Read zande Nemaya 2 Bible Online

Nemaya 2 - zande bible

Nemaya 2

¹Si du wa gere ti gu diwi nga Nisana, ti ue bawe garã zogarago nga ga Bakindo Arutasasata, ho imekakue adu ni barangba ko, mi ki di imekakue ki fu he fu bakindo. Mi naadu nga na rungo ku bangiri bakindo mbata te.

²Bakindo ki ya fere, “Tipagine du kpakpuro ti ni na kina rungo, wa adu nga mo na kaza ya? Si nga kina rungo kpotose yo.” Mi ki gunde agunde gbe.

³Mi ki ya fu bakindo, “Bakindo du ni ungako nye anye kindi! Tipagine ka rungo adu nga ti ni ti kpakpure ya, wa du gu bakporo, nga ba murá atitare, ni bate, angbadimoho ki du ni gbitiri he be we?”

⁴Bakindo ki ya fere, “Gini he mo asana he tipa ha?” Mi ki kpari fu Mbori nga ga ngbangbaturũ ko.

⁵Mi ki ya fu bakindo, “Ka bakindo akpi nyemu he, ka ga moyambu ngba bangiro, mo kedi re ku Yuda yo, ku rogo gu bakporo nga ga murá atitare, mi bungia ha berewe.”

⁶Bakindo ki ya fere, “Mo ara koyo waĩ, mo ayega ni gini rago?” Nakindo asungu pati ko. Si angba ti bakindo ka keda re; mi ki ringbisi rago fu ko.

⁷Mi ki ya fu bakindo berewe, “Ka si ngba ti bakindo, i fu awaraga fere tipa agu abaira abazogo du ku mbiti Di yo, ya i idi he fere mi susi daho mi ka da ni ku Yuda yo;

⁸na waraga fu Asafa, nga babanda ga bakindo birengua, ko fu angua fere tipa mbakada awagiro angbadimo gbata nga ga bambu na ni, na tipa ngapa bakporo a, na tipa gu bambu mi ka ra tii he.” Bakindo ki idi gu pai fere mi asana ko tipa ha, bambiko be gi Mbori adu ku ri re sa wenepai.

⁹Mi ki ye koyo du agu abaira abazogo ni nadu ku mbiti Di yo, ki fu ga bakindo awaraga fu yo. Were bakindo akedi abarutiri rimbasa aborovura na mi na abanduri afarasi.

¹⁰Ho Sanebarata agi he ni nangia boro Orono na Tobiya nangia moyambu, nangia boro Amona, si ki imi ti yo gbe ya boro ye ka manga pa awiri aYisaraere.

¹¹Mi ki ye tie ku Yerusarema yo ki ra yo biata.

¹²Mi ki guari yuru, mi na bete aboro fuo re; mi agumba nga gu pai Mbori amoi ku kpotore yo mi mangi he Yerusarema yo fu aboro wa sa te. Ka nya adu nga be re a ya kina gu ru mi andu ri ru.

¹³Mi ki kuru yuru rogo Ngbadimo Ngboongboorago, ki susi pati ga Hua Guga ki da ku Ngbadimo Guguda Regboanya yo, mi ki bi angapa bakporo Yerusarema ni tiwitiwi he na angbadimoho ni gbitiri he be we.

¹⁴Mi ki susi ku Ngbadimo Gugaabi yo na sa ga Bakindo Munga a; ono gene arengba nga tipa gu nya mi asungu auru ru u susi te.

¹⁵Mi ki ta ndu yuru pavuru wiridi nimakia pa ngapa bakporo; mi ki karaga tire ki rimi ti Ngbadimo Ngboongboorago, ki yega.

¹⁶Abanyaki aina nga ho mi andu ku ho ni te na gu pai mi amanga a te; ka mi ata gumba nga paha fu aYudo, na fu aboromotumo, na fu airakporo, na fu abanyaki, na fu gu kura yo nikamanga sunge a ya.

¹⁷Mi ki ya fu yo, “Oni bi gu gberángbi du ani rogo ho ti gaani, Yerusarema nga kina bate na angbadimoho du ni gbitiri he be we. Oni yé tie, ani bungia ngapa bakporo Yerusarema, ka ani du nga ni agu yo i nagbarasa rimoyo tipa ha berewe ya.”

¹⁸Mi ki gumba pa gu wenepai fu yo nga be gi Mbori du ku ri re, na ga bakindo apai a wa ko agumba ha fere. I ki ya, “Ani guari tie ka dua ha.” I ki nyakasi beyo tipa gi wene sunge re.

¹⁹Ono ho aSanebarata agi he ni nangia boro Orono na Tobiya nangia moyambu, nangia boro Amona, na Geseme nangia boro Araba, i ki ta moma rani niuma he nipayasi rani niya, “Gini nga gi pai oni amanga re? Oni nasa mungu kuti bakindo?”

²⁰Mi ki karaga ha ki ya fu yo, “Gu Mbori nga ga ngbangbaturũ ko ko amanga pa rani, si du ani ka guari ti ni nga gako amoyambu ka dua ha; ono ba tipa roni Yerusarema no te, na ũkumbo na tingidapa roni a te.”