Read zande Gate 2 Bible Online

Gate 2 - zande bible

Gate 2

¹Were, gu kumba sa dagba ngbatunga Revi, ko andu ki di de nangia wiri Revi.

²Ri ki du na mobara, ki batika kumbagude. Ho ri abi ko ni ya ngba ko angba gbe, ri ki oko ko aoka tipa diwi biata.

³Ho ri arengba nga ka oka ko ni kindi ya, ri ki mbakadi wiri kurungba rogo badumo tipa ko, ki dika ha ni baro na dada, ki pigi gude rogo ho, ki moi he rogo nvuo ti ngba gango ime.

⁴Dawiriko ki ru tuturũ, ka bi gu pai nikamanga ko.

⁵Wiri Faro nangia de ki ye ka mbeda ime ku pa di, gari paranga ade ki nita pangba ime. Ri ki bi gu toni kurungba rogo nvuo ti ngba gango ime, ki kedi gari kanga ka dia ha.

⁶Ri ki za ha, ki bi gude; were, badi ki nikpari akpara ni aume. Nunga ko ki nimangi ri amanga, ri ki ya, “Wiri aEbere nga gi gude re.”

⁷Dawiriko ki ya fu wiri Faro, “Mi ndú ka yamba gu boro foro nikambu ti ko, dagba dere aEbere yo?”

⁸Wiri Faro ki ya fu ri, “Mo ndú.” Degude ki ndu ki yambu kina na fogo gude.

⁹Wiri Faro ki ya fu ri, “Mo dí gi gude re, ki mbu ti ko fere, mi ki fu ga mosoro foro.” De ki di gude ki nimbu ti ko.

¹⁰Gude ki sono, ri ki ye na ko koyo du wiri Faro ni, ko ki du ni wiriri; ri ki yambu rimoko nga Mose, ki ya, “Bambiko mi adi ko ime yo.”

¹¹Si adu were ni gu rago re, ho Mose asono ni ki du ni kumba, ko andu koyo du ngbatungako ni, ki bi gayo asunge mbugo. Ko ki bi boro Ezipeta ni nita boro Ebere, nangia gu ni sa dagba ngbatungako.

¹²Ko ki ngereke amiaamia. Ho ko angere ni vurũ ka ko abi nga boro ya, ko ki imi boro Ezipeta, ko ki oko kangbako ku ngume yo.

¹³Ko ki ndu koyo ni kura uru, oni ngére, akumba ki nita kpata nangia aEbere ue. Ko ki ya fu gu ni namanga kura ni gbegberẽ, “Mo nata kuaro were tipagine?”

¹⁴Gu kumba re ki ya, “Da nisa ro ni bazogo ni boro sapangbanga fu rani? Mo naberã pa imo re, wa mo aimi gu boro Ezipeta?” Mose ki gunde agunde, ki ya, “I ini gi pai re ni rengo.”

¹⁵Were ho Faro agi gi pai ni re, ko ki nigbata Mose ka imo ko. Ono Mose ki oro be Faro, ki niraki rogo ringara Midiana; ko ki sungu yo pati guga.

¹⁶Were gu boro motumo nangia ga Midiana ko adu na awiriko ni ade saba; i aye ka tu ime, ki hisi akurungbu na ni tipa ga bayo rimbasa anya ami ni mbiri he.

¹⁷Ababanda anya ki ye ki dandi yo; ono Mose ki ru ku ari ki unda yo, ki fu ime fu gayo rimbasa anya.

¹⁸Ho i ada ni koyo du bayo ni nangia Ruere, ko ki sana yo ki ya, “Oni niwiri pa da no areme ni ipo waĩ?”

¹⁹I ki ya, “Boro Ezipeta nibatasi rani be ababanda anya, ko ki tu ime fu rani, ki fu he fu rimbasa anya.”

²⁰Ko ki ya fu awiriko, “Wari du ko ni? Tipagine oni nimbu gu kumba ti ni re? Oni yámbu ko, ko yé ka ri riahe.”

²¹Si ki ngba ti Mose ka sunga na gu kumba re, ko ki fu wiriko fu Mose nangia Sipora.

²²Ri ki batika wiriri, ko ki yambu rimoko nga Gerusoma; bambiko ko aya. “Mi adu ni kungba boro rogo kungba ngbi.”

²³Fuo dungu arago bakindo aEzipeto ki kpi. Awiri aYisaraere ki niuko be asunge mbugo. I ki nikpari akpara tipa undahe, gayo kpe ki da ku tu Mbori yo be asunge mbugo.

²⁴Mbori ki gi pa gayo uko, Mbori ki tingidi pa gako zungahe na Abarayama, na fu Yisaka, na fu Yakoba.

²⁵Mbori ki bi awiri aYisaraere Mbori ki berẽ pa yo.