Read zande Esetere 8 Bible Online

Esetere 8 - zande bible

Esetere 8

¹Ni kina gu uru re Bakindo Asuerose afu ga Amana kporo, nangia vura I bere fu Nakindo Esetere. Morudekai ki ye ku bara bangiri bakindo, bambiko Eseiere agumba pai fu bakindo ya gumeri nga ko

²Bakindo ki di gako tongo ido ti beko, nga gu toneo ido ko adi ru be Amana, ki In ni fu Morudekai. Esetere ki moi Morudekai ku ri ga Amana kporo.

³Esetere ki gumba pai fu bakindo berewe, ki ti ku pati nduko, ki zungadi ko ni aume ko di gu gbegberepai ku sa yo nga ga Amana, nangia boro Agaga, na gu sangisangi pai ko asangi he kuti aEbere.

⁴Bakindo ki taĩ ngbondo dahabu koyo du Esetere ni.

⁵Esetere ki guari, ki ru bara bangiri bakindo. Ri ki ya fu ko, “Ka si ngba ti bakindo, na ka pa re ngba bangiriko, ka gi pai ru aru re bangiri bakindo, ka si ngia ngba mi angba bangiriko i ke pai ka sa agu awaraga Amana asangi re nga wiri Amedata nangia boro Agaga, nga gu ko ake ka ba tunga aEbere kpakaya du rogo ga bakindo angbi dunduko.

⁶Bambiko waĩ I a mi hi pai ka bi gu gbigbitapai nave sa emu aboro Wai ka mi bi pa gbarasa angbatungare?”

⁷Bakindo Asuerose ki ya fu Nakindo Esetere na fu Morudekai nangia Ebere. “Oni ngére, mi fu ga Amana kporo fu Esetere, ko asi yo ko ti ngua, bambiko ko ataĩ beko kuti aEbere.

⁸Oni ke pai fu aEbere tigaoni a, a wa ngba ha ti roni, ti rimo bakindo, ki dika ha na ga bakindo tongo ido Bambiko gu kekepai du ni keke he ti rimo bakindo, ki du ni dikadika ha na ga bakindo tongo ido, a nga boro sa ka sa paha te.”

⁹I ki yambu ga bakindo abakeapai ni gu rago re ti biata diwi, nga Sivano, ti rameru 23. I ki ke pa ha dunduko a wa Morudekai arugu he fu aEbere, na fu abanyaki, na fu abaira abazogo, na agu abazogo nga ga aringara yo, tona Inde yo ki da ku Etiopia yo, wa angbi 127, fu angbi dunduko a wa du gaha kekeapai, na fu aboro dunduko wa du pa apayo, na fu aEbere a wa du gayo kekepai, wa pa payo adu a.

¹⁰Ko ki ke pai ti rimo Bakindo Asuerose, ki dika ha na ga bakindo tongo ido, ki kedi awaraga ku be abandu na waraga ri afarasi, ri gu ipiipi afarasi oto, naadu tipa ga bakindo sunge, nangia awiri ga bakindo afarasi.

¹¹Bakindo ki idi he ku rogo waraga fu agu aEbere nadu rogo abakporo dunduko i dungura tiyo wa sa, ka batasa ungayo, ka gbarasa abazogo aboro, ka imo yo, ki ba tungayo kpakaya na agu aboro gu ngbi re ka aso vura na yo, gbia kuti gayo rukutu agude na ade, ki gbu gayo ahe ni zizi ahe.

¹²I mangi he kina rogo uru sa rogo ga Bakindo Asuerose angbi dunduko, nga 13 uru nga ga 12 diwi, nga Adara.

¹³Kpia gu kekepai re aya i taki panae gu ndika re rogo angbi dunduko, ki gbandaka pa ha fu angbatunga aboro dunduko, ya aEbere mbakadi tiyo kuti gu rago re ka ira bape yo kuti avurayo.

¹⁴Si du abandu na waraga andu ti ni nga agu yo nandu ri agu afarasi oto nanamanga ga bakindo sunge, ki niipisi tiyo ki turusi tiyo be ga bakindo rugute. I arú gu ndika re bakumba bakporo Susana yo.

¹⁵Morudekai ki guari bara bangiri bakindo, na ga bakindo aroko ti ko, du ni bibirihe, na ni pusihe a, na kikii kpakpari irisa nga ga dahabu, na wene tutu roko gbaya ni giri nzibi du ni ngungungu he. Aboro bakporo Susana ki nipoi ku ari ki du na ngbarago.

¹⁶Ba aEbere ki ngba, i ki du na wasa, na ngbarago na irisa.

¹⁷Were rogo angbi dunduko na rogo abakporo dunduko, yo ga bakindo rugute andu ku ho ni, na gako ndika a, aEbere adu na wasa na ngbarago ti yo, ki mangi pumbo. Gu uru re ki ngba ti yo gbe. Dungu aboro dagba aboro angbi ki sa tiyo ni aEbere, bambiko gunde aEbere ati ti yo.