Read zande 2 Pekapai 35 Bible Online

2 Pekapai 35 - zande bible

2 Pekapai 35

¹Yosiya ki mangi pumbo susiri fu Yekova Yerusarema yo; i ki imi wiri kandoro tipa pumbo susiri ti 14 rame ti bambata diwi.

²Ko ki ringbisi aboromotumo na gayo asunge ki ningarãsi yo tipa manga pa ga Yekova bambu.

³Ko ki ya fu aRevi naadu ni kparakpara yo ziazia fu Yekova, nga agu yo nayugu pai fu aYisaraere dunduko, “Oni mói ga Yekova ziazia sanduki ku rogo gu bambu Soromo wiri Dawidi, bakindo aYisaraere adua ha. Oni atínda nga ha berewe ni tindiro pagoroni te. Oni mángi pa Yekova gaoni Mbori awere na pa gako aboro nga aYisaraere.

⁴Oni mbákadi tironi ni arikaroni wa angbatunga abaroni adu, ku sangba gu pai Dawidi ake nangia bakindo aYisaraere, na kuti gu keke apai Soromo ake nangia wiriko.

⁵Oni ru rogo kparakpara ziazia ba yo wa du pa kparakakparaka roni ni angbatunga abaroni dagba awirinaroni nangia awiri aboro, rengbe na gu kparaka nga ga angbatunga atita aRevi ni ba sa sa.

⁶Oni ki imi wiri kandoro nga ga pumbo susiri ru, ki kpara tironi ziazia, ki mbakadi pai tipa awirinaroni, ka amanga pai ku sangba Yekova yo ku ngba Mose.”

⁷Yosiya ki fu anya fu aboro, dagba rimbasa anya nga wiri akandoro na wiri ameme ami dunduko tipa amotumo pumbo susiri, tipa agu yo nadu ho dunduko, gedigedi ra adu wa 30,000, na abaabagara 3,000; agi ra re adu ni ndikidi ga bakindo ra.

⁸Ono gako abazogo afu gamahe zaza ni nyemuhe fu aboro, fu aboromotumo, na fu aRevi a. Erikiya, na Zekaraya, na Yiere, nangia abazogo pa ga Mbori bambu, i afu wiri akandoro na wiri ameme fu aboromotumo tipa amotumo pumbo susiri wa 2,600 na abaabagara wa 300.

⁹Konania a, na Semaya na Natanere na awirinako, na Asabeya na Yiere na Yozabada, nangia abaakumba aRevi i ki fu wiri akandoro na wiri ameme fu aRevi tipa amotumo pumbo susiri wa 5,000 na abaabagara 500.

¹⁰Si du ho i ambakadi pa gu mangapai ni re, aboromotumo ki rundu rogo gayo aba, na aRevi ngba rikayo ku sangba ga bakindo rugute yo.

¹¹I ki imi awiri akandoro pumbo susiri, aboromotumo ki nimigidi gu kure i adi he be aRevi ho i ayuku ra ni.

¹²I ki kpara zozo amotumo ku bani ka fu he wa kparakakparaka angbatunga abayo adu dagba awiri aboro, i fu he fu Yekova, wa du he ni keke he rogo ga Mose kitabu. Kina wo i amangi na abaabagara a.

¹³I ki pasi awiri akandoro pumbo susiri apasa ngba we wa du he rogo pa rugapai yo; na gu kparakakparaka ziazia amotumo i apasi he pere yo, na rogo aakoro, na rogo asaani, ki nindu na ni ni ipo fu awiri aboro dunduko.

¹⁴I ki mbakadi he tipa tiyo giza, na tipa aboromotumo bambiko aboromotumo nangia awiri Arona adu fuo yo na pa sunge zozo amotumo na pa nzeme ki da ku yuru. Si du aRevi ambakadi he ti ni tipa yo na tipa aboromotumo nangia awiri Arona.

¹⁵Abayango nangia awiri Asafa adu kina ku ba yo ku sangba ga Dawidi rugute yo, na Asafa, na Emana, na Yedutuna nangia ga bakindo babiapai. Ababanda angbadimo ki du pati angbadimo ni ba sa sa; ka i aguari nga pati gayo mangapai ya, bambiko awirinayo nangia aRevi ambakadi he tipa yo.

¹⁶Si du gu mangapai dunduko nga ga Yekova i ambakadi he kina rogo gu uru re, ka ka kuti manga pumbo susiri na ka fu zozo amotumo ri ga Yekova bamotumo, kuti ga Bakindo Yosiya rugute.

¹⁷Agu awiri aYisaraere nadu ho ni gu rago re i ki ka kuti manga pumbo susiri, na pumbo gu kpokuta adu nga na agbooro ti ni ya rame ki du saba.

¹⁸I amanga nga pumbo susiri wa gure mbata dagba aYisaraere fuo rago Samuere nangia nebi wa sa te; a nga gu bakindo aYisaraere ho sa namangi ngbatunga pumbo susiri wa gu Yosiya amangi he te re, na aboromotumo na aRevi, na agu aboro Yuda dunduko na agu aYisaraere nadu ho, na araki Yerusarema yo a te.

¹⁹I amangi gu pumbo susiri re ti gu 18 garã zogarago nangia ga Yosiya.

²⁰Fuo agi apai dunduko re, ho Yosiya anyasi mbakada yekaru ni, Neko nangia bakindo aEzipeto ki kuru ka so vura kuti bakporo Karekimisa pavuru gu di nga Ferata, Yosiya ki ndu kuti ko.

²¹Ono Neko akedi asunge koyo du ko ni, ki ya, “Sa gaani na mo, mo bakindo aYudo? Mi aye nga sa ro ni gi uru te re, ono kuti kina gu kporo moi mi vura kuti ni. Ono Mbori rugu re mi ipisi tire. Mo mbú pa tikango na Mbori, nga gu ko du na mi, ka ko gbarasi ro.”

²²Wa si avura du wo, Yosiya adia nga bangiriko yo du ko ni te, ono ko ki biriki tiko ka so vura kuti ko. Ka ko adega nga tuko sa agu apai Neko agumba nga gu naye ngba Mbori yo ya, ono ko ki ndu ka so vura rogo gu ngboongboorago du Megido yo.

²³Abaaguanza ki no bakindo Yosiya; bakindo ki ya fu gako amoyambu, “Oni ga na mi ku sa yo, bambiko mi hõ ahõ ni kere he.”

²⁴Si du gako amoyambu ki kusi ko ngbagidavura yo ki moi ko ku rogo gu ue ngbagidavura nadu be ko ki ye na ko ku Yerusarema yo. Ko ki kpi yo, i ki kpisidi ko ku rogo ga atitako murã yo. Aboro Yuda na aboro Yerusarema dunduko ki kpari Yosiya.

²⁵Yeremaya ki kpari kpe tipa Yosiya a; ababibia dunduko na anabibia ki nigumba pa Yosiya rogo gayo abiakpe daku areme. I aringbisi agu abiakpe re ni rugapai Yisaraere yo; mo ngére, si ni keke he rogo Kitabu Abiakpe yo.

²⁶Were pa kura ga Yosiya apai, na pa gako weneringise ku sangba gu du ni keke he rogo ga Yekova rugute yo,

²⁷na gako mangaapai, bambata ha na yangara ha, mo ngere, si ni keke he rogo gu Kitabu Peka pa Abakindo aYisaraere na aYudo.