Read zande Gate 23 Bible Online

Gate 23 - zande bible

Gate 23

¹“Ka mo gbándaka nga gu pai dũ ni zire ya. Ka mo kódi nga tiro na gbegberẽ boro ka du ni irazire dezire ya.

²Ka mo péke nga rimbasa aboro ka amanga gbigbita pai ya; ka mo péke nga rimbasa aboro ni dezire ka irasi sapangbanga ya;

³ka mo íni nga pai fu boro tipa gani ngbanga mbiko ni ni rungorungo ni ya.

⁴“Ka mo gbía ga sogoro babagara watadu gani dongi u naingi, mo ki karaga ru fu ni ni rengo.

⁵Ka mo bí ga sogoro dongi tindiro nazi ru ku sande, ka mo akpí nga nyemu ka unda ru ya, ono ka mo únda ru aunda ni rengo.

⁶“Ka mo írasi nga pa sapa gu ngbanga nga ga rungorungo boro ya.

⁷Mo né gu pai dũ ni iraira ha, ka mo ími nga gu boro amanga nga gbegberẽpai ya ya, na gu ni du ni ruru ni a ya, bambiko mi adía nga pai ri aboro gbegberẽpai te.

⁸Ka mo dí nga marã mobirimo ya, bambiko marã mobirimo ninafu vurari fu agu yo nangera, ki nigbarasi gu ngbanga nga ga ruru aboro.

⁹“Ka oni rúngosi nga kungba boro ya, bambiko oni ini gu pai dũ ku ngbadu kungba boro yo dũ, bambiko wa oni adu ni kungba aboro Ezipeta yo.

¹⁰“Mo ki nirũ he rogo gamo abino, tipa agarã sita ki nidungura aũhe.

¹¹Ono ti saba garã mo ki mbu he, si du ni fute, rungorungo yo dagba gamo aboro yo rengbe na ri he; gu i ka mbu he, anyanvuo ki ri he. Kina wo mo ka amanga tipa ga ati bakakue na ga ati aeraya du na ngua wa banga a.

¹²“Mo amánga ga sunge tipa rame sita, mo ki niongodi ti saba rame; ga babagara na ga dongi ami ki niongodi a, wiri ga moyambu nga de na kungba boro, i ki niba omeyo a.

¹³Oni nirúgu tironi na agu apai dunduko gumba mi pa ha fu roni; ka oni táki nga pande rimo kura ambori ya, ka i nigí nga rimoho ngba roni a ya.

¹⁴“Mo amánga pumbo fere bara biata na agarã.

¹⁵Mo amánga gu pumbo nga ga gu kpokuta adu nga na agbooro ti ni ya; a wa mi arugu ro na ni, tipa arame saba mo ki ri gu kpokuta adu nga na agbooro ti ni ya, ti gu rago i aringbisi he rogo gu diwi nga Abiba, bambiko ni gu diwi re mo akuru Ezipeta yo. A nga boro sa nikaye ku bara bangire ni ku be ni te.

¹⁶Fuo gere mo amánga gu pumbo nga ga dungura aũati si nga amakawa ga sunge, wa mo arũ he rogo ati. Mo amánga gu pumbo a nga ga dunguraahe ti digida garã, ho mo ka adúngura aũati ni nga gu naye mbiko ga sunge.

¹⁷Bara biata na agarã akumba dunduko ka aye ku bara bangiri Gbia MBORI.

¹⁸“Ka mo fú nga gu kure nga ga gi motumo na gu kpokuta du na agbooro ti ni ya, watadu mbu gu nzeme nga ga gi pumbo si nyé ka da ku wiso ya.

¹⁹“Mo ayé na bambata gamo amakawa aũati ku rogo ga Yekova bambu yo nga ga Mbori. “Ka mo pási nga wiri meme na mamu nai ya.

²⁰“Oni ngére, mi nakeda maraika ku mbata yo fu roni, ko abánda roni ngba gaoni gene, ki nigasi roni ku rogo gu ba mi naima mbakada ha.

²¹Oni nigí gako pai ki nidege turoni ka gia sangbako, ka oni zingi nga kuti ko ya, bambiko ko avú nga roni tipa gaoni samungu te; bambiko rimore du rogo ko yo.

²²“Ono ka oni agía fugoko ni rengo, ki nimangi agu apai dunduko mi ka agumba ha, mi adú ni boro vura fu agu yo ka asoga roni, ki du ni irafudifudipai kuti agu yo ka afuda roni.

²³“Bambiko gi maraika nikangbe ku mbata yo fu roni, ki ye na oni koyo du aAmoro ni, na aEto, na aPerezo, na aKanano, na aIvo, na aYebuso, mi ki ba tungayo dũ.

²⁴Ka oni túmusa nga ku sande fu gayo ambori ya, ka oni mángi nga payo watadu manga wa kina yo a ya, ono oni báfu yo abafa kpakaya, ki kuadi gayo duadua ambia rukutu.

²⁵Oni ki nimangi pa Yekova gaoni Mbori, mi ki nifu maku ku ri gaoni riahe, na ku ri gaoni ime; mi ki nidi kaza ku sa yo dagba roni.

²⁶Rogo gaoni ringara gude atí nga ti de wa sa te; irazangada adú nga yo a te; mi adígisa gaoni arame adigisa nzunzu kuti ragoho.

²⁷Mi akéda gi gbudagbuda ku mbata yo fu roni, ki mangi agu aboro dunduko ni fudifudipai oni ka ye koyo du yo ni, si du avuraroni dunduko asá giiyo fu roni.

²⁸Mi akéda abando ku mbata yo fu roni; ami ki nidandi aIvo na aKanano na aEto ku mbata yo fu roni.

²⁹Mi adánda nga yo ku sa yo barangba roni rogo