Read zande Nemaya 9 Bible Online

Nemaya 9 - zande bible

Nemaya 9

¹Si ki ta du wa gere ti gu 24 uru nga ga gu diwi re awiri aYisaraere adungura tiyo ki nigina riahe na mbuzaroko ti yo, na sende ti riyo.

²Angbatunga aYisaraere akparaka tiyo ti kungba aboro dunduko, ki niru ka kusa gayo ingaapai na gu irairaapai nangia ga atitayo.

³I ki ru kina ku rogo gu ba yo ki nigedi pai rogo gu kitabu nga ga ga Yekova rugute yo nga gayo Mbori, tipa saa biata nga ga uru; tipa kura saa biata i ki kusi gayo apai ki niirisi Yekova nga gayo Mbori.

⁴AYesua, na Bani, na Kademiere, na Sebanya, na Buni, na Serebaya, na Bani, na Kenani, ki ru auru gu badakpa nga ga aRevi; ki nipoi ku ari ni bakere fugo fu Yekova nga gayo Mbori.

⁵Agu aRevi nangia Yesua, na Kademiere, na Bani, na Asabeneya, na Serebaya, na Odiya, na Sebanya, na Petaya, ki ya, “Oni ru ka irisa Yekova nga gaoni Mbori tona ti nyenye rago dati nyenye rago. I sambua taasitaasi rimoro nga gu kii paha susi maku na tambuahe dú.”

⁶Ezara ki ya: “Mo nga Yekova, kina mo du sa; mo namangi ngbangbaturũ, gu ngbangbaturũ nga ga angbangbaturũ, na rimbasa agu ahe du yo, kpotosende na agu ahe du auru he dunduko, abaime na agu ahe du rogo ho dunduko; kina mo nabanda ha dunduko; gu rimbasa du ngbangbaturũ yo nairisa ro.

⁷Mo nga Yekova, nga Mbori, gu ko nasia Abarama ki ye na ko Ura yo naadu ringara Kasada yo ki yambu rimoko nga Abarayama;

⁸mo ki bi kpotoko yo ni yososo ho bangiro, mo ki zunga he fu ko ya mo afu gu ringara nga ga aKanano fu atitako, na ga aEto ringara, ga aAmoro, ga aPereso, na ga aYebuso, na ga aGirigaso; mo digisi ga kidohe; bambiko mo du ni ruru ro.

⁹“Mo abi gu rungo nga ga abarani ku Ezipeta yo ki nigi gayo kpe pati Zamba Baime yo,

¹⁰ki niyugu agu apai i aina apai ti ni na iiriwo apai fu Faro na fu avuruko dunduko na fu aboro gako ringara dunduko, bambiko mo aini he ya i amangi pai ni ruka fu abarani. Rimoro ki ye ka du ni bakere he, wa du he areme a kindi.

¹¹Mo ki kparaka baime barangba yo, i ki si bebere baime kina ri ugusende; mo ki bafu agu yo naado fuo yo ku dudungura aime yo, wa mbia ku rogo bakere baime.

¹²Mo angbe ku mbata yo fu yo rogo bakamikami dubo uru, na rogo bakamikami we yuru ka hasa rago fu yo ngba gu gene i ka andu ngba ha.

¹³Mo azorõ ku ri Bagangara Sinai, mo asungu ngbangbaturũ yo ki fura na yo ki fu ruru pa sarangbanga fu yo, na ndikidi arugute, na wene rugapai, na sangbaro,

¹⁴mo ki yugu pa ga ziazia sabiti fu yo ki nirugu yo na sangbaro na gamo arugaapai na rugute a ku ngba Mose nangia ga moyambu.

¹⁵Mo ki nifu riahe fu yo ngbangbaturũ yo tipa gayo gomoro ki nikusi ime fu yo mbia yo tipa gayo gomoro ime, ki nirugu yo ya i rimi ku rogo gu ringara mo azunga he tipa ha ya mo afu he fu yo i di he ni gayo.

¹⁶“Ono i na abarani amangi pai ni ruka ki nyakasi riyo, i adega nga tuyo ka gia sangbaro te.

¹⁷I aka pa gia sangbaro, i atingida nga pa gu gamo iiriwo apai mo amangi dagba yo a te; ono i anyakasi riyo, na wa i asa mungu i asia barumbatayo ko karaga yo sa du ni akanga berewe ku Ezipeta yo. Ono mo nga Mbori mo du zaza tipa vu aboro, du na weneringise na inapai, aipo nga na zinga ya, ga weneringise du kpaima, mo ambu nga yo te.

¹⁸Zavura ho i ambakadi kpia wiri bagara ni fu yo na zaragasizaragasi marã ki ya, ‘Gere nga gu Mbori nakusi roni Ezipeta yo,’ ki nigberẽ ngbayo yo gbe.

¹⁹Ono mo ambu nga yo ngbakungba yo te mbiko ga bakere nunga; bakamikami dubo aguari nga ba riyo uru te, si angbe ku mbata yo fu yo ngba gene, bakamikami we yuru a te si ahasi rago fu yo ngba gu gene i andu ngba ha.

²⁰Mo afu ga wene Toro fu yo a ko rugu yo. Mo aka nga na ga manu a ngbayo a te, mo ki fu ime fu yo tipa gayo gomoro ime.

²¹Mo anasongoda yo tipa gara 40 ngbakungba yo, he akpa nga be yo te; gayo aroko akpataka nga te ka nduyo ahi nga a ya.

²²Mo ki fu angbi fu yo a na aboro, mo akparaka ha ni ringbisiringbisi he ni gayo; i adi ringara Esebona ni gayo be Siona nangia bakindo ho, na ringara Basana be Ogo nangia bakindo ho.

²³Mo azugasi awiriyo a wa akerekuru ngbangbaturũ yo, mo ki ngbe fu yo ku mbata yo ku rogo gu ringara mo agumba pa ha fu abayo, ya i arima koyo ka dia ha ni gayo.

²⁴Si du atitayo andu ki di gu ringara re, mo ki kiti vura aKanano nanaraka rogo gu ringara re barangba yo, ki fu yo ku be yo, na gayo abakindo na aboro ringara, ya i mangi gu pai na yo i aida ka manga ha.

²⁵I ki rogo abaakporo ngapa na ringara ida riahe, ki rogo agu abambu nahi ahi na wene ahe dunduko ni gayo, na getekegeteke agugaabi, na aati bakakue, na aati eraya na dungu agu angua nazuka rindihe gbe; i ki ri he, ki nimbiki ki nikindigi, ki nisambua tiyo mbiko ga weneringise.

²⁶“Ono i abasa sangbaro ki sa mungu kuti ro ki ba ga rugute ku gii yo yo ki niimi gamo anebi, nanafuga pai fu yo ka karaga yo berewe foro. I agberã ngbayo yo gbe.

²⁷Si du mo afu yo ku be avurayo ti ni, i rungosi yo; ho rungo amangi yo ni i akpari foro mo ki gi payo ngbangbaturũ yo; mo ki fu abatasi fu yo ku sangba ga bakere nunga naabatasi yo be avurayo.

²⁸Ono fuo bi yo zereda i amangi gbigbitapai ku bara bangiro berewe, mo ki mbu yo ku be avurayo, i zogo yo azoga; ono ho i akaraga tiyo ni ki nikpari foro mo anigi fugoyo agia ngbangbaturũ yo, mo anabatasa yo ni dungu he ku sangba ga nunga yo.

²⁹Mo ayugu dezirepai fu yo bambiko mo aidi ka karaga yo ku pati ga rugute berewe. Ono i animangi pai na enda ka i adega nga tuyo ka gia sangbaro ya, ono i aingi kuti gamo asarangbanga, nga gu nafu unga fu gu boro namanga sangbaha, i asa giiyo ki nyakasi riyo ka i agia nga sangbaro ya.

³⁰Ono mo ahi pai fu yo tipa dungu agarã, ki niyugu dezirepai fu yo be ga Toro ku ngba gamo anebi; ono i adega nga tuyo ka gia ha te. Si du mo ki fu yo ti ni ku be aboro nga ga agu aringara re.

³¹Ono mo anyasa nga yo dunduko te mbiko ga bakere nunga, mo ambu nga yo a te; bambiko mo nga Mbori du na weneringise na inapai.

³²“Wo du he gaani Mbori, nga gu bakere iiriwo Mbori, du na tandu apai dú, nga gu Ko naka kuti pa mokido na weneringise, gu fudifudipai dunduko naye ku ri rani, na ku ri gaani abakindo, na ku ri gaani abazogo, na ku ri gaani aboromotumo, na ku ri gaani anebi, na ku ri abarani, na ku ri gamo aboro dunduko, tona ti rago abakindo aAsurio ki da ku areme, ka si du nga ni toni he ku bara bangiro ya.

³³Ono mo amangi pai ni ruru he tipa agu apai dunduko naaye ku ri rani, mo amangi apai nzunzu, ani tigaani amangi pai gbegberẽ;

³⁴gaani abakindo, na gaani abazogo, na gaani aboromotumo, na abarani aka nga kuti ga rugute a te, i adega nga tuyo ka gia sangbaro na ga dezireapai nga gu mo arugu yo na ni te.

³⁵1 amanga nga pa ro rogo gayo ngbi nga gu mo afu fu yo ni ga bakere weneringise te, na rogo gu ringara idahe du riwara mo afu ku barangba yo a te; i asa nga tiyo ti gayo gbigbita mangaapai a te.

³⁶Mo ngere, areme ani du ni akanga. Gu ringara mo afu he fu abarani i ri gaha zuzuhe na gu wene ahe du rogo ho, mo ngere, ani du ni kina akanga rogo ho.

³⁷Si nazu gbe fu agu abakindo mo amoi yo ku ri rani bambiko gaani ingaapai; i nazoga bororani a na gaani anya wa si angba ti yo, ani du rogo bakere fudifudipai a.”

³⁸Ani naru ruru ndika bambiko agi apai re dunduko, ki nike pa ha, gaani abazogo, na gaani aRevi, na gaani aboromotumo nake fuo beyo ti ni.