Read zande Gate 16 Bible Online

Gate 16 - zande bible

Gate 16

¹I ki guari Erima yo ki nindu gayo nunguro, rimbasa awiri aYisaraere ki da ku rogo gu ngbakungba nga Sina dunduko, nga gu du dagba Erima na Sinai, ti gu bawe na bisue rame nga ga ue diwi fuo guari yo Ezipeta yo.

²Rimbasa awiri aYisaraere dunduko i ki nigumba rimo aMose na Arona ngbakungba yo,

³ki ya fu yo, “Ka ani akpiki be Yekova ringara Ezipeta yo, si ka angba ho ani adu ni pati duku pasio, ki ta ri riahe nimbiki; bambiko oni ye na ani ku rogo gi ngbakungba no re, ka imo gi rimbasa dungurati re dunduko ni kina gomoro.”

⁴Yekova ki ya fu Mose, “Mo ngére, mi akéda riahe ngbangbaturũ yo fu roni; aboro akúra ka ndu ka rogoda ha tipa kina ga uru sa, mi ki ini he si ngia i apéka gi rugute, watadu wo te.

⁵Fuo gere ti sita rame, i atnbákada gu i ka rogoda ha si ki ku wa bara ue ti gu i naarogoda ha na uru.”

⁶AMose na Arona ki ya fu awiri aYisaraere dunduko. “Nzinziirago oni aina ha ya kina Yekova nakusi roni ringara Ezipeta yo,

⁷wiso oni abí ga Yekova taarimo, bambiko ko gi pa gumba oni rimo Yekova. Ada nga ani ka oni gumba rimorani?”

⁸Mose ki ya, “Ho Yekova ka afu pasio ni fu roni na nyemu oni nirí he, na kpokuta na wiso oni nimbiki be he, bambiko Yekova gi gu gumbarimoko oni agumba ha kuti ko ― ani nga ada? Gaoni gumbarimo si kuti rani te, ono si fu Yekova.”

⁹Mose ki ya fu Arona, “Mo yá fu rimbasa awiri aYisaraere dunduko, ‘Oni mbédi ku bara bangiri Yekova, bambiko Yekova gi gaoni gumbarimo.’ ”

¹⁰Si ki ta du wa gere, wa Arona agumba pai fu rimbasa awiri aYisaraere dunduko, i ki ya ngere ku ngbakungba yo, oni ngére, ga Yekova taarimo ayugu tihe rogo bakamikami dubo yo.

¹¹Yekova ki ya fu Mose,

¹²“Mi gi ga awiri aYisaraere gumbarimo; mo yá fu yo, ‘Nzinziirago, oni arí pasio, wiso oni ki nimbiki be kpokuta; oni aína ha ya mi nga Yekova nga gaoni Mbori.’ ”

¹³Si ki ta du wa gere, nzinziirago ambirigbo aye, ami ki dadi bataya dunduko; wiso ndomo ki ti ku pati bataya kirikiri.

¹⁴Ho gu ndomo nikati ni niti, wiri wirikowiriko he adu auru sende ngbakungba yo momomo ni rukutu he wa gu nzerenzere ndomo nidu sande.

¹⁵Ho awiri aYisaraere abi he ni, i ki ya dagba yo, “Gini he nga gere?” Bambiko i aina nga gu he nangia ha te. Mose ki ya fu yo, “Si nga gu kpokuta Yekova afu fu roni oni ri he.

¹⁶Gere nga gu pai Yekova afu rugute tipa ha nga: ‘Oni rógodi he, aboro dunduko ni ba sa sa a wa i nari he; oni arógoda ha a wa nge gaoni aborokporo, aboro dunduko tipa agu yo du rogo gayo abamburoko, wa aritere biata na bebere he tipa boro sa.’ ”

¹⁷Awiri aYisaraere ki mangi wo; agu yo ki rogod he ni bakere he, kura yo ni umba ha.

¹⁸Ho i anindukudi he ni rengbe wa aritere biata na bebere he, gu ni nanirogodi he gbe si anye nga be ni te, na gu ni nanirogodi he ni umba ha zingo ho amanga nga ni te. Aboro anirogodi he dunduko ni ba sa sa, a wa i akarí he.

¹⁹Mose ki ya fu yo, “Ka boio hé nga gu ki da ku wiso wa sa ya”

²⁰Ono i adega nga tuyo sa sangba Mose te; ono agu yo ahe bete he ki da ku wiso, agbire ki zu ku rogo ho si ki nifũ afũ gbada; Mose ki zingi azinga fu yo.

²¹I ki nirogodi he na awiso, ringbisi he ni ba sa sa waĩ i akari he. Ho uru aningaria ni, si ki zaraga.

²²Si ki ta du wa gere, ti sita rame i anirogodi he wa ga bara ue, wa aritere saba tipa yo ni ba sa sa. Agbia ku ri rimbasa aboro ki ye ki gumba paha fu Mose,

²³ko ki ya fu yo, “Gi nga gu pai Yekova agumba re: ‘Gba nikangia ndikidi rago ongoda, nga kparakpara ziazia rago sabiti fu Yekova; oni zó gu oni ka kpi nyemu zo ho, ki pasi gu oni ka kpi nyemu pasa ha, gu yangada ha nikanye oni ki igi he ki da ku wiso.’ ”

²⁴I ki niigi he dati wiso, a wa Mose arugu yo na paha, ka si afũ nga gbada ya, agbire adu nga rogo ho a te.

²⁵Mose ki ya, “Oni rí gure areme, bambiko areme nga rago sabiti fu Yekova; oni abí nga fia areme ringara yo te.

²⁶Oni arógoda ha rame ki du sita; ono ti saba rame, nga rago sabiti, si anidú nga rago ho te.”

²⁷Si ki ta du wa gere, ti saba rame, bete aboro akuru ka rogoda ha, ka i abi nga ha ya.

²⁸Yekova ki ya fu Mose, “Rame adú waĩ oni nibása pa ka kuti gimi arugute na gimi andika?

²⁹Oni bí nga! Yekova afu rago sabiti fu roni, si du ko nafu kpokuta ti ni fu roni ti sita rame rengbe na uru ue; oni nyé kina baroni, a nga boro sa nikaguari bani ti saba rame te.”

³⁰Si du aboro aniongodi ti ni ti saba rame.

³¹Ngbatunga aYisaraere aniya ti ni manu; si adu wa zuzu rindikiwe, ni pusi he, nziraha adu ngbayo yo wa gu wiri ayaaya kpokuta i ambakadi he na nzeme anyege.

³²Mose ki ya, “Gere nga gu pai Yekova arugu he, nga: ‘I igi bete he wa aritere biata na bebere he tipa arika ngbatungaroni, ya i bí gu kpokuta mi anariga roni na ni ngbakungba no, ho mi akusi roni ni ringara Ezipeta yo.’ ”

³³Mose ki ya fu Arona, “Mo dí akoro ki moi bete manu ku rogo ho wa aritere biata na bebere he, ki igi he ku bara bangiri Yekova, ya i banda ha tipa arika ngbatungaroni.”

³⁴Awa Yekova arugu Mose kina wo Arona aigi he barangba Dezirepai, ka abanda ha.

³⁵Awiri aYisaraere ari manu tipa garã 40, daho i ada ni ku rogo gu ringara ho aboro adu ni; i ari manu kindi daho i ada ni ti ngbanda ringara Kanana.

³⁶Were pa kia omera sa du wa sa dagba bawe rogo efa nga aũringbasaahe.