Read zande Gate 14 Bible Online

Gate 14 - zande bible

Gate 14

¹Yekova ki ya fu Mose,

²“Mo gúmba ha fu awiri aYisaraere ya i káraga tiyo ku se yo ki zi bataya barangba Pi-a-irota, dagba Migedora na baime, barangba Barasefona; oni azía bataya barangba ha pati baime.

³Bambiko Faro ayá tipa awiri aYisaraere, ‘I kongo rogo ringara; ngbakungba kengedi yo.’

⁴Mi anyákasa kpoto Faro yo, ko ki peke fuo yo. Mi ki du ni irisiirisi re mbiko Faro na mbiko gako rimbasa aborosovura dunduko; aEzipeto ki ini he ya mi nga Yekova!” I ki mangi he wo.

⁵I ki gumba ha fu bakindo aEzipeto ya aboro kiti ka ga, kpoto Faro yo ki sa tihe na kpoto avuruko yo, kuti aboro, i ki ya, “Gini pai nga gi mangi ani re, ya ani aidi he fu aYisaraere i ndu he manga gaani sunge?”

⁶Ko ki mbakadi gako angbagidavura, ki rogodi gako rimbasa aborosovura fuo ko a.

⁷Ko ki rogodi siasia angbagidavura 600, na agu angbagida vura nangia ga Ezipeta dunduko, na abarutirivura tipa ha dunduko ni ba sa sa.

⁸Yekova ki nyakasi kpoto Faro yo anyakasa nangia bakindo aEzipeto, ko ki do fuo awiri aYisaraere, wa i akuru na bidi.

⁹AEzipeto ki do fuo yo, ga Faro afarasi na angbagidavura dunduko, na gako abanduri afarasi, na gako rimbasa aborosovura a, ki gbia yo wa i azi bataya pati baime, mbembedi na Pi-a-irota, barangba Bara-sefona.

¹⁰Ho Faro ambedi na yo ni, awiri aYisaraere ki tuka bangiriyo, oni ngere, aEzipeto niye fuo yo kpua; i ki nigunde agunde gbe. Awiri aYisaraere ki poi ku ari fu Yekova;

¹¹ki ya fu Mose, “Bambiko wa bamurã adu nga Ezipeta yo ya, si mo arogo rani yo ti ni ani kpíki ngbakungba no? Tipagine mo amangi rani ti ni were ka kusa rani Ezipeta yo?

¹²A nga kina gi pai re ani agumba ha foro Ezipeta yo ya, ‘Oni hé rani ani mángi ga aEzipeto sunge,’ te? Bambiko si angba fu rani ani mangi ga aEzipeto sunge susi ti kpika ani ngbakungba no.”

¹³Mose ki ya fu aboro, “Ka oni gúnde nga ya, oni rú zaa, ka bi gu bata nga ga Yekova nga gu ko ka manga ha fu roni areme; bambiko agu aEzipeto bi oni yo areme re, oni abí nga yo berewe wa sa te.

¹⁴Yekova nikaso vura tipa roni, oni ki ru zaa.”

¹⁵Yekova ki ya fu Mose, “Tipagine mo akpara fere ti ni? Mo gúmba ha fu awiri aYisaraere, ya i ndú ku mbata yo.

¹⁶Mo ki tumba ga ngbondo ki taĩ bero ku ri baime ki kparaka ha, awiri aYisaraere así bebere baime yo kina auru ugu sende.

¹⁷Mi anyákasa kpoto aEzipeto yo, i ki zorõ fuo yo, mi ki du ni irisiirisi re mbiko Faro, na mbiko gako rimbasa aborosovura, na gako angbagidavura na gako abanduri afarasi a.

¹⁸AEzipeto ki ini he ya mi nga Yekova, ho mi ka du ni ni irisiirisi re mbiko Faro, na mbiko gako angbagidavura, na gako abanduri afarasi.”

¹⁹Ga Mbori maraika nga gu ko naandu ku mbata yo fu ga aYisaraere rikavura, ko ki aria tiko ku gii yo yo; bakamikami dubo ki guari barangba yo yo, ki aria tihe ki ru ku gii yo yo,

²⁰ki du dagba ga aEzipeto bataya, na ga aYisaraere. Bakamikami dubo ki du yo na bitimo a; ono si ahasi rago ahasa yuru, ka agu yo ambeda nga na agu yo yuru wa sa ya.

²¹Mose ki taĩ beko ku ri baime; Yekova ki gbisi baime ku sa yo ni gugugu yuge naya uroyo yuru sasasa, ki sa baime ni ugu sende, ime ki du ni kparakakparaka ha.

²²Awiri aYisaraere ki si dagba baime kina ri ugu sende, gango ngiri baime ki du ni tumbatumba ha wa ndugu ku kumbabeyo na ku garebeyo yo.

²³AEzipeto ki do fuo yo, ki si ku dagba baime, nga ga Faro afarasi, gako angbagidavura, gako abanduri afarasi dunduko.

²⁴Si ki ta du wa gere, wiso mbata rago nikagira Yekova angana ga aEzipeto rimbasa aborosovura dagba bakamikami dubo na we, ki fudi ga aEzipeto rimbasa aborosovura.

²⁵Ko ki rogo andu gayo angbagidavura, i ki ta ruga ha si ki du wa susu. Si du aEzipeto aya ti ni, “Ani óro aora ti bangiri aYisaraere, bambiko Yekova naso vura tipa yo kuti aEzipeto.”

²⁶Yekova ki ya fu Mose, “Mo táĩ bero ku ri baime, ya ime karaga tihe ki fu ri aEzipeto, ku ri gayo angbagidavura na gayo abanduri afarasi.”

²⁷Mose ki taĩ beko ku ri baime, ho rago agira ni baime ki karaga tihe kuti ba hi he. AEzipeto ki oro be he, Yekova ki bafu aEzipeto ku bebere baíme yo.

²⁸Ime ki karaga tihe, ki fu ku ri angbagidavura, na ku ri abanduri afarasi, na ku ri ga Faro rimbasa aborosovura nangia agu yo napeke fuo yo ku baime yo dunduko. A nga boro ho sa nabati te.

²⁹Ono awiri aYisaraere asi ri ugu sende bebere baime yo, gango ngiri ime ki du fu yo wa ndugu ku kumbabeyo na ku garebeyo yo.

³⁰Were, wo Yekova abatasi aYisaraere be aEzipeto ni gu rago re; aYisaraere ki nibi kangba aEzipeto ti ngba gango baime.

³¹AYisaraere ki bi gu iiriwopai Yekova amangi aEzipeto na ni, aboro ki nigunde ti Yekova; i ki idi pa Yekova, na pa gako moyambu nangia Mose.