Read zande 2 Pekapai 6 Bible Online

2 Pekapai 6 - zande bible

2 Pekapai 6

¹Soromo ki gumba pai, “Yekova aya ko araka rogo tikatika bitimo.

²Ono mi adua bambu banye tipa ro, nga gu ba mo ka nye rogo ho kindi.”

³Bakindo ki aria kpakpuko, ki fu maku fu gbuu aYisaraere dũ, gbuu aYisaraere dunduko ki ru ku ari.

⁴Ko ki ya, “I sámbua Yekova, ga aYisaraere Mbori, nga gu ko nagumba pai ni ngbako fu Dawidi nangia buba, ko ki digisi he ni beko, niya,

⁵‘Fuo kusa mi gimi aboro Ezipeta yo, mi asia nga bakporo dagba angbatunga aYisaraere yo dunduko i dua bambu yo ya rimore du ti ni da ti gi rago re te, ono mi asia nga gu boro nidu ni bazogo gimi aboro aYisaraere a te;

⁶ono mi sia Yerusarema ya rimore du ti ni, mi ki sia Dawidi ko zogo gimi aboro aYisaraere.’

⁷Were si adu kpoto Dawidi yo nangia buba ka dua bambu tipa rimo Yekova, ga aYisaraere Mbori.

⁸Ono Yekova ki ya fu Dawidi nangia buba, ‘Wa du he nga si adu kpotoro yo ka dua bambu tipa rimore, mo amangi he wenengaĩ wa si adu kpotoro yo;

⁹ono boro mo adúa nga gu bambu te re, ono gu wiro mo ka vunga ko ko nikadua bambu tipa rimore.’

¹⁰Si du Yekova adigisi gu gako pai ko agumba; bambiko mi du awere ku ba buba nangia Dawidi, ki nisungu auru ga aYisaraere mbatabakindo, a wa Yekova akido paha, mi dua bambu tipa rimo Yekova, nga ga aYisaraere Mbori.

¹¹Mi moi sanduki koyo, nga gu du ga Yekova mokido rogo, nga gu ko arũ he fu awiri aYisaraere.”

¹²Soromo ki ru barangba ga Yekova bamotumo ku bãngiri gbuu aYisaraere dũ, ki zara beko.

¹³Soromo amangi babita ni sirigi bagizaha adu wa bagiza mbiribe bisue, patihe ki du wa bagiza mbiribe bisue, basonaha ki du wa bagiza mbiribe biata, ko amoi he bebere vurukporo; ko ki ru ri he. Ko ki kuku ngba rukusuko ku bangiri gbuu aYisaraere dunduko, ki tumba abeko ni zarazara ha ku ngbangbaturũ yo.

¹⁴Ko ki ya, “Ako Yekova, ga aYisaraere Mbori, a nga Mbori ho du wa mo te, ngbangbaturũ yo watadu auru kpotosende no a te, ninaka kuti zungahe na inapai fu gamo amoyambu nga agu yo ninata ku bara bangiro na kpotoyo yo dũ;

¹⁵mo naka kuti gu pai mo akido fu ga moyambu nangia Dawidi nangia buba; ii, mo agumba pai ni ngbaro, ki digisi he ni bero a wa du he areme re.

¹⁶Ako Yekova, ga aYisaraere Mbori, awere tie, mo ká kuti gu pai mo akido paha fu ga moyambu nangia Dawidi nangia buba, niya, ‘Mo ázanga nga boro ku bangire nikasunga auru ga aYisaraere mbatabakindo te, ka awiro akparia pa gayo apai, ka apeka gi rugute wa mo ata bara bangire.’

¹⁷Ako Yekova, ga aYisaraere Mbori, awere tie, ga pai dũ ni digisidigisi he, nga gu mo agumba paha fu Dawidi ga moyambu.

¹⁸“Ono Mbori aráka rengo na aboro auru kpotosende no? Oni ngére, ngbangbaturũ na gu ngbangbaturũ du ku ari yo gbe si arengba nga na mo te; waĩ tie ka gi bambu rengbe na mo dua mi he re!

¹⁹Ako Yekova gi Mbori, ono mo írisi gu kpetambuahe nga ga ga moyambu na gako kpesarawati, ki gi fugore na gi kpetambuahe nga gu ga moyambu akpara foro bara bangiro;

²⁰bangiro dú ti gi bambu re uru na yuru, nga gu ba a mo aya ti ni mo amáa rimoro yo, ki gi gu kpetambuahe ga moyambu ka akpara ningere kono du gi ba ni re.

²¹Mo nigí gu kpesarawati nga ga moyambu, na ga gamo aboro aYisaraere, no i ka akpara ni ningere kono du gi ba ni re; ii, mo nigí he ngbangbaturũ yo nga ga banye; ho mo ka nigi he ni, mo ki vu yo.

²²“Ka boro ingi pai kuti kurani i ki sosodi ni, ni zunga he, ni ki ye ka zunga he barangba ga bamotumo rogo gi bambu re,

²³mo gí he ngbangbaturũ yo, ki mangi pai, ki sapu ngbanga dagba gamo amoyambu, ki kiti ngbanga gbegberẽ boro ki sa gani apai kina ku rini, ki di pai ri gu ruru boro, ki fu he fu ni rengbe na gani rurupai.

