Read zande Gate 21 Bible Online

Gate 21 - zande bible

Gate 21

¹“Were gere nga gu rugaapai mo ka afu fu yo.

²Ka mo ngbe kanga nga wiri aEbere, ni ka manga sunge tipa garã sita, ti saba ha ni ki ga ni rini gbua.

³Ka ni ye ni sa ni zanga de, ni agá a ni sa ni zanga de; ka ni ye ni kumba ku de, diani agá na kina ni a.

⁴Ka bairani fu de fu ni, ka ri batika akumbagude fu ko watadu adegude, de na awiriri nikadu ni ga bairari yo, kina ni ki ga ni sa ni.

⁵Ono ka kanga ya nzunzu, ‘Mi nakpi nyemu bairare, diare, na awire; mi agá nga ni rire te,’

⁶bairani ki ye na ni koyo du Mbori ni, ki ye na ni ku ngbadimo, watadu ku pati ngua ngbadimo; bairani ki koro tuni na kofodi; ni ki du ni gako kanga nye anye kindi.

⁷“Ka boro bagi wirini nga de ri du ni kanga, ri agá nga wa agu akanga nga akumba te.

⁸Ka ri angbá nga ti bairari ya, nga gu ko napazua ri tipa kina ko, ko ki idi he fu yo i tumo ri; ka ko bági nga ri fu kungba aboro wa ko amangi biriki na ri ya.

⁹Ka ko pazua ri fu wiriko ko mángi fu ri wa i naamanga fu wiri aboro nga ade.

¹⁰Ka ko di kura de tipa kina ko, ka ko úmbasi nga gari riahe ya, na gari aroko, na agu apai ko ka amanga fu ri rogo pa sino diade a ya.

¹¹Were ka ko amánga nga agi apai biata re fu ri ya, ri ki ga zanga marã ki ra ni riri.

¹²“Gu ni ka ta boro ni ki kpi, i aímo ni aimo.

¹³Ono ka boro apida nga kurani ya, ono Mbori afu ni ku be ni, mi aríngbisa rago fu roni, yo ni ka rengba na ora ku ho ni.

¹⁴Ono ka boro ye ka dusia kurani ka imo ni ni biriki, mo ki di ni pati gi bamotumo, ni kpi akpi.

¹⁵“Gu ni ka imi bani watadu nani, i aímo ni aimo ni rengo.

¹⁶“Gu ni ka zi boro ni dĩ, ki oagi ni, watadu ka i bi ni be ni, i aímo ni aimo.

¹⁷“Gu boro ka senge bani, watadu nani, i aímo ni aimo.

¹⁸“Ka ngia aboro ka ti kango, gu ni ki nari kurani ni mbia, watadu ni minamina beni, ka ni akpi nga ya, kina pi ni api ri gani barame,

¹⁹ka ni guari ku ari berewe, ki nita kuti gani tepe, gu ni nanari ni ka pai adu nga ku rini ya; ono ni ki tumo fu ni tipa gu gani rago nanyasi gbua, ki mangi apai tipa husa ni wenengaĩ.

²⁰“Ka boro nari gani kanga nga kumba watadu de, na ngua, ni ki kpi kina ku be ni, i ambúsa ni ambusa ni rengo.

²¹Ono ka kanga íma tipa uru sa watadu ue, i ambúsa nga bairani te; wa du ni ni ga bairani ũmarã.

²²“Ka akumba ta kpata dagba yo ki mangi fu de gbegberẽ, nga gu ri du na vuse, gari gude ki ti ti ri, ono ka kura pai adu nga ya, ni ki tumo a wa kumbari ka ringbisa ha; ni ki fu he a wa abasapungbanga ka gumba ha.

²³Ono ka gbegberẽ pai ye fuo ho, boro ki tumo ni kina ungani tipa unga gu boro re,

²⁴bangirise ku ba bangirise, rinde ku ba rinde, be ku ba be, ndue ku ba ndue,

²⁵zo boro ku ba zo boro, hõga boro ku ba hõga boro, mandoro ku ba mandoro.

²⁶“Ka kumba nari bangiri gani kanga, nga kumba watadu de, ki imi he, ni ídi he fu gani kanga ni ga gbua mbiko pa bangirini.

²⁷Ka ni nari rindi gani kanga, nga kumba watadu de, ni idi he fu gani kanga ni ga gbua mbiko pa rindini.

²⁸“Ka ngia babagara ka zuba kumba watadu de ki imi ni i asópa gu babagara re asopa ni mbia, ka i arí nga pasioru a ya; ono ka pai adu nga ku ri baira babagara ya.

²⁹Ono ka ngia babagara naazuba aboro mbata, aboro ki nitingidi he fu bairaru, ka ko abanda nga ru ya, ono u ki imi kumba watadu de, i asópa babagara asopa ni mbia, i ki imi bairaru a.

³⁰Ka i gumba pa motumo tipa ko, ko ki fu motumo tipa ungako, a wa i ka ringbisa ha.

³¹Ka babagara zuba kumbagude watadu degude ki imi ni, i amánga fu ru a wa gi sapangbanga re naringbisa ha.

³²Ka babagara zuba kanga nga kumba watadu de, bairaru ki fu sekere feda 30 fu baira kanga, i ki sopo babagara ni mbia.

³³“Ka boro di he ti ngba due, watadu ge due, ka ni avagada nga ha ya, babagara watadu dongi ki ti koyo,

³⁴baira due ki tumo; ni afú marã fu iraru, kangbaru ki du ni gani.

³⁵“Ka ngia ga gu boro babagara sa hõgi ga gu kura ni ru, u ki kpi, i bági gu unga babagara abaga re ki kparaka marãru; i ki kparaka kangba gu ru nakpi a.

³⁶Ono ka i íni he ya gu babagara re naazuba anya mbata ka bairaru abanda nga ru ya, ni atúmo na babagara ku ba babagara ni rengo, kangbaru ki du ni gani.