Read zande 2 Pekapai 9 Bible Online

2 Pekapai 9 - zande bible

2 Pekapai 9

¹Ho gu nakindo naazoga ringara Seba agi pa pande Soromo ni, ri ki ye ku Yerusarema yo, ka asada Soromo na gari nyanyaki sasana ahe na gari nyanyaki aboro ni dungu yo gbe na akameri natindi wene fuõngua na badungu dahabu gbe na kikiipa ambia a. Ho ri ada ni ku Soromo yo, ri ki fura na ko tipa agu apai dunduko nadu berári yo.

²Soromo ki karaga pa gari sasana ahe fu ri dunduko; pai adu nga ho nagasi Soromo ka ko ahe gumba pa ha fu ri te.

³Ho nakindo Seba abi ga Soromo tatamana ni, na gu bambu ko adua,

⁴na gu riahe i anamaa ha ku auru gako mbisa, na waĩ gako amoyambu asunga pati he, na waĩ gako aboro amanga pa ko na pa gayo aremu, na pa gako abafuainga a, na gayo aremu, na gu gako zozo amotumo ko afu he ku rogo ga Yekova bambu, ngbari ki zere azera gbodo.

⁵Ri ki ya fu bakindo, “Ndikidi rengo nga gu pai mi agi rogo gi ringara tipa gamo mangaapai na pa ga tatamana,

⁶wa si avura du wo mi aida nga paha te da kina ho ye mi ni ki bi he ni bangire; mo ngére, i agumba nga pa ga tatamana fere dati bebere he te; pandero susi gu mi agi he.

⁷Betedi aboro nga avururo! Betedi aboro nga gamo amoyambu nga agu yo ninaru ku bara bangiro dedede, ki nibi ga tatamana!

⁸Sambuahe dú fu Yekova nga ga Mbori, nga gu ko ngba mo ti ko gbe, namoi ro ku auru gako mbatabakindo, mo du ni bakindo fu Yekova nga ga Mbori! Bambiko wa ga Mbori akpi nyemu aYisaraere ka nyakasa yo nye anye kindi, si du ko amoi ro ti ni ni bakindo ku ri yo, mo nimangi rurupai ki nisapu ngbanga ni ruru he.”

⁹Ri ki fu dahabu fu bakindo barõaha adu wa akiro 7,080, na wene fuõngua ni bakere he, na kikiipa ambia. Ngbatunga fuõngua adu nga ho mbata wa gu nakindo naazogo ringara Seba afu fu Bakindo Soromo te.

¹⁰Avuru Urama a na agu amoyambu nga ga Soromo yo, naaye na dahabu Ofiri yo, i aye na ngua aruguma na kikiipa ambia.

¹¹Bakindo ki mangi ababita rogo gu ngua aruguma re tipa ga Yekova bambu na ga bakindo bambu, na anzenze na akindondo fu abayango. I abi nga ahe wa gure mbata rogo ringara Yuda te.

¹²Bakindo Soromo ki fu agu ahe dunduko fu nakindo Seba ri akpi nyemu he, nga agu ahe ri asana he tipa ha dũ, susi gu ri aye na ni fu bakindo. Ono ri akaraga tiri ki ga ku rogo gari ringara, ri na gari amoyambu a.

¹³Were gu dahabu naaye koyo du Soromo ni rogo garã sa, barõaha adu wa akiro 39,294,

¹⁴ku ri gu naye be arika ababagiahe. Abakindo naadu ku ri angbatunga agu aboro dunduko, na abairaairangbi aye na dahabu na feda fu Soromo a.

¹⁵Bakindo Soromo ki mbakadi bakikii vurakube 200 na takitaki dahabu; barõa takitaki dahabu tipa bakikii vurakube ni ba sa sa adu wa akiro bawe.

¹⁶Ko ki mbakadi vurakube 300 ni takitaki dahabu, barõa dahabu tipa vurakube ni ba sa sa adu wa akiro biata. Bakindo ki moi he ku rogo Bambu Birengua Rebonona.

¹⁷Ku ri gere bakindo ambakadi bakere mbatabakindo ni rindimbarã, ki dadi kpotoho na gigiri dahabu.

¹⁸Badakpa ti mbatabakindo adu nga tangaratangara bandue sita na gbada ndue ni dahabu, i adika ha kuti mbatabakindo, basunga adu na bamaabe ti ni ku bani na ku bani, kpia abahu ki rundu ue pati bamaabe,

¹⁹kpia abahu 12 ki rundu ti badakpaha ti tangaratangara bandue sita, ku bani na ku bani. I amanga nga he wa gere rogo gu kura ngbi a wa sa te.

²⁰Ga Bakindo Soromo ainga adu ni kina dahabu dunduko, na agu aũsunge naadu rogo Bambu Birengua Rebonona, si adu ni kinaku gigiri dahabu a; bambiko i ageda nga feda wa he ti rago Soromo te.

²¹Bambiko ga bakindo abaakurungba nanandu ku Tarusisa yo na avuru Urama; agu abaakurungba Tarusisa yo anaye bara sa fuo garã biata, si ki niye na dahabu, na feda, rindi ambarã, na anya angua, na agu abaazire nga apavo.

²²Si du ga Bakindo Soromo kumuko na gako tatamana a susi ga kura abakindo dunduko du auru kpotosende no.

²³Abakindo auru kpotosende no dunduko ki idi ka ye ku bara bangiri Soromo, ka gia pa gako tatamana, nga gu Mbori afu he fu ko ku rogo gako berã.

²⁴I ni ba sa sa ki niye na gayo gamaahe, aũsunge ni feda, na aũsunge ni dahabu, na aremu, na aũvura, na wene fuõngua, na afarasi na abaadongi, wa i aringbisi pa ha na garã na agarã.

²⁵Soromo adu na bambu tipa afarasi wa 4,000 na tipa angbagidavura, abanduri afarasi ki du wa 12,000, nga agu yo ko amoi yo ku rogo agu abaakporo i akpara ha tipa angbagidavura na ku pati bakindo Yerusarema yo a.

²⁶Ko ki zogo abakindo dunduko tona ti gu di nga Ferata da kuti ga aFereseto ringara, na sa gu bangbandarago nga ga Ezipeta.

²⁷Ti rago Bakindo feda adu Yerusarema yo wa kina zekere mbia, na angua kedara ni ngenge he wa kina angua wa vurumo ngboongboorago yo.

²⁸I ki ye na afarasi Ezipeta yo fu Soromo na rogo aringara dunduko.

²⁹Were kura ga Soromo apai, bambata ha na yangara ha, ati si ni keke he rogo gu kitabu pekapai nga ga Natana nangia nebi, na rogo gu gumbapai nga ga Aiya boro Sirona, na rogo gu yuguyugupai nga ga Ido nangia babiapai tipa Yerobama wiri Nebata?

³⁰Soromo ki zogo rago Yerusarema yo ku ri aYisaraere dunduko tipa garã 40.

³¹Soromo ki kpi fuo atitako, i ki kpisidi ko rogo ga Dawidi bakporo nangia bako; Rabama nangia wiriko ki zogo rago ku ba ko.