Read zande 2 Pekapai 7 Bible Online

2 Pekapai 7 - zande bible

2 Pekapai 7

¹Were ho Soromo anyasi pa kpara kpetambuahe ni, we ki zorõ ngbangbaturũ yo ki riti gu zozo motumo na amotumo, gu taarimo nga ga Yekova ki hisi yekaru.

²Ka aboromotumo arengba nga na rima ku rogo ga Yekova bambu yo ya, bambiko gu taarimo nga ga Yekova ahisi ga Yekova bambu dunduko.

³Ho awiri aYisaraere dunduko abi we ni si nazorõ, ga Yekova taarimo ki du ri yekaru, i ki nugadi na kpakpuyo ku sande ku auru kpasakpasa ambia, ki fu irisa ki nifu atambuahe fu Yekova, niya, “Bambiko ko ni wene ko, gako weneringise nye anye kindi.”

⁴Bakindo na aboro dunduko ki fu motumo ku bara bangiri Yekova.

⁵Bakindo Soromo ki tumo ni abaabagara wa 22,000 na akandoro wa 120,000. Si du bakindo na aboro dunduko ki kpara ga Mbori bambu.

⁶Aboromotumo ki ru wa pa gayo basunge adu; na aRevi a wo, na aũworo ahe be yo tipa Yekova, nga gu Bakindo Dawidi amangi tipa fu tambuahe na ni fu Yekova ― bambiko gako weneringise nye anye kindi―ho Dawidi anatambua he ni pati gayo mangapai; aboromotumo ki nivu ambanya barangba yo; aYisaraere ki ru aru dunduko.

⁷Soromo ki kpara gu rago du bebere vuru Kporo naadu barangba ga Yekova bambu; bambiko yo ko atumo ni ni zozo amotumo na nzeme amotumo zereda, bambiko bamotumo sirigi nga gu Soromo amangi arengba nga ka dia zozo motumo dũ te na motumo riahe na nzeme a te.

⁸Si du Soromo ki mangi pumbo tipa rame saba, na aYisaraere dunduko wa sa na ko, si adu ni babakere gbuu, tona ti bangbanda Amata ki da ti gu Wiridi du Ezipeta yo.

⁹Ti muambi rame i ki mangi yangara pumbo; bambiko i amangi pa kpara bamotumo tipa rame saba na pumbo a wa tipa rame saba.

¹⁰Ti 23 rame nga ga saba diwi ko ki asia aboro i ga ku kpuyo yo, na ngbarago pusiapusia kpotoyo yo tipa gu weneringise nga gu Yekova ayugu fu Dawidi na fu Soromo, na fu aYisaraere nangia gako aboro a.

¹¹Were Soromo anyasi pa ga Yekova bambu na pa ga bakindo bambu. Agu apai dunduko naye ku kpoto Soromo yo ko mangi he tipa ga Yekova bambu na tipa gako bambu a, ko amangi he amanga wenengaĩ.

¹²Yekova ki yugu tiko fu Soromo yuru ki ya fu ko: “Mi gi ga kpetambuahe, mi sia gi ba re fere tipa du ni bambu motumo.

¹³Ka mi kisi ngbangbaturũ yo ka mai na nga ya, watadu ka mi ya ayere ye ka rita aũ gi ringara re, watadu ka mi kedi kere kaza gberãngbi ku dagba gimi aboro,

¹⁴ka gimi aboro nga agu yo i ayambu yo ti rimore, nikaumbasi tiyo ka kpara ka gbata kpakpure, ki sa tiyo ti gayo gbegberẽ apai, mi nikagia ha ngbangbaturũ yo, ki vu yo ti gayo ingapai ki batasi gayo ringara.

¹⁵Were bangire azá, mi adéga ture ka gia gu kpetambuahe i ka akpara rogo gi ba re.

¹⁶Bambiko awere mi sia gi ba re ki kpara ha ya rimore adú yo nye anye kindi; bangire ki du ti ni dedede na kpotore yo a.

¹⁷Tipa ro tigamo, ka mo atá bara bangire wa Dawidi nga bamo anata, ki nimangi gu pai nga gu rugu mi ro na ni ki nika kuti gimi rugaapai na gimi asarangbanga,

¹⁸mi anyákasa gu mbatabakindo nga ga ga ngbi, ku sangba gu pai yo mi akido ho fu Dawidi nangia bamo, niya, ‘Mo azánga nga boro ka du ni bazogo ku ri aYisaraere te.’

¹⁹“Ono ka oni sa tironi ki mbu gimi rugaapai na gimi arugute nga gu moi mi bara bangironi, ki ndu ka manga pa kura ambori ki niirisi he,

²⁰mi amófa roni na tararoni rogo gi ringara re fu mi fu roni. Gi bambu re a, nga gu kpara mi he tipa rimore, mi abá ha aba ku sa yo bara bangire, mi amánga ha si du wa ũsanza ni ũrepai a dagba angbatunga aboro dunduko.

²¹Na pa gi bambu re du ni irisiirisi he, agu aboro nikasusa pati he i akíga akiga, ki niya, ‘Tipagine Yekova amangi gi ringara re ti ni were na gi bambu re a?’

²²I akaraga ha ki ya, ‘Bambiko i ambu Yekova, nga ga abayo Mbori nakusi yo ringara Ezipeta yo, ki ka kuti kura ambori, ki irisi he yo ki nimangi pa ha; si du ko aye ti ni na gi gbigbita pai re ku ri yo.’ ”