Read zande Gate 10 Bible Online

Gate 10 - zande bible

Gate 10

¹Yekova ki ya fu Mose, “Mo ndú koyo du Faro ni; bambiko mi nyakasi kpotoko yo na kpoto gako amoyambu yo a, ya mi yúgu gimi yuguyuguapai dagba yo yo,

²mo agúmba ha fu awiro na fu atitaro waĩ mi amangi aEzipeto, na pa gimi yuguyuguapai mangi mi he ku dagba yo yo; ya oni ini he ya mi nga Yekova.”

³AMose na Arona ki ndu koyo du Faro ni, ki ya fu ko, “Ya Yekova nga ga aEbere Mbori wẽ, ‘Rame adú waĩ mbata mo nikaumbasi tiro ku bara bangire? Mo idi fu gimi aboro i ndu ka manga pare.

⁴Ka mo ká pa nduge fu gimi aboro, mo ngére, mi ayé na ayere gba ku rogo ga ringara,

⁵ami asúra rago dunduko, ka boro aréngba nga na bi sende ya. Ami aríta agu ahe nga gu nabati be morogumba ki nye be ro, ami aríta akpe ti agu angua dunduko nasona ati yo foro.

⁶Gamo abambu ahíka ahika be ra, na ga gaoni amoyambu dunduko, na ga aEzipeto dunduko a. Abaroni abi nga pai mbata na atitaroni wa gure te, tona ti gu rago i adu auru kpotosende ki da ku areme.’ ” Ko ki sa tiko, ki guari pati Faro.

⁷Ga Faro amoyambu ki ya fu ko, “Gi kumba re adú wa gbina fu rani rame ki du waĩ? Mo ídi he agu aboro re i ndu ka manga pa Yekova nga gayo Mbori; mo ata ina nga ha ya Ezipeta ni gbarasigbarasi he te?”

⁸I ki ye na aMose na Arona berewe ku bangiri Faro; ko ki ya fu yo. “Oni ndú ka manga pa Yekova nga gaoni Mbori; ono ada nga agu yo nikandu?”

⁹Mose ki ya, “Ani andú na gaani paranga aboro na gaani gbinza aboro; na awirani nga akumbagude, na awirani nga adegude, na gaani arimbasa akandoro, na gaani arimbasa abagara, wo ani ka ndu, bambiko ani ka manga pumbo fu Yekova.”

¹⁰Ko ki ya fu yo, “Yekova dú na oni, ka mi ídi he fu roni ni gu rago oni ndu na gaoni rukutu agude! Mo ngére, oni naberã pa gbigbitapai ku kpotoroni yo.

¹¹Ai! zegino te! Agu roni ndú nga akumba ki mangi pa Yekova, bambiko gure nga gu oni akpi nyemu he.” I ki do yo bara bangiri Faro.

¹²Yekova ki ya fu Mose. “Mo táĩ bero ku ri ringara Ezipeta tipa ayere, ya ami yé ku ri ringara Ezipeta, ka rita gu rũkurũku ahe du rogo ringara dunduko, nga gu morogumba ambu he.”

¹³Mose ki taĩ gako ngbondo ku ri ringara Ezipeta, Yekova ki ye na yuge uroyo ku ri ringara ni gu uru re pitipiti, na ku yuru sasasa. Ho rago agiri ni wiso yuge uroyo ki ye na ayere

¹⁴Ayere ki sura kpotosende Ezipeta dũ, ki nye rogo ringara Ezipeta dunduko, wangu ra adu ni kere he ki susi agu ra i nabi ra, ka ayere adú nga wa ami berewe fuo ra a ya.

¹⁵Bambiko ami asura rago dunduko, ringara ki biri abira be ra, ami ki riti rũkurũku ahe dunduko ringara yo, na gu zuzu angua dunduko morogumba ambu he; a nga wiri kpe sa nanye na angua, na rũkurũku ahe, nga gu nadu ati yo rogo ringara Ezipeta te.

¹⁶Faro ki yambu aMose na Arona ni ipo, ki ya, “Mi ingi pai kuti Yekova nga gaoni Mbori, na kuti roni a.

¹⁷Were mi nazungadi roni, oni vú re ti gi ingapai kina gi bara sa re, oni ki zúngadi Yekova nga gaoni Mbori, ya ko di gi kpio ti re re.”

¹⁸Ko ki guari bara bangiri Faro, ki zungadi Yekova.

¹⁹Yekova ki kedi gugugu yuge dioyo, si ki tuka ayere ki ya na ami ku Zamba Baime yo; a nga yere sa nanye rogo ringara Ezipeta wa sa te.

²⁰Ono Yekova anyakasi kpoto Faro yo kindi ka ko aida nga ha fu awiri aYisaraere i ndu ya.

²¹Yekova ki ya fu Mose, “Mo táĩ bero ku ngbangbaturũ yo, bitimo ti ku ri ringara Ezipeta, ya aboro nigbata gene agbata rogo nanaga bitimo.”

²²Si du Mose ki taĩ beko ku ngbangbaturũ yo. Nduunduu bitimo ki ti ku ri ringara Ezipeta dunduko tipa rame biata;

²³ka i abi nga tiyo ya, a nga boro sa aguari bani tipa rame biata te. Ono awiri aYisaraere dunduko i adu na kina imarago kpuyo yo.

²⁴Faro ki yambu Mose, ki ya, “Oni ndú, ka manga pa Yekova; gaoni rukutu agude ki ndu na oni a. Ono oni mbú gaoni rimbasa akandoro, na gaoni rimbasa abagara kina no.”

²⁵Mose ki ya, “Mo ka fu ũamotumo ku berani na zozo amotumo, ani tumo na m fu Yekova nga gaani Mbori.

²⁶Ani andu na gaani zogozogo anya a; a nga sukutu gu ru sa nikanye ku sa no te, bambiko ani andú na ami tipa manga pa Yekova nga gaani Mbori. Ani aina nga agini ra ani ka manga pa Yekova na ami daho ani ka da ni koyo te.”

²⁷Ono Yekova ki ninyakasi kpoto Faro yo kindi, ka ko aida nga ha i ndu ya.

²⁸Faro ki ya fu ko, “Mo gúari bara bangire; mo bánda tiro; ka mo bi nga kpakpure berewe ya; bambiko ni gu uru mo ka bi kpakpure mo akpí akpi.”

²⁹Mose ki ya, “Rengo gumba mo! Mi abí nga kpakpuro berewe te.”