Read zande 2 Pekapai 5 Bible Online

2 Pekapai 5 - zande bible

2 Pekapai 5

¹Si du agu asunge anyasi dunduko nga gu Soromo amangi tipa ga Yekova bambu. Soromo ki ye na agu ahe dunduko Dawidi nangia bako akpara ha naadu ni feda, na dahabu, na aũsunge dunduko ki moi he ku rogo baigaahe rogo ga Mbori bambu.

²Soromo ki dungura ga aYisaraere abaakumba na abarukuri angbatungayo, na abazogo angbatunga abayo nga ga aYisaraere yo, ku Yerusarema yo, ka ye na sanduki mokido nga ga Yekova rogo ga Dawidi bakporo, du Siona yo.

³Akumba aYisaraere dunduko ki dungura tiyo koyo du bakindo ni ti rago pumbo naadu rogo saba diwi.

⁴Ga aYisaraere abaakumba dunduko ki ye, aRevi ki tumba sanduki.

⁵I ki ye na sanduki, na bamburoko dungurati, na gu kparakpara ziazia aũsunge dunduko naadu bamburoko yo; aboromotumo na aRevi aye na agi ahe re.

⁶Bakindo Soromo na gbuu aYisaraere dunduko adungura tiyo koyo du ko ni, i aru barangba sanduki ki nitumo na akandoro na abaabagara, ka i arengba nga ka gumba pa ra na ka geda ra tipa nge ami ya.

⁷Aboromotumo ki ye na ga Yekova sanduki mokido ki moi he ku rogo baha ku rogo ziazia ba dimoyo, ku rogo kparakpara ziazia ba susi, tii pupo akeruba yo.

⁸Bambiko akeruba azara apupoho ku ri gu ba sanduki adu ni, akeruba ki dadi sanduki na agu angbongbo naadu ti ni.

⁹Wo pa giza angbongbo adu, i abi digidaha kina ziazia ba yo barangba kparakpara ziazia ba; ono i abi nga ha zegi yo te; si kina hodakuareme.

¹⁰He adu nga vuru sanduki yo te, kina agu ambia ue Mose amoi he ku rogo ho Orebe yo, ho Yekova arũ ndika ni fu awiri aYisaraere, ho i akuru ni Ezipeta yo.

¹¹Si ki ta du wa gere, aboromotumo akura rogo ziazia ba yo, bambiko agu aboromotumo nadu ho akpara tiyo, ono i amanga nga sunge ti gayo kparakpara rago te;

¹²na aRevi a nangia abayango wa i adu dunduko, aAsafa, Emana, Yedutuna, na awiriyo na awirinayo, i aukadi tiyo na tutu roko ni giri nzibi. I ki du na gu sirigi napaa apaa, na akindondo, na anzenze be yo, ki ru ti digida bamotumo ku uroyo, aboromotumo ki du na yo wa aboro 120 navuda ambanya.

¹³Si adu wa gere, abavudi mbanya na abayango adu kina sa, ka manga woro fugoyo kina sa i gi he rogo sambuahe na tambuahe fu Yekova, ho i atumba fugoyo ni, na anambongo na gu sirigi napaa apaa na agu aũworo ahe du tipa tambua Yekova na ni, i ki ya, “Bambiko ko ni wene ko, gako weneringise nye anye kindi,” si du ga Yekova bambu ki hi ahi be dubo,

¹⁴ka si adu nga wa ka aboromotumo ru ka manga sunge be dubo ya; bambiko gu taarimo nga ga Yekova ahisi ga Mbori bambu.