²⁴“Ho avura gamo aboro aYisaraere ka dia be yo ni, bambiko i aingi pai kuti ro, i ki sa tiyo berewe ki kusi rimoro, ki kpari ki nizungadi ro rogo gi bambu re;

²⁵mo gí he ngbangbaturũ yo, ki vu gamo aboro aYisaraere ti gayo ingapai, ki ye na yo berewe ku rogo gu ringara mo afu he fu yo na fu atitayo a.

²⁶“Ho ngbangbaturũ ka du ni ni kisikisi he si ka mai ana nga ya bambiko i aingi pai kuti ro, ka i kpari ki ningere kono du gi ba ni re, ki kusi rimoro, ki sa tiyo ti gayo ingapai, ho mo ka ambusa yo ni,

²⁷mo gí he ngbangbaturũ yo, ki vu gamo amoyambu ti gayo ingapai, nga gamo aboro aYisaraere, ho mo ka ayugo wenepai ni fu yo nga gu ka i apeka fuo ho; mo ki nikedi mai ku auru ga ringara, nga gu mo afu he fu gamo aboro ni gayo.

²⁸“Ka gberángbi ati ku rogo ringara, ka tata kaza gberãngbi adu ho, watadu aũati ngbiimi, si ngia kuka, ka ayere ye watadu asangba; ka avura aYisaraere ru nguru kuti abaakporo rogo gayo ringara; si ngia gini gberãngo ka du ho, si ngia gini kaza;

²⁹gu kpetambuahe, na gu kpesarawati gu boro ka kpara, watadu gamo aboro aYisaraere dunduko, nga agu yo ka ini pa gayo gberãngbi ni ba sa sa, na gayo rungosi, i ki zara beyo kono du gi bambu re ni;

³⁰mo gí he ngbangbaturũ yo nga ga banye, ki vu yo, ki nifu he fu aboro dunduko rengbe na gayo apai, nga agu yo ini mo pa kpotoyo yo, bambiko mo, kina ro ini gu pai dũ kpoto awiri aboro yo;

³¹ya i gunde ti ro, ka apeka fuo gamo apai, wa du yo ni ungayo rogo gu ringara mo afu he fu atitarani.

³²“Na tipa gu kungba boro a, nga gu ni angia nga ga gamo aboro aYisaraere ni ya, ho ni ka niye ni gii ngbi yo tipa wo rimoro, na tipa pa nyanyaki bero, na taĩtaĩ bero, ho ni ka niye ni ka akpara ningere kono du gi bambu re ni,

³³mo gí he ngbangbaturũ yo nga ga banye, ki mangi he dunduko wa ka gu kungba boro zungadi ro tipa ha; ya angbatunga aboro du auru kpotosende dunduko, i ini pa rimoro ka agunde ti ro, a wa gamo aboro aYisaraere agunde ti ro, i ki ini ya gi bambu re dua mi he, i yambu he ti rimoro.

³⁴“Ka gamo aboro kuru ka ndu sa vura kuti avurayo, ngba gini gene mo ka keda yo ni, i ki kpari foro ningere kono du gi bakporo re ni, mo asia ha, na kono du gi bambu re ni mi adua ha tipa rimoro,

³⁵mo gí gayo kpetambuahe na gayo kpesarawati, ki mbakadi gayo apai.

³⁶“Ka i ingi pai kuti ro―bambiko a nga boro ho sa zanga manga ingapai te―mo ki zingi kuti yo, ki fu yo ku be avurayo, i ki ga na yo ni zizi yo ku rogo gu ringara turũ aturã watadu gu mbedi ambeda;

³⁷ono ka i baki bangiriyo ku kpotoyo yo rogo gu ringara du yo rogo ho ni zizi yo, ki sa gayo berã berewe, ki zungadi ro rogo gu ringara zi yo yo ku rogo, i ki ya, ‘Ani ingi pai, ki mangi pai ni waka, ni gbegberẽ he;’

³⁸ka i sa gayo berã koyo du mo ni berewe na kpotoyo yo dunduko na mbisimoyo dũ rogo gu ringara du yo rogo ho yo ni zizi yo, yo i aga na yo ku ho ni ni zizi yo, i ki kpari ningere kono du gayo ringara ni, nga gu mo afu fu atitayo, na kono du gi bakporo re ni mo asia ha, na kono du gu bambu re ni dua mi he tipa rimoro,

³⁹mo gí gayo kpetambuahe na gayo kpesarawati, ngbangbaturũ yo nga ga banye, ki mbakadi gayo apai ki vu gamo aboro namangi ingapai kuti ro.

⁴⁰Ako gi Mbori, awere, mi nazungadi ro bangiro du ni zaza ha mo ki dege turo sa gu kpetambuahe i ka akpara rogo gi ba re.

⁴¹“Ako Yekova Mbori, mo gúari awere, ki ndu ku rogo ga baongoda, mo na gu sanduki nga ga ga ome. Ako Yekova Mbori, i úkadi gamo aboromotumo na bata, gamo ziazia aboro ngí rogo ga weneringise.

⁴²Ako Yekova Mbori, ka mo sá nga kpakpuro ku sa yo ti ga mbedimbedi boro ya! Mo tíngidi pa ga inapai fu Dawidi ga moyambu.”