Read zande Gate 18 Bible Online

Gate 18 - zande bible

Gate 18

¹Were, Yetero nangia boromotumo nga ga Midiana, ko angia bagbio Mose, ko ki gi agu apai dunduko Mbori amangi fu Mose, na fu aYisaraere gako aboro, na waĩ Yekova akusi aYisaraere Ezipeta yo.

²Were Yetero nangia bagbio Mose ki di Sipora, dia Mose, fuo keda ko ri ku sa yo,

³na awiriri ue, rimo gu ko sa nangia Gerusoma, bambiko Mose aya, “Mi adu ni kungba boro rogo kungba ngbi”,

⁴rimo gu kura ko ki ngia Eriezere, bambiko Mose aya, “Gu Mbori nga ga buba ko naaunda re, ki nibatasi re be ga Faro basape”.

⁵Yetero nangia bagbio Mose, ki ye na awiriko na diako koyo du Mose ni ku ngbakungba yo, ho ko azi bataya ni pati gu bagangara nga ga Mbori.

⁶Boro ki ya fu Mose, “Mo ngére, bagbioro nga Yetero, naye kono du mo ni, na diaro, na awiriri ue du na ri.”

⁷Mose ki kuru ka ngbisa bagbioko, ki tumusa fu ko ki nyoro pangbako; i ki sana he dagba yo tipa gayo zereda, ki ye ku tii bamburoko yo.

⁸Mose ki gumba pa agu apai dunduko fu bagbioko nga gu Yekova amangi he fu Faro na fu aEzipeto tipa aYisaraere, na agu ambusa dunduko naye ku ri yo ngba gene, na waĩ Yekova abatasi yo.

⁹Yetero ki du adu pusiapusia mbiko gu wene apai Yekova amangi he fu aYisaraere, wa ko abatasi yo be aEzipeto.

¹⁰Yetero ki ya, “Sambuahe fu Yekova nga gu ko nabatasi roni be aEzipeto, na be Faro a.

¹¹Awere mi ini he ya Yekova du ni oakere ko ti ambori dunduko ni rengo, bambiko ko nabatasi aboro tii be aEzipeto, rogo gu pai i amangi kuti yo ni enda.”

¹²Yetero nangia bagbio Mose ki fu zozo motumo na kura amotumo fu Mbori; aArona ki ye na ga aYisaraere abaakumba dunduko ka ri riahe na bagbio Mose ku bara bangiri Mbori.

¹³Si ki ta du wa gerẽ fuo girarago Mose asungu ka sapa ngbanga aboro. Aboro ki ru aru pati Mose tona wiso ki da ku nyemu.

¹⁴Ho bagbio Mose abi gu pai ni re dunduko nga gu ko amanga fu aboro, ko ki ya, “Gini pai nga gu mo amanga fu aboro re? Tipagine sungu mo ti ni ni sa ro, aboro ki niru bara bangiro tona wiso ki da ku nyemu?”

¹⁵Mose ki ya fu bagbioko, “Bambiko aboro ninaye kono du mi ni ka ruga tiyo na apai be Mbori;

¹⁶ka pai amanga yo, i ki ye kono du mi ni, mi ki sapu ngbanga dagba boro na kurani, mi ki raba yo na ga Mbori rugaapai na gako arugute.”

¹⁷Bagbio Mose ki ya fu ko, “Gu pai mo amang? ha re, rengbe nga ha te.

¹⁸Ni rengo, omero nikabata mo na agu aboro du na mo, bambiko gi pai re si susi omero; mo arengba nga na manga ha ni sa ro te.

¹⁹Were, mo dége turo ka gia sangbare; mi ki rugu ro, Mbori ki du na mo! Mo dú ku ba aboro bara bangiri Mbori; mo ki nindu na gayo apai fu Mbori;

²⁰mo ki nirugu yo na rugaapai na arugute ki niyugu pai fu yo waĩ i ka araka, na gu pai i ka amanga.

²¹Ku ri gere mo sía agu akumba dagba aboro dunduko rengbe na apai nga agu yo nagunde ti Mbori, nga airarengo aboro, nasoga marã mobirimo; mo ki moi yo ku ri aboro, agu yo ku ri agu yo ni ba akutu, agu yo ku ri agu yo ni ba akama, na ni ba abisue bawe, na ni ba abawe.

²²I nisápu ngbanga aboro na arago dunduko; ono bakere apai dũ i ka aye na ni koyo du mo ni, ono rukutu apai, kina yo nisápu he tigayo. Si ki ipi foro, i ki du na mo rogo mbugoho.

²³Ka mo mángi gi pai re, na ka Mbori rúgu ro wo, mo ki rengbe na ni, agi aboro re dunduko i ki ga a ku rogo gayo arago zezeredi.”

²⁴Si du Mose agi sangba bagbioko, ki mangi agu apai dunduko ko agumba ha.

²⁵Mose ki siaka agu akumba narengbe bangiriko dagba aYisaraere dunduko, ki moi yo ku ri aboro ni abazogo akutu, ni abazogo akama, ni abazogo abisue bawe, ni abazogo abawe a.

²⁶I ki nisápu ngbanga dagoa aboro na arago dunduko; ono kpakarakpakara apai i anindu na ni fu Mose, ono rukutu wiri apai dunduko i anisapu he tigayo.

²⁷Mose ki asia bagbioko ko ga, ko ki ga ngba gako gene ku rogo gako ringara.