Read zande Gate 1 Bible Online

Gate 1 - zande bible

Gate 1

¹Were gere nga rimo agu awiri aYisaraere nada ku Ezipeta yo, aboro ni ba sa sa na gayo aborokporo nada na Yakoba:

²Rubena, Simona, Revi, Yuda,

³Yisasakara, Zeburuna, Benyamina,

⁴Dana, Nafatari, Gada na Asera, i dunduko nangia awiri Yakoba.

⁵Agu aboro dunduko naenge ti Yakoba, i adu 70; Yosefa aima du Ezipeta yo mbata.

⁶A Yosefa ki kpiki na awiribako dunduko na gu rika ngbatungayo nadu ti gu rago re dunduko.

⁷Ono awiri aYisaraere ki zuga azuga ki ninge ange ni dungu aboro; ki nimoi pai, ki nidu na ome ki susi asusa gbe, i ki du adu na ringara tokpotokpo.

⁸Were vovo bakindo ki du ku ri Ezipeta naina nga Yosefa ya.

⁹Ko ki ya fu gako aboro, “Oni ngére, agu aboro nga awiri aYisaraere i nge ti rani, omeyo susi gaani a.

¹⁰Oni yé, ani mángi pai ni tatamana kuti yo, i ka nge ange, si du were ho ka vura mo ka aye ni sa rani, i agbía tiyo na avurarani a, ki so vura na ani, i ki guari rogo gaani ringara.”

¹¹Si du i aringbisi abanyakasi pa sunge ti ni i nirungosi yo arungosi na sunge mbugo; i ki dudua abaakporo igaahe fu Faro, nangia aPitoma na Ramesese.

¹²Ono wa i arungosi yo na kere sunge, i ki ninge ange ki susi, ki nigbandaka agbandaka yasika. Ngbadu aEzipeto ki niimi aima fu awiri aYisaraere.

¹³Si du aEzipeto ki fu sukasuka sunge fu awiri aYisaraere du ni gbaniangba ha, i nimangi he.

¹⁴I ki rungosi yo ni kere he na asunge mbugo, na asunge pere, na asunge biriki, na ngbatunga asunge ati yo dunduko. Gayo asunge dunduko nga gu i afu he fu yo i nimangi he si adu ni gbaniangba ha.

¹⁵Bakindo aEzipeto ki gumba pai fu ga aEbere anasamba, rimo gu ri nangia Sifera, rimo gu kura ri ki ngia Pua,

¹⁶ko ki ya, “Ho oni ka nindu ni ni anasamba fu dere aEbere, ki bi yo i sungu ka batika, ka ngia kumbagude ka du, oni ki imi ko; ono ka ngia degude ka du, oni ki mbu ri ni ungari.”

¹⁷Ono agi anasamba re i anagunde ti Mbori, ka i amanga nga wa bakindo aEzipeto arugu yo na ni ya, ono i abatasa akumbagude, i nye ni ungayo.

¹⁸Bakindo aEzipeto ki kedi sunge fuo anasamba ki ya fu yo, “Tipagine oni amanga gi pai ti ni re, nga he gu rukutu akumbagude i nye ni ungayo kindi?”

¹⁹Anasamba ki ya fu Faro, “Bambiko dere aEbere wa dere aEzipeto te; bambiko i nyanyaki, i nabatika ni ipo mbata nasamba nikada koyo du yo ni.”

²⁰Mbori ki ningba na anasamba; aboro ki nge ange, ki nidu na ome ki susi a gbe.

²¹Si ki ta du wa gere, wa anasamba agunde ti Mbori, ko ki fu avungu fu yo tigayo a.

²²Si du Faro arugu gako aboro dunduko, ki ya. “Agu akumbagude dunduko i ka vunga yo fu aEbere, oni báfu yo ku Nire yo, ono adegude oni mbú yo ambu ni ungayo.”