Read zande Gate 22 Bible Online

Gate 22 - zande bible

Gate 22

¹“Ka boro dĩ babagara watadu kandoro, ki imi ru, watadu ki bagi ru, ni atúmo ni abaabagara bisue ku ba gu ru sa re, na akandoro biama ku ba kandoro sa.

²Ka i bi iradĩ ni nikua ngbadimo i ki ta ni ata ni ki kpi, ngbanga adú nga tipa kpioni te;

³ono ka ni akpi nga ho ya, ngbanga adú ku ri ni. Ni ki tumo tipa nya; ka he adú nga be ni ya, i ki bagi ni abaga tipa gani dĩ.

⁴Ono ka i bi nya be ni ni kina ungaru, ka si ngia babagara du, watadu dongi, watadu kandoro, ni atúmo ho wa bara ue.

⁵“Ka boro zaki gani zogozogo nya u ki ri he rogo ga kura boro ati, u ki riti ũ gu ati re watadu ũati bakakue dunduko, ni ki tumo na gani uati watadu ũati bakakue du ni wene he ki susi.

⁶“Ka we gbi ki zi akiwe, keke morũ ki gbi be he, watadu gu i ake nga ha ya, watadu ati a, gu boro nazo we ni atúmo pa ahe atumo ni rengo.

⁷“Ka boro fu marã fu kurani, watadu ahe ni banda ha, fuo gure ka i dĩ he rogo gani bambu yo, ka i bi gu iradĩ re, ni atúmo pa ha wa bara ue.

⁸Ono ka i abí nga gu iradĩ re ya, irakporo ki ye mbembedi koyo du Mbori ni, i wisigi he watadu ni nitaĩ beni sa ga kurani ahe, watadu wo te.

⁹“Rogo pa banda ahe dunduko, watadu si tipa babagara, na dongi, na akandoro, na roko, watadu gini ingiingi he, nga gu pai gu ni sa ka ya ti ni wẽ, ‘Si du re,’ gayo pai wa du yo ue nga ka ye ku bara bangiri Mbori; gu ni Mbori ka sara ngbanga kuti ni, kina ni nikatumo pa ha wa bara ue fu kurani.

¹⁰“Ka boro fu dongi fu kurani, watadu babagara, watadu kandoro, watadu gu zogozogo nya a, ni nibánda ru, u ki kpi, watadu u ki hõ, watadu i ki do ru ku sa yo, ka boro abi nga ha ya,

¹¹gu zungahe nga ga Yekova si ka du dagba yo ue, ya ni ataã nga beni sa ga kurani ahe te; baira nya ki idi he, ka kurani atúmo nga pa ha ya.

¹²Ono ka boro dĩ ru be ni, kina babandaru ki tumo fu bairaru.

¹³Ka nyarinde sipi ru asipa rukutu, ni yé na pasioru si du ni dezirehe; ni atúmo nga tipa gu ru nya nisipi ru te.

¹⁴“Ka boro hõ he be kurani ni bape, si ki gberẽ be ni, watadu kpi, ka bairaha adú nga ho ya, ni atúmo pa ha atumo ni rengo.

¹⁵Ka bairaha du kina ho, ni atúmo nga pa ha te; ka ngia ni afu marã tipa ha, kina gu marã re ki rengbe ku ba ha.

¹⁶“Ka kumba nangi ngasu de nga gu ri i ata pazua nga ri ya, ki ra na ri, ko afú marãde tipa ri nzunzu, ri du ni diako.

¹⁷Ka bari ka pa dia ri ni rengo, ko ki fu marã a wa i nafu he tipa ngasu de.

¹⁸“Ka mo ídi nga ha fu gu de nga binza ri nye ni ungari ya.

¹⁹“Gu boro ka ra na nya, i aímo ni aimo.

²⁰“Gu boro ka atumo fu kura mbori, angia nga kina Yekova ya, i agbárasa ni agbarasa.

²¹“Ka mo mángi nga fu kungba boro gbegberẽ ya, ka mo rúngosi nga ni a ya, bambiko oni adu ni kungba aboro rogo gu ringara nga ga Ezipeta.

²²Ka oni rúngosi nga dekurugbo ya, watadu wirinyaure a ya.

²³Ka oni rúngosi yo si avura du waĩ vurũ, ka i kpári fere mi agia gayo kpe agia ni rengo;

²⁴gi zinga ki rungudi mi ki imi roni aimo ni basape, adiaroni ki du ni adekurugbo, awironi ki du ni awirinyaure.

²⁵“Ka mo fu marã ni bape fu gu ni sa dagba gimi aboro nga gu ni du ni rungorungo ni, mo adú nga fu ni wa irabape te, ka mo adía nga mokiisa be ni ku ri he ya.

²⁶Ka mo di ga kuaro roko ku ba ga marã ni ngbaanga, mo akáraga ha fu ni mbata uru nikati;

²⁷bambiko si nga gani bangisa toko, nga roko dada kpotoni; gini he ni ka ra tii he? Si du ka ko kpári fere, mi agia ha agia, bambiko mi ni weneringi re.

²⁸“Ka mo gbérẽ nga ngbaro yo fu Mbori ya, ka mo sénge nga bazogo ngbatungaro a ya.

²⁹“Mo ípisi tiro ka fu agamahe dagba gamo zuzuahe yo na dagba gamo mbirimbiri ahe yo a. “Gu wiro nga bambata ni mo ka fu ni fere.

³⁰Kina wo mo ka amanga na gamo abaabagara na gamo akandoro; wiru anisungu na nai tipa rame saba; ti muambi rame mo ki fu ru fere.

³¹“Oni ki nidu ni kparakpara aboro ziazia fere; si du oni ka ari nga pasio agu anya ti ni anyarinde nasipa ra ya; oni abáfa ha abafa fu aango.