Read zande Nemaya 5 Bible Online

Nemaya 5 - zande bible

Nemaya 5

¹Akumba na adiayo ki nimo ka paa ku ari ni bakere fugo kuti awirinayo nga aYudo.

²Bambiko agu yo adu yo naaya, “Ani na awirinarani nga akumba na awirinarani nga ade, nge ani ange; i fu zende ahe fu rani, ani ri he ki du ni ungarani.”

³Agu yo adu yo a naaya, “Ani nafu gaani abino, na gaani aati bakakue, na gaani abambu i azi he be rani tipa zende ahe tipa ngbongi.”

⁴Agu yo ki du yo naaya, “Ani adi mará ni bape tipa ga bakindo rúhe tipa gaani abino na gaani aati bakakue.

⁵Wa du kpotorani wa kpoto awirinarani, awirani wa kina awiriyo; oni ngere ani nafu awirani nga akumba na awirani nga ade ni zizi yo ni akanga, agu yo dagba awirani nga ade aima da ni akanga; ome ti rani ka manga pai tipa ha te, bambiko gaani abino na gaani aati bakakue du be kura aboro.”

⁶Mi adu na zinga gbe ho mi agi gayo kpe ni na agi apai re.

⁷Mi ki wisigi pa ha ni tire, ki darĩkangu he na airakporo na abanyaki. Mi ki ya fu yo, “Oni ni ba sa sa, di marã ni mokiisa be awirinaroni.” Mi ki yambu bakere rimbasa kuti yo,

⁸ki ya fu yo, “Ani angbe awirinarani berewe nga agu aYudo i abagi yo fu arikaaboro, wa ani arengbe na ni; ono oni bagi awirinaroni i du ni bagibagi yo fu kina rani!” I ki ongo aonga kii, kura pai adu nga ngbayo a te.

⁹Mi ki ya, “Ngba nga gu pai oni amanga ha te re. Oni arengba nga ka manga pai ni gunde gaani Mbori ka za gu soapai nga ga arikaaboro nga avurarani, te?

¹⁰Ku ri gere mi naunda yo na mará na zende ahe ni bape nga ga mokiisa na awirinami na gimi amoyambu kina wo a. Mi zungadi roni, ani mbu pa dia gi marã mokiisa be yo re.

¹¹Mi zungadi roni, oni karaga gayo abino, gayo aati bakakue, gayo aati eraya, na gayo abambu, na sa dagba kama nga ga mará, na ga zende ahe, na ga imekakue, na ga nzeme fu yo kina areme, nga gu oni arogo ho be yo.”

¹²I ki ya, “Ani akaraga agi ahe re, ka ani adia nga he be yo ya. Ani amanga ha a wa mo agumba ha.” Mi ki yambu aboromotumo, i ki zunga he fere ya i amanga ha wa i akido he.

¹³Mi ki zanzia kpakpu mbosore ki ya, “Kina wo Mbori ka zanzia akumba ni ba sa sa dunduko rogo gayo bambu ku zegi yo na pati gayo sunge ka i amanga nga ha wa i akido he ya. I azanzia yo kina were ki payasi pa yo.” Gbuu dunduko ki ya, “Amina” ki nitambua Yekova. Aboro ki mangi he a wa i akido he.

¹⁴Ani na awirinami ari nga gu riahe i aringbisi he tipa baira abazogo te, kuti gará 12, tona ho i aasia pai ni fere mi du ni baira abazogo ringara Yuda yo, tona ti 20 garã zogarago ki da ti gu 32 gará zogarago nga ga Arutasasata nangia bakindo.

¹⁵Ono agu abaira abazogo naadu mbata fere arungosi aboro gbe, ki nidi riahe na imekakue be yo, na asekere feda 40 ku ri he. Gayo amoyambu ki nimangi aboro wa agbia. Ono mi amanga nga wo tigimi te, bambiko gunde ti Mbori.

¹⁶Mi ki nike na gu sunge nga ga ngapa bakporo a, mi angbe nga sende a te; gimi amoyambu adungura tiyo dunduko ku pati gu sunge re.

¹⁷Ku ri gere akumba 150 asungu pati gi mbisa riahe, nangia aYudo na abanyaki, gbia kuti agu yo naniye kono du ani ni dagba arikaaboro nanidu pati rani kirikiri.

¹⁸Were gu riahe i animbakadi tipa uru sa nangia babagara sa na wene akandoro sita; i animbakadi akondo fere a, na ngbatunga imekakue ni dungu he bara sa tipa rame bawe; ono mi asana nga yo i fu gu riahe fere i aringbisi he tipa baira abazogo te, bambiko pa du ni kanga adu ku ri agi aboro re ni nyanyaki he.

¹⁹Ako gi Mbori, mo tíngidi agu apai mangi mi dunduko tipa agi aboro re, ki fu maku fere.