Read zande Esetere 3 Bible Online

Esetere 3 - zande bible

Esetere 3

¹Fuo agi apai re bakindo Asuerose ki moi irisa ku ri Amana nangia wiri Amedata ni boro Agaga, ki moi ko ku mbata yo, ki moi basunga fu ko ku mbata yo fu agu abazogo dunduko naadu na ko.

²Agu avuru bakindo dunduko nanasunga ngbadimo ku bakindo yo, i ki nitumusa ku sende, ki nifu irisa fu Amana, bambiko wo bakindo arugu yo tipa ko. Ono Morudekai anatumusa nga ku sende, ki nifu irisa fu ko te.

³Agu avuru bakindo nasungu ngbadimo ku bakindo yo, i ki ya fu Morudekai, “Tipagine mo nagu auru ga bakindo ndika ti ni?”

⁴Si ki ta du wa gere, ho i agumba pai ni fu ko na uru, ka ko agia sangba yo ya, i ki gumba ha fu Amana, ka bi si ngia ru ga Morudekai apai aru. Bambiko ko agumba ha fu yo ya boro Ebere nga ko.

⁵Ho Amana abi he ni ya Morudekai natumusa nga ku sende ki fu irisa fu ko te, Amana ki ere gbe.

⁶Ono si adu ni mumungo pai bangiri Amana ka taá beko kina kuti Morudekai sa. Bambiko wa i ayugu ngbatunga Morudekai fu ko, si du Amana agbata pa gbarasa aEbere dunduko ti ni nadu rogo ga Asuerose ngbi dunduko, nga kina angbatunga Morudekai.

⁷Ti bambata diwi, nga gu diwi nga Nisana, ti gu 12 gará zogarago, nga ga Bakindo Asuerose, i ki niba Purú, si wa ka i ya, ake, ku bara bangiri Amana uru na auru, na diwi na adiwi, dati gu 12 diwi nga Adara.

⁸Amana ki ya fu Bakindo Asuerose, “Ngbatunga aboro du ho ni gbandakagbandaka yo ni kparakakparaka yo dagba aboro rogo agu aringara dunduko nga ga ga ngbi. Gayo arugute du akia ti ga kura aboro dunduko. I amanga nga ga bakindo arugute a te. Si du ka i he yo wo, ga bakindo pai au nga te.

⁹Ka si ngba bangiri bakindo, i ki gumba pai tipa gbarasa yo. Mi ki fu mará taranda feda 10,000 ku be agu yo du ga bakindo apai be yo, i moi ra ku rogo ga bakindo bambu igaahe.”

¹⁰Bakindo ki di gako tongo ido ti beko, ki fu ru fu Amana nangia wiri Amedata ni boro Agaga nangia vura aEbere.

¹¹Bakindo ki ya fu Amana, “I fu gu feda mará re foro, na agu aboro re a, mo mángi yo a wa ngba ha ti ro.”

¹²I ki yambu ga bakindo abakeapai ti bambata diwi, ti rameru 13.1 ki ke pai a wa Amana arugu he dunduko fu ga bakindo abanyaki, na fu abaira abazogo ku ri angbi dunduko, na fu abazogo ngbatunga aboro dunduko, na angbi dunduko a wa keke he adu, na fu aboro dunduko rogo payo yo. I ki ke he ti rimo Bakindo Asuerose. I ki dika ha ni ga bakindo tongo ido.

¹³Awaraga ki ndu be abandu na waraga ku rogo ga bakindo angbi dunduko, ya i gbarasi aEbere, ki imi yo, ki ba tungayo aba kpakaya, paranga yo na gbinza yo a, na rukutu agude na ade, ti uru sa nga 13 uru ti gu 12 diwi, nga Adara, ki gbu gayo ahe ni zizi ahe.

¹⁴I ataki pande pa gu kekepai re fu angbatunga aboro dunduko, ki fu gu ndika re rogo angbi dunduko, ya aboro mbakadi tiyo tipa gu rago re.

¹⁵Abandu na waraga ki ndu ni ba sa kuti sangba bakindo. I ki fu gu ndika re bakumba bakporo Susana yo. Bakindo ki sungu na Amana ka mbira he, ono aboro Susana ki nibaki bangiriyo abaka.