Read zande Ezara 4 Bible Online

Ezara 4 - zande bible

Ezara 4

¹Ho avura aYudo agi he ni na avura Benyamina ya agu zizi yo nayega nadua yekaru tipa Yekova, nga ga aYisaraere Mbori,

²i ki ye ki mbedi koyo du Zerubabera ni, na koyo du agu abaakumba ni nadu ku ri angbatunga abayo, ki ya fu yo, “Ani dua ha na oni, bambiko ani nagbata gaoni Mbori wa kina roni. Ani natumo fu ko tona ti rago Esaradona nangia bakindo aAsuro, nangia gu ko naaye na ani kono.”

³Ono Zerubabera na Yesua na gu kura abaakumba nadu ku ri angbatunga abayo Yisaraere yo, i ki ya fu yo, “Gaoni pai nga ha na ani tipa dua bambu fu gaani Mbori wa sa te. Ono kina rani nikadua ha fu Yekova nga ga aYisaraere Mbori, a wa Bakindo Kurese arugu rani nga bakindo aParaso.”

⁴Aboro gu ringara re ki nirungburasi kpoto aboro aYudo yo, ki nigundesi yo tipa dua ha,

⁵ki ngbe abarugupai kuti yo, ka dingisa yo pati gayo sunge, ti rago Kurese dunduko nangia bakindo aParaso, ki da ti kina gu rago Darayawesa azogo rago nangia bakindo aParaso.

⁶Were ti ga Asuerose zogarago, ho ko atona zoga rago ni, i ake pa soapai kuti agu aboro naasunga Yuda yo na Yerusarema yo.

⁷Were ti rago Arutasasata, aBisirama, na Miterudata, na Tabere na agu akurayo dunduko ake pai fu Arutasasata, nangia bakindo aParaso. I ake gu waraga re rogo gu kekepai nga ga aSurio, gedigedi he adu rogo pa Suria a.

⁸Reuma nangia barumbatayo, na Simesai nangia bakeapai ake waraga wa gere kuti Yerusarema fu Arutasasata nangia bakindo:

⁹Reuma nangia barugupai ake waraga, na Simesai nangia bakeapai, na agu akura yo; na aDino, na aAfarusateko, na aTarupero, na aAfaruseka, na aArukava, na aBabero, na aSusanaka, na aDea, na aErama,

¹⁰na gu kura arikaaboro nga agu yo Asenapara aye na yo nangia bakere boro ni weneringiko, ya i sungu rogo abaakporo Somorona yo na rogo gu ringara du ku mbiti di yo.

¹¹Gere nga kpia gu kekepai i akedi he “Fu Arutasasata nangia bakindo: Gamo amoyambu nga agu aboro du ku mbiti di no ke pai foro.

¹²Bakindo, mo ini he ya agu aYudo naguari yo du mo ni ki yega kono du ani ni Yerusarema no, i nadua gu gbegberẽ bakporo samungu re berewe, i ima nyasa ngapa bakporo, ki nimbakadi amburuhe berewe a.

¹³Bakindo, mo ini he awere, ya, ka i dua gi bakporo re berewe, ki nyasi dua ngapa bakporo, i aru nga he, ki tumo gene ki nifu mará ngbeti a te, si nikagbarasa pa ga bakindo mará.

¹⁴Wa ani nari ga bakindo tikpo tie, si arengba nga bangirani ani bi gu pai ka payasi ga bakindo pai te, si du kedi ani pa ha ti ni ka yugo pa ha fu bakindo.

¹⁵I gbáta pai rogo kitabu tingida pa agu apai nangia ga abamo. Si du mo ka bi he ti ni rogo kitabu tingidapai, ki ini he ya gi bakporo re nga bakporo samungu, naagbarasi pa abakindo na angbi, wa i asa mungu rogo ho bakuru yo. Si du i agbarasi gi bakporo re ti ni tipa gi pai re.

¹⁶Ani nayugo pa ha fu bakindo, ya, ka i dua gi bakporo re berewe, ki nyasi dua ngapa bakporo, mo adu nga na ringara ku mbiti di no te.”

¹⁷Bakindo ki kedi karagapai ki ya, “Fu aReuma nangia barugupai, na fu Simesai nangia bakeapai, na fu agu akura yo naraka Somorona yo, na rogo gu kura ringara nadu ku mbiti di yo, Oni du zezeredi.

¹⁸I agedi gu waraga oni akedi he fu rani ku bangire nzunzu.

¹⁹Mi ki ringbisi pai, i ki gbata pa ha, ki bi he ya gu bakporo re asa mungu kuti abakindo bakuru yo, pa samungu adu yo na tabura a.

²⁰Agu abakindo nadu na tandu apai dú i nanazoga Yerusarema, na gu ringara nadu ku mbiti di yo dunduko a. Aboro anarú he fu yo, ki tumo gene, ki nifu mará ngbeti fu yo a.

²¹Si du oni rugu he awere, ya, agi aboro re i mbu sunge, ka i dua nga gu bakporo re berewe ya, da kina ho mi ka ringbisa pa ha ni.

²²Oni bánda tironi, ka oni nyómoro nga ti za yo ya. Tipagine pai ka maa pai ti ni ki gbarasi ga bakindo pai?”

²³Ho i agedi ga Bakindo Arutasasata waraga ni ku bangiri aReuma, na Simesai nangia bakepai, na akura yo, i ki ndu ni ngará ku Yerusarema yo fuo aYudo, ki sosodi yo ni ome i mbu sunge.

²⁴Sunge ga Mbori bambu nadu Yerusarema yo ki ru. Si ki ru ku ho ki da ti gu ue gara zogarago nangia ga Darayawesa nangia bakindo aParaso.