Read zande Ezara 6 Bible Online

Ezara 6 - zande bible

Ezara 6

¹Darayawesa ki ru ndika, i ki gbata pai rogo bambu akitabu, yo i anaiga kikiipaahe ku ho ni Babera yo.

²I ki bi kaĩkaĩ waraga Akimeta yo, rogo gu bambu abakindo du ringara aMadaio yo, nga gu i ake apai ti ni were tipa tingida pa ha:

³“Ti gu bambata garã zogarago nangia ga bakindo Kurese, bakindo Kurese arú ndika wa gere: Tipa gu ga Mbori bambu du Yerusarema yo, i bungia gi bambu re berewe, na gu ba i anatumo auru he, i ki dua mburuhe nyanyaki gbe. I ringbisi bagizaha si ki du wa bagiza mbiribe 60, pavuruhe ki du wa bagiza mbiribe 60,

⁴gene kikindigi ambia ki du biata, gene vovo sekeseke ngua ki du sa. I fu mará tipa ha dagba gu du rogo ga bakindo baiga mará yo.

⁵Agu aúsunge du ni dahabu na ni feda nga ga ga Mbori bambu, nga gu Nebukadenesara arogo rogo yekaru yo du Yerusarema yo, ki ye na ni ku Babera no, i karaga ha berewe. I ki gasi he ku yekaru du Yerusarema yo, ki moi he kina ku rogo abaha ni ba sa sa, ku rogo ga Mbori bambu yo.”

⁶“Awere, Tatenai, nga baira abazogo ku mbiti di yo, na Setara-bozenai, na agu akuaroni nga aAfarusateko, du ku mbiti di yo, oni guari ti yo tuturu.

⁷Oni mbu za gu sunge nga ga gi bambu Mbori re. Oni idi he fu baira abazogo aYudo na ga aYudo abaakumba, i bungia gi bambu Mbori re berewe ku baha.

⁸Ku ri gi pai re mi rugu roni a na gu pai oni ka manga tipa gi ga aYudo abaakumba re tipa bungia gi bambu Mbori berewe re. Oni nifú mará ha fu agi akumba re zaza na baha, dagba kina ga bakindo mara, nga gu ruhe du ku mbiti di yo, ka i du nga na dingisaro ya.

⁹Gu zingo ahe ka manga yo si ngia paranga abaabagara, na abaakandoro, na awiri akandoro a tipa zozo amotumo fu Mbori nga ga ngbangbaturũ ko, na zende ahe, na tikpo, na imekakue na nzeme, i nifu he fu yo na uru na uru, kuti sangba agu aboromotumo du Yerusarema yo, ka si kpa nga wa sa ya.

¹⁰I ki rengbe na tumo na amotumo wene fuõhe fu Mbori nga ga ngbangbaturũ ko ki nikpari tipa unga bakindo, na tipa unga awiriko a.

¹¹Mi rú ndika a, ya gu ni ka sa gi pai re, i di ngua ti gani bambu, ki asi ni kuti ni, ki sa gani bambu ni baguguda ahe.

¹²Mbori nga gu ko namoi rimoko si nye yo, ko rogo agu abakindo ku sa yo watadu agu aboro nikataá beyo ka sa gi pai re, watadu ka gbarasa gu bambu Mbori re du Yerusarema yo. Mi nga Darayawesa rú gi ndika re. I mangi sangba ha ni ngará.”

¹³Tatenai nangia baira abazogo nadu ku mbiti di yo, na Setara-bozenai na akura yo, i ki mangi he ni ngará bambiko bakindo Darayawesa akedi pa ha.

¹⁴Ga aYudo abaakumba ki bungia ha ki re na ni gbe, bambiko gu gumbapai nangia ga Agai nangia nebi na ga Zekaraya nangia wiri Ido. I ki dua ha ki nyasi he, ku sangba gu rugute yo nga ga ga aYisaraere Mbori, na ku sangba Kurese yo, na ga Darayawesa, na ga Arutasasata nangia bakindo aParaso.

¹⁵Gi bambu ki nyasi re ti gu biata uru nga ga gu diwi nga Adara, rogo sita gará zogarago nga ga Darayawesa nangia bakindo.

¹⁶Aboro aYisaraere ki kpara gi bambu Mbori re fu ko ni ngbarago, na aboromotumo na aRevi, na gu kura zizi yo nakaraga tiyo.

¹⁷Rago kpara gi bambu re, i atumo ni abaabagara 100, na abaakandoro 200, na wiri akandoro 400. Abamemeadu 12 rengbe na gedigedi angbatunga aYisaraere ni motumo ingapai, tipa aYisaraere dunduko.

¹⁸I ki moi aboromotumo ni rikayo a, na aRevi pati gayo kparakakparaka sunge, tipa manga pa ga Mbori sunge Yerusarema yo, a wa du he ni keke he rogo ga Mose kitabu yo.

¹⁹Gu zizi aboro re nayega ki mangi pumbo susiri ti gu 14 uru nga ga bambata diwi.

²⁰Bambiko aboromotumo amongo kpara tiyo na aRevi, i ki giri dunduko. Si du i aimi awiri akandoro pumbo susiri rengbe na gu zizi aboro dunduko nayega, na tipa akura yo nangia aboromotumo na tipa yo a.

²¹Agu aboro aYisaraere nayega dagba zizi yo, i ari he na agu yo nakpara tiyo fuo yo ti gu biriko nga ga agu azangasinombori nadu ringara yo, ki gbata Yekova nga ga aYisaraere Mbori.

²²I ki mangi gu pumbo nga ga gu kpokuta adu nga na agbooro ti ni ya, na ngbarago tipa auru saba, bambiko Yekova angiisi yo. Ko asa kpoto bakindo aAsurio yo fu yo, ko nyakasi beyo tipa sunge ga Mbori bambu, nga ga aYisaraere Mbori.