera, nangia babanda aroko. Were Uruda araka Yerusarema yo rogo Ue Papara Rago. I ki gumba pai fu ri tipa gu pai re.

²³Ri ki ya fu yo, “Ya Yekova nga ga aYisaraere Mbori wẽ: ‘Oni gúmba ha fu gu kumba nakedi roni kono du mi ni, ki ya,

²⁴Ya Yekova wẽ, Oni ngére, Mi ayé na gbigbitapai ku ri gi rago re na ku ri araki rogo ho, nga agu amotiwa dunduko du ni keke he rogo gu kitabu i nigedi ku bangiri bakindo aYudo re.

²⁵Bambiko i mbu re ki nizo fuõngua fu kura ambori, ka gara gi zinga ku ri yo na gu mangaapai dunduko nga ga beyo, si du gi zinga akĩ ti ni kuti gi ba re, ka si abísa nga ya.

²⁶Ono oni ayá fu bakindo aYudo nakedi roni ka sana Y ekova, oni yá fu ko wẽ, Ya Yekova nga ga aYisaraere Mbori wẽ: Tipa gu pai mo agi he,

²⁷bambiko ho ngbaduro yo adu na rungo ni, mo ki umbasi tiro bara bangiri Mbori mo agi gako pai nadu kuti gi rago re, na kuti araki rogo ho, ki umbasi tiro bangire, ki siri gamo aroko ki nikpari ku bangire, mi gi pa ro a, wo poi Yekova.

²⁸Mo ngére, si mi agá na mo koyo du atitaro ni, mo ki ndu ku murã yo rogo zereda, bangiro abí nga gu gbigbita apai dunduko mi ka ye na ni ku ri gi ba te re na ku ri araki rogo ho.’ ” I ki yega na karagapai fu bakindo berewe.

²⁹Bakindo ki kedi sunge ka dungura abaakumba dunduko nga ga Yuda na ga Yerusarema yo.

³⁰Bakindo ki ndu ku rogo ga Yekova bambu yo na aboro Yuda dũ na araki Yerusarema yo, na aboromotumo na aRevi, na aboro dunduko bakikindigi pa yo na umba pa yo a; ko ki gedi agu apai dunduko ku tuyo yo nga ga gu kitabu mokido i abi rogo ga Yekova bambu yo.

³¹Bakindo ki ru kina ku ba ko ki zunga he ku bangiri Yekova, ya ko apéka Yekova ka ka kuti gako arugute na gako dezireapai na gako rugaapai, na kpotoko yo dũ na mbisiinoko dũ, ka amanga pa gu mokido nga gu du ni keke he rogo gu kitabu re.

³²Ko ki rugu agu aboro du Yerusarema na Benyamina yo i ka kuti ni a. Araki Yerusarema yo ki nimangi pai kina kuti sangba gu zungahe nga ga Mbori, nga ga abayo Mbori.

³³Yosiya ki rogo kere gbigbita kpiahe dunduko rogo aringara nga ga awiri aYisaraere, ki rugu agu aboro dunduko du ringara aYisaraere yo i mangi pa Yekova gayo Mbori. Ti gako arago dunduko i ambu nga peka fuo Yekova nga ga abayo Mbori te.