Read zande Ezara 9 Bible Online

Ezara 9 - zande bible

Ezara 9

¹Ho agi apai re adu ni ni mangimangi he, abazogo ki ye kono du mi ni, ki ya, “Aboro aYisaraere, na aboromotumo, na aRevi i ata kpara nga tiyo ti aboro agi aringara te re, i namanga pai ku sangba gayo gbegberẽ asino, nga ga aKanano, na ga aEto, na ga aPerezo, na ga aYebuso, na ga aAmono, na ga aMoaba na ga aEzipeto, na ga aAmoro a.

²Bambiko i arogo agu awiriyo nga ade ni adiayo na tipa awiriyo a. Si du kparakpara ngbatungayo akodi tiyo ti ni na aboro agi aringara re. Ii, abazogo na abanyaki adu ni abangbembatayo rogo gi tindika re.”

³Ho mi agi gi pai ni re, mi asipi gi remu na gi baukadi, ki mo inangerire na maingbare a, ki nisungu na baka bangirise.

⁴Were agu yo naakio be agu apai nga ga ga Yisaraere Mbori, i ki dungura tiyo kono du mi ni dunduko, mbiko gu tindika nga ga gu zizi aboro naayega. Mi ki sungu na baka bangirise da Ii rago gu motumo nga ga nyemu.

⁵Ti i ago gu motumo nga ga nyemu, mi ki guari rogo gi rungo, na gi remu na gi baukadi ni sipisipi he. Mi ki ti ku sande ngba i rukusiire, ki taĩ bere fu Yekova nga gi Mbori.

⁶Mi ki ya: Ako gi Mbori, zee namanga re amanga, mi nauwa auwa tipa tumba mi kpakpure ku ni foro, ako gi Mbori, bambiko gaani irairaapai moi pai ku ri rani, na gaani ngbanga si sono daku ngbangbaturũ yo.

⁷Tona ti rago abarani ki da ti gi rago re ani nidu na angbanga ku rirani ni bakere he. 1 afu rani ku be agu abakindo nga ga aringara yo mbiko gaani irairaapai, ani na gaani abakindo na gaani aboromotumo, na ku be basape, na zia rani, na gbu gaani ahe, na gu wasiro du ti kpakpurani, a wa du he ni gi uru re.

⁸Ono Yekova gaani Mbori ayugu inapai fu rani ngbutuko, ka mbu bete yangara aboro fu rani i bati, ki fu ba fu rani rogo gako kparakpara rago. Gaani Mbori asi bangirani, ki ungasi rani toni wa du ani ni akanga.

⁹Bambiko ani nga akanga. Ono gaani Mbori ambu nga rani wa du ani ni akanga te. Ono ko ayugu inapai fu rani ku bangiri abakindo aParaso, ka ungasi rani, ani dua gu bambu nga ga gaani Mbori, ka bungia ha ku ri kurugbo mburuhe, na ka fu ndugu bandatise fu rani Yuda yo na Yerusarema yo a.

¹⁰“Ako gaani Mbori, awere ani aya waĩ tie fuo gi pai re? Bambiko ani ambu sangbaro,

¹¹nga gu mo arugu he ku ngba gamo amoyambu nangia anebi, niya, ‘Gu ringara oni akarima ku rogo ho ka dia ha ni gaoni, si du ni birikobiriko ringara mbiko gu wasiro nga ga agu aboro du rogo agu aringara re. I ahihisi he na gayo meteka na gayo gbegberẽ kere asino, tona ti gu ngbandaha ki da ti gu ngbandaha du ku bani.

¹²Wa du he were, ka oni fu nga awironi nga ade fu awiriyo ni adiayo ya, ka oni rogo nga awiriyo nga ade ni dere awironi a ya, ka oni nigbata nga gayo zereda na gayo wenepia nye anye kindi a ya. Si oni ka nyaka ti ni, ki ri agu ahe ngba angba ringara yo, ki mbu he ni ũkumbo fu awironi nye anye kindi.’

¹³Fuo ye agi apai dunduko re ku ri rani mbiko gaani gbigbita mangapai, na mbiko gaani ngbanga du ni bakere he, na wa mo ambusa nga rani nga gaani Mbori rengbe na gaani irairaapai a ya, ono mo afu yangara aboro fu rani wa gere,

¹⁴ani abasa sangbaro berewe ka kpamia tirani na agu aboro nanamanga gi kere gbegberẽ apai re? Mo azinga nga fu rani daho mo ka nyasa rani ni dú te? ka yangara aboro anye nga, na gu ni ka bati wa sa ya.

¹⁵Ako Yekova, nga ga Yisaraere Mbori, mo du ni ruru ro, ani nye nga gu yangara aboro nabati, a wa du ani areme. Mo ngere, ani ku bara bangiro na gaani ngbanga, bambiko mbiko gi pai re a nga boro sa rengbe na ru ku bara bangiro te.”