Read zande 2 Pekapai 8 Bible Online

2 Pekapai 8 - zande bible

2 Pekapai 8

¹Si ki ta du wa gere ti digida garã 20, nga agu agarã Soromo adua ga Yekova bambu rogo ho, na gako bambu a,

²ya agu abaakporo Urama afu fu Soromo, Soromo ki mbakadi he berewe, ki ya awiri aYisaraere niraki yo.

³Soromo ki ndu ku Amata-soba yo, ki di he.

⁴Ko ki dua Tadamora ngbakungba yo na abaakporo baigaahe dunduko nga gu ko adua Amata yo.

⁵Ko ki dua Bete-orona a naadu ku ngbi yo, na gu Bete-orona naadu ku pa di yo nga abaakporo ngapa, na ndugu, na angbadimoho, na angbongbo ti ni a,

⁶na Barata, na abaakporo baigaahe dunduko nangia ga Soromo, na abaakporo tipa gako angbagidavura, na abaakporo tipa gako abanduri afarasi, na agu abambu dunduko Soromo akpi nyemu ka dudua ha wa ngba ha ti ko Yerusarema yo, na ku Rebanona yo, na ku rogo ringara gako zogarago dunduko.

⁷Ono tipa pa agu aboro nanye nga ga aEto yo, na aAmoro, na aPereso, na aIvo, na aYebuso, nga agu yo nangia nga aYisaraere ya,

⁸agu atitayo nanye rogo gu ringara re, nga agu yo awiri aYisaraere anyasa nga yo ya―i Soromo azi yo ni aborosunge, i du ho daku areme.

⁹Ono Soromo azia nga awiri aYisaraere ni aborosunge wa sa te; ono i adu ni aborosovura, agu yo ni abaakumba ku ri gako abarutirivura, na abazogo gako angbagidavura, na gako abanduri afarasi.

¹⁰Agi aboro re naadu ni abaakumba ku ri ga Bakindo Soromo abarumbatayo, wa aboro 250, nga agu yo naadu ku ri aboro.

¹¹Soromo ki ye na wiri Faro rogo gu bakporo nga ga Dawidi ku rogo gu bambu ko adua tipa ri, mbiko ko aya, “Diare aríka nga rogo gu bambu nga ga Dawidi nangia bakindo aYisaraere te, bambiko agu aba yo ga Yekova sanduki aye ku ho ni, du ni kparakpara ziazia aba.”

¹²Soromo ki tumo ni zozo amotumo fu Yekova auru ga Yekova bamotumo nga gu ko adua ha barangba mbaraza,

¹³rengbe na kina gu sunge i aringbisi he tipa auru ni ba sa sa, ki nitumo kina kuti gu rugute Mose arugu he tipa rago asabiti, na tipa rago fogo adiwi, na tipa ringbisiringbisi apumbo bara biata na agarã ― nga pumbo gu kpokuta adu nga na agbooro ti ni ya, na pumbo nga ga aposo, na pumbo nga ga abasura.

¹⁴Ko ki ringbisi pai kuti gu rugapai nga ga Dawidi nangia bako, ki ringbisi gu kparakakparaka sunge nga ga aboromotumo tipa gayo mangapai, na aRevi tipa gayo sunge nga ka tambua he na ka manga pai bara bangiri aboromotumo rengbe na gu sunge i aringbisi he tipa auru ni ba sa sa, ababanda angbadimo a ti gayo arago ti angbadimo ni ba sa sa; bambiko wo Dawidi ga Mbori kumba arugu he.

¹⁵Ka i aguari nga pati ga bakindo rugute ko afu fu aboromotumo na fu aRevi tipa gu pai re ya watadu tipa pa aũkumuko a ya.

¹⁶Were gu sunge nga ga Soromo adu ni mbakadimbakadi he, tona ti gu uru maa mburu ga Yekova bambu daho si anyasi ni. Si du ga Yekova bambu anyasi ti ni wenengaĩ.

¹⁷Soromo ki ndu ku Esiona-gebere yo na ku Erota yo ti ngba gango baime, rogo ringara Edome.

¹⁸Urama ki kedi abaakurungba fu ko ku be avuruko na ku be abanginzo nangia agu yo narugu tiyo na pa baime wenengaĩ, i ki ndu na avuru Soromo ku Ofĩri yo, ki rogo dahabu yo barõaha adu wa akiro 26,550 ki ye na ni koyo du Bakindo Soromo ni.