Read zande 2 Pekapai 4 Bible Online

2 Pekapai 4 - zande bible

2 Pekapai 4

¹Ko ki mangi bamotumo ni sirigi, bagizaha adu wa bagiza mbiribe 20, patihe ki du wa bagiza mbiribe 20, basonaha adu wa bagiza mbiribe bawe.

²Ko ambakadi bakere bazundati a, ni zaragasizaragasi sirigi ni kirikiri he; pangbaha ki da ti pangbaha ku bani adu wa bagiza mbiribe bawe, basonaha adu wa bagiza mbiribe bisue, pati pangbaha kirikiri adu wa bagiza mbiribe 30.

³Tii he yo kpia abaabagara ki du, si ki du pati he kirikiri tipa bagiza mbiribe bawe, du pati bakere bazundati kirikiri; kpia abaabagara adu ti agene ue, i ambakadi he wa sa na bazundati.

⁴I amoi he auru kpia abaabagara 12, gu biata angera ku nodiyo, gu biata ki ningere ku dioyo, gu biata ki ningere ku sudiyo, gu biata ki ningere ku uroyo; i ki moi bakere bazundati ri he, rumburuhe dunduko ki du ku vuruhe yo.

⁵Banagaha adu wa pabe sa; pangbaha adu ni mbakadimbakadi he wa pangba inga, ni sekeseke he wa kpia mbumbuda ranga; vuruhe yo ki rengbe na ime wa aritere 111,000.

⁶Ko ki mbakadi asaani zundati bawe a, ki moi he bisue ku kumbabe, na bisue ku garebe yo, ka zunda ahe rogo ho. Agu ahe du tipa zozo motumo i azunda ha rogo ho, ono bakere bazundati adu tipa aboro motumo i nizundu tiyo rogo ho.

⁷Ko ki mbakadi baduawe bawe ni dahabu a wa i aringbisi pa ha, ko ki moi he ku yekaru yo, bisue ku kumbabe na bisue ku garebe yo.

⁸Ko ki mbakadi ambisa bawe a, ki moi he ku yekaru yo, bisue ku kumbabe na bisue ku garebe yo. Ko ki mbakadi abaasaani ni dahabu wa 100.

⁹Ko ki mbakadi vurukporo a nga ga aboromotumo, na bakere vurukporo, na angbadimo vurukporo, ko ki dadi angbadimoho ni sirigi;

¹⁰ko ki moi bakere bazundati ku vuru bambu ku uroyo ku sudiyo toni.

¹¹Urama ki mbakadi aakoro, na aũndukuda ahe, na abaakurungbu. Si du Urama ki nyasi gu sunge nga gu ko amangi tipa Bakindo Soromo rogo ga Mbori bambu:

¹²nangia agu adangba ue, na akurungbu, na agu akpakpari ue re nga gu naadu auru adangba; na gu arambaaramba he ka dada akurungbu nga ga kpakpari naadu auru adangba;

¹³na agu azuzu ahe wa ndavu 400 tipa gu arambaaramba he re; gene zuzu ahe wa ndavu ue ti ngba gu arambaaramba he ni ba sa sa, si dadi agu akurungbu nga ga kpakpari nadu auru adangba.

¹⁴Ko ki mbakadi abamaasaani na asaani zundati ku ri he,

¹⁵na bakere bazundati sa, na abaabagara 12 tii he yo.

¹⁶Aakoro, na aũndukuda ahe, na angorã pasio, na agu aũsunge dunduko nga gaha, agi ahe re dunduko Urama-abi ambakadi ni imaima sirigi, tipa Bakindo Soromo tipa ga Yekova bambu.

¹⁷Bakindo azaragasi he rogo gu kpasakpasa rago du pati Yaradene, yo pere adu ni dagba Sukota na Zereda.

¹⁸Were Soromo ambakadi agi aúsunge re kpaima ni bakere he, bambiko i arengba nga na ina pa waĩ du barĩa sirigi te.

¹⁹Soromo ki mbakadi agu aũsunge naadu rogo ga Mbori bambu yo: bamotumo ni dahabu a, na ambisa tipa kpokuta yugopai,

²⁰na abaduawe na gaha awe si ki nikĩ wa i aruga paha ku barangba ziazia ba, ko ambakadi he dũ ni ndikidi dahabu;

²¹na gu ambumbudahe ni dahabu na awe, na waza a, ni ndikidi dahabu;

²²na aũbisawe, na abaakurungbu, na abaarikare, na aũzokingire ni ndikidi dahabu; na kpuguru ga yekaru adu ni dahabu a, na agu angbadimo naadu ku dimo yo tipa gu kparakpara ziazia ba na angbadimo bambu nga ga yekaru a dũ.