Read zande Gate 19 Bible Online

Gate 19 - zande bible

Gate 19

¹Rogo biata diwi fuo guari awiri aYisaraere ringara Ezipeta yo, ni kina gu rago re i ki da ku rogo ngbakungba Sinai yo.

²Were ho i aguari ni Refidimi yo, ki da ku rogo ngbakungba Sinai yo, i ki zi bataya ngbakungba yo; kina yo aYisaraere azi bataya ni barangba bagangara.

³Mose ki dakpa koyo du Mbori ni, Yekova ki ta yamba ko ri bagangara yo niya, “Mo yá fu ngbatunga Yakoba, na fu awiri aYisaraere wẽ:

⁴Oni abi gu pai mi amangi fu aEzipeto, na waĩ mi atumba roni ri pupo adingimo ki ye na oni kono du mi ni.

⁵Wa du he were, ka oni gí sangbare ni rengo, ki nika kuti gi zungahe, oni adú ni gimi wene ũkumuko dagba kura rika aboro zegino dunduko; bambiko kpotosende dunduko gimi nga ha,

⁶oni ki du ni ga bakindo aboromotumo tipa re, ni kparakpara ziazia rikaaboro. Agi apai re si nga gu mo ka gumba fu awiri aYisaraere.”

⁷Mose ki ye ki yambu ga aboro abaakumba, ki yugu agi apai fu yo dunduko re Yekova nirugu ko na ni.

⁸Aboro ki mongo karaga ha wa sa, ki ya, “Agu apai dunduko Yekova nigumba ha ani amánga kina ha.” Mose ki tingidi agu apai fu Yekova aboro agumba ha.

⁹Yekova ki ya fu Mose, “Mo ngére, mi ayé koyo du mo ni rogo gu bakamikami mai du ni nanaga ha, ya aboro gi pai ho mi ka afura ni na mo, i ki niidi ga pai nye anye kindi.” Mose ki gumba agu apai fu Yekova aboro agumba.

¹⁰Yekova ki ya fu Mose, “Mo ndú koyo du aboro ni, ki kpara yo areme na gba, i ki zundu gayo aroko dunduko,

¹¹i ki mbakadi tiyo tipa gu biata uru re; bambiko ti gu biata uru re Yekova azorá ku ri Bagangara Sinai ku bangiri aboro dunduko.

¹²Mo ki gba sasa fu aboro kirikiri pati he, ki ya, ‘Oni bánda tironi, ka oni dákpa nga ku ri bagangara yo ya; watadu ka zada bangbandaha a ya; bambiko gu boro nikazada bagangara i aímo ni aimo ni rengo;

¹³a nga be boro sa nikazada ni te, i asópa ni ni ambia watadu no ni; zavura nya watadu boro, ni anyé nga ni ungani te.’ Ho mbanya ka paa ni ni gbanga ha, i ki ye ku pati bagangara yo.”

¹⁴Mose ki zorõ ri bagangara yo koyo du aboro ni, ki kpara yo; i ki zundu gayo aroko.

¹⁵Ko ki ya fu aboro, “Oni mbákadi tironi tipa gu biata uru re; ka oni mbédi nga na de ya.”

¹⁶Ti gu biata uru re, ho rago agiri ni, gumba aikpira ki nisumbu, rungbutarungbuta mat ki ye ni nanaga ha ku ri bagangara yo, woro nambongo ki nipoi apaa zozorozo. Agu aboro nadu bataya yo dunduko i ki nikigi akiga.

¹⁷Mose ki kusi aboro bataya yo ka ngbisa Mbori; i ki ru ti mburu bagangara.

¹⁸Bagangara Sinai adu na kina ngime dunduko, bambiko Yekova azorõ ku ri he kina rogo we; ngimihe ki nigundu agunda suu wa kina ngimi gbigiwi, bagangara ki niwo awo zigizigi dunduko.

¹⁹Ho woro nambongo apaa ni gbe zozorozo ki susi, Mose ki gumba pai, Mbori ki karaga pai fu ko rogo pa gumba yo.

²⁰Yekova ki zorõ ku ri Bagangara Sinai, kina ku ri he; Yekova ki yambu Mose ko yé ku ri bagangara yo, Mose ki dakpa koyo.

²¹Yekova ki ya fu Mose, “Mo zórõ ki rugu aboro, i ka gbada kono du Yekova ni ka ngana ko, dungu yo ki kpiki.

²²Aboromotumo kpára tiyo a, nga agu yo ninambeda na Yekova, Yekova ka gba koyo du yo ni.”

²³Mose ki ya fu Yekova, “Aboro arengba nga ka dakpa k u ri Bagangara Sinai yo te; bambiko mo ni tiro arugu rani niya, ‘Oni gbá sasa pati bagangara kirikiri, ki kpara ha.’ ”

²⁴Yekova ki ya fu ko, “Mo ndú ki zorõ, mo ki dakpa ku ari no na Arona fuo ro; ono aboromotumo na aboro ka i gbádi nga ka dakpa fuo Yekova ya, ko ka gba fuo yo.”

²⁵Were Mose ki zorõ koyo du aboro ni, ki gumba ha fu yo.