Read zande 2 Pekapai 36 Bible Online

2 Pekapai 36 - zande bible

2 Pekapai 36

¹Si du aboro gu ringara re ki di Yoaza nangia wiri Yosiya ki moi ko ni bakindo ku ba bako Yerusarema yo.

²Garã Yoaza adu 23 ho ko atona zoga rago ni; ko ki zogo rago Yerusarema yo tipa diwi biata.

³Bakindo aEzipeto ki di ko adia Yerusarema yo, ki ya aboro gu ringara re nirũ he fu kina ko wa taranda feda 100 na taranda dahabu sa.

⁴Bakindo aEzipeto ki moi Ereyakima nangia tameko ni bakindo Yuda na Yerusarema yo, ki sa rimoko nga Yoyakima. Ono Neko ki di Yoaza nangia unvuruako ki ga na ko ku Ezipeta yo.

⁵Garã Yoyakima adu 25 ho ko atona zoga rago ni, ko ki zogo rago Yerusarema yo tipa garã 11. Ko ki mangi gu pai nadu ni gbigbita ha bangiri Yekova gako Mbori.

⁶Nebukadenesara bakindo Babera ki ye kuti ko na vura, ko ki vo ko na aganziri ki ndu na ko ku Babera yo.

⁷Nebukadenesara ki tindi agu aũsunge dunduko naadu rogo ga Yekova bambu yo ku Babera yo, ki moi he rogo gako bambu bakindo Babera yo.

⁸Were pa kura ga Yoyakima apai, na gako kere gbegberẽ asino nga gu ko amangi, na gu i abi ti ko, mo ngére, si ni keke he rogo gu Kitabu Peka pa Abakindo aYisaraere na aYudo; Yoyakina ki zogo rago ku ba ko nangia wiriko.

⁹Garã Yoyakina adu muambi ho ko atona zoga rago ni, ko ki zogo rago Yerusarema yo tipa diwi biata na rame bawe. Ko ki mangi gu pai nadu ni gbigbita ha bangiri Yekova.

¹⁰Ti digida garã Bakindo Nebukadenesara ki kedi sunge ki ye na ko ku Babera yo, na gu wene aũsunge nangia ga ga Yekova bambu, ko ki moi Sedekiya nangia tameko ni bakindo Yuda na Yerusarema yo.

¹¹Garã Sedekiya adu 21 ho ko atona zoga rago ni, ko ki zogo rago Yerusarema yo tipa garã 11.

¹²Ko ki mangi gu pai nadu ni gbigbita ha bangiri Yekova gako Mbori. Ko aumbasi nga tiko bangiri Yeremaya nangia nebi naagumba gu pai naye ngba Yekova yo te.

¹³Ko ki sa mungu a kuti Bakindo Nebukadenesara, naaya fu ko ko zunga he ku bangiri Mbori; ono ko ki nyakasi riko kindi ki nyakasi kpotoko yo ti sa tiko fuo Yekova, nga ga aYisaraere Mbori.

¹⁴Abarukuri aboromotumo dunduko ki ti ndika a ni bakere he na aboro, ni merã fuo gu kere gbegberẽ asino nga ga arikaaboro; i ki birikosi ga Yekova bambu nga gu ko akpara ha ziazia Yerusarema yo.

¹⁵Yekova ga abayo Mbori, ki nikedi pai fu yo be gako asunge, ki niguari ngbatutu ka keda yo, bambiko nunga gako aboro anamanga ko, na nunga gako baraka;

¹⁶ono i ki nisawia ga Mbori asunge asawia, ki nipayasi pa gako apai apayasi, ki niwasi gako anebi awasi, daho ga Yekova zinga aguari ni sa gako aboro, daho zeresi adu nga ni wa sa ya.

¹⁷Si du Yekova aye ti ni na gu bakindo nangia ga aKasado ko kuti yo, naaimi paranga awiriyo ni basape kina rogo gayo kparakpara ba yo, ka ko adu nga na nunga aparanga akumba na paranga ade ti ko ya, na nunga kuru boro na gbinza boro a ya; Yekova ki fu yo dunduko ku be ko.

¹⁸Agu aũsunge naadu rogo ga Mbori bambu yo, kikindigi he na rukutu he, na gu kikiipaahe naadu rogo ga Yekova bambu yo, na ga bakindo kikiipaahe na ga gako abazogo, agi ahe dunduko re bakindo aBabera aye na ni ku Babera yo.

¹⁹I azokodi ga Mbori bambu, ki kuadi ngapa bakporo Yerusarema dunduko ku sande, ki zokodi gu nyanyaki aba dunduko naadu yo ni we, ki gbarasi gaha bawene aũsunge dunduko.

²⁰Agu yo nabati be basape ko andu na yo dunduko ku Babera yo, i ki du ni akanga fu ko na fu awiriko dati gu zogarago nangia ga abakindo aParaso,

²¹ka digisa sangba Yekova nga gu ko agumba ha ku ngba Yeremaya, daho gu ringara re adu ni na ngbarago rogo gaha rago asabiti. Wa si aima ni bate tipa gbanga rago i ki niirisi rago asabiti, ka digisa pa garã 70.

²²Were ti gu bambata garã nangia ga Kurese nangia bakindo aParaso, sangba Yekova naadu ngba Yeremaya ya si du ni digisidigisi he, si Yekova azingisi toro Kurese ti ni nangia bakindo aParaso. Ko ki taki pande he rogo gako ngbi dũ ki ke he ku waraga yo a: niya,

²³“Ya Kurese bakindo aParaso wẽ, ‘Yekova, nga Mbori ngbangbaturũ ko afu angbi zegino fere dunduko. Ko arugu re mi dua bambu fu ko Yerusarema yo, du Yuda yo. Gu ni du dagba roni yo nga gako aboro dunduko, Yekova gani Mbori du na ni. Ni ndú ko yo.’”