Read zande Esetere 2 Bible Online

Esetere 2 - zande bible

Esetere 2

¹Fuo agi apai re, ho ga Bakindo Asueroseerá azere ni, ko ki tingidi pa Vaseti, na gu pai ri amangi, na gu ndika i arú tipa ri.

²Agu avuru bakindo nanamanga pa ko i ki ya fu ko, “I gbáta wene paranga ngasu ade tipa bakindo.

³Bakindo moi abanyaki rogo aringara dunduko rogo gako ngbi, i dúngura wene paranga ngasu ade dunduko ki ye na yo ku bakumba bakporo no nga Susana, ku rogo ga ade bambu, ku tii be Egai nangia vuru bakindo ni babanda ade. I fu gayo aúgirisati fu yo.

⁴Gu ngasu de nikangba bangiri bakindo, ri ki du ni nakindo ku ba Vaseti.” Gi pai re ki ngba bangiri bakindo, ko ki mangi he a wo.

⁵Boro Ebere adu bakumba bakporo Susana yo rimoko angia Morudekai, nangia wiri Yaira, Yaira angia wiri Simi, Simi ki ngia wiri Kisi, ni boro Benyamina.

⁶Ko i adi ko Yerusarema yo na gu zizi aboro i andu na yo na Yekonya nangia bakindo aYudo, nangia gu ko Nebukadenesara bakindo aBabero aga na ko ni zizi ko.

⁷Morudekai nanambu ti Adasa, nangia Esetere, ni wiri andoko, bambiko bari na nari adu nga ti ni te. Gu paranga de re, ri angba gbe, ngbanyari ki susi. Ho bari akpi ni na nari, Morudekai ki di ri wa wiriko.

⁸Ho i agi pa ga bakindo rugute ni na gako ndika, na ho dungu paranga ade adungura tiyo ni ku bakumba bakporo Susana yo ku tii be Egai, i ki di Esetere ku bambu bakindo yo a, ki fu ri ku be Egai, nangia babanda ade.

⁹Gi paranga de re ki ngba ti Egai gbe, ko ki yugu weneringise fu ri. Ko ki fu gari aúgirisati fu ri ni ba sa, na bete riahe du tipa ri, ki fu siasia paranga ade saba fu ri rengbe tipa ri dagba ga bakindo aborokporo. Ko ki fu gu ba fu ri ngba ki susi rogo ga ade bambu yo na tipa gari paranga ade a.

¹⁰Ono Esetere ayugo nga pa ngbatungari na pa agumeri a te, bambiko Morudekai arugu ri ka ri yúgu nga pa ha ya.

¹¹Morudekai ki nita na uru pangba gu vurukporo naadu pati ga ade bambu, ka ruga tiko na pa Esetere, na pa gu pai dũ tipa ri.

¹²Ho rago ada ni tipa paranga de ri rimi koyo du Bakindo Asuerose ni, fuo mbakada ri tiri tipa diwi 12 a wa rugute adu tipa ade, bambiko gayo rago girisati adu wa gere: tipa diwi sita i anambakada tiyo na gu nzeme nga ga manemane, tipa kura diwi sita na wene fuõahe, na agu ahe tipa girisa ade a―

¹³paranga de anindu koyo du bakindo ni wa gere: gu he ri akpi nyemu he, si i afu he fu ri ri kuru na ni rogo ga ade bambu yo, ki ndu ku rogo ga bakindo bambu.

¹⁴Nyemu ri andu, wiso ri ki karaga tiri ku rogo gu ue bambu nga ga ade ku tii be Sasegara, nangia vuru bakindo nanabanda ga bakindo adebadia. Ka ri arima nga koyo du bakindo ni berewe ya, kina gu ka ri ngba ti bakindo, i ki yambu ri ti rimori.

¹⁵Ho ga Esetere rago ada ni, nangia wiri Abiyaira nangia ando Morudekai, Morudekai ambu ti ri wa wiriko, ri rimi koyo du bakindo ni, ri aida nga na aumbakadatise te, kina gu Egai aasia pa ha nangia vuru bakindo, ni babanda ade. Esetere angba bangiri agu yo dunduko naabi ri.

¹⁶Si du i andu na Esetere ti ni koyo du Bakindo Asuerose ni ku rogo gako bambu bakindo ti bawe diwi, nga gu diwi nga Tebete, ti saba gará gako zogarago.

¹⁷Bakindo ki kpi nyemu Esetere ki susi kura ade dunduko. Ri ki bi inapai be ko ki ngba bangiriko ki susi ngasu ade du. Si du ko amoi kpakpari nakindo ku riri yo, ki sa ri ni nakindo ku ba Vaseti.

¹⁸Bakindo ki mbakadi bakere pumbo tipa gako abazogo dunduko na avuruko, ni pumbo tipa Esetere. Ko ki fu rago ongoda rogo gako angbi, ki fu gamahe a wa pa ga bakindo weneringise nidu.

¹⁹Ho paranga ade adungura tiyo ni ni ue he, Morudekai asungu pa ngbadimo ga bakindo kporo.

²⁰Esetere ata yugo nga pa ngbatungari na pa agumeri te, a wa Morudekai arugu ri. Bambiko Esetere anagia sangba Morudekai kindi, wa kina gu ri agia ha ho ko ambu ti ri ni.

²¹Ti gu rago re, ho Morudekai asungu ni pa ngbadimo ga bakindo kporo, avuru bakindo ue, nangia aBigatana na Terese, nanidu dagba ababanda ngbadimo, i ki zingi ki niasadi ka imo Bakindo Asuerose.

²²Morudekai ki ini gi pai re, ko ki yugu pa ha fu Nakindo Esetere. Esetere ki kusi he fu bakindo ti rimo Morudekai.

²³Ho i awisigi gi pai ni re, i ki bi he ya rengo nga ha. I ki imi yo ue dunduko ni asa yo ti ngua. I ki ke pa ha rogo Kitabu Pekapai ku bara bangiri bakindo.