Read zande Ezara 1 Bible Online

Ezara 1 - zande bible

Ezara 1

¹Ti gu bambata gará nangia ga Kurese nangia bakindo aParaso, gu ga Yekova pai naadu ngba Yeremaya, ya si du ni digisidigisi he, si Yekova azingisi toro Kurese ti ni nangia bakindo aParaso. Ko ki taki pande he rogo gako ngbi dunduko, ki ke he ku waraga yo a, niya:

²“Ya Kurese bakindo aParaso wẽ, Yekova nga Mbori ngbangbaturũ, ko afu angbi zegino fere dunduko. Ko arugu re mi dua bambu fu ko Yerusarema yo, du Yuda yo.

³Gu ni du dagba roni yo nga gako aboro, gani Mbori du na ni, ni ndu ku Yerusarema du Yuda yo, ki dua ga Yekova bambu berewe nga ga Yisaraere Mbori ko nga Mbori du Yerusarema yo.

⁴Agu yo nye rogo gu ba i nasunga rogo ho, agu aboro du rogo gayo rago ni ba sa sa, i niunda ni na feda, na dahabu, na ahe, na anya, ku ri gu gamunihe i afu he ni nyemuhe ti yo zaza tipa gu ga Mbori bambu du Yerusarema yo.”

⁵Agu abaakumba ki guari nadu ku ri ngbatunga abayo nga ga aYudo na Benyamina, na aboromotumo, na aRevi, na agu yo dunduko Mbori azingisi toroyo i ndu ka dua ga Yekova bambu berewe nadu Yerusarema yo.

⁶Agu yo nadu pati yo dunduko kirikiri i ki unda yo na aúsunge nga ga feda, na dahabu, na ahe, na anya, na agu ahe kii geno ho gbe, ku ri gu aboro anafu ni gu nyemuhe nadu ti yo.

⁷Kurese nangia bakindo akusi agu aúsunge nga ga ga Yekova bambu a, nga gu Nebukadenesara arogo ho Yerusarema yo, ki mamoi he ku rogo ga gako ambori bambu yo.

⁸Kurese nangia bakindo aParaso akusi kina agu ahe re ku be Miterudata nangia babandaamará, ki gedi he ku be Sesebasara nangia bazogo Yuda.

⁹Gere nga gedigedi he: akurungbu dahabu wa 30, akurungbu feda wa 1,000, asape 29,

¹⁰ainga dahabu 30, kura ngbatunga ainga feda 410, na kura aúsunge 1,000.

¹¹Agu aúsunge nga ga dahabu na feda si adu dunduko wa 5,400. Sesebasara ki ye na agi ahe dunduko re, ho i aye ni na agu aboro ku Yerusarema yo naadu ni zizi yo ku Babera yo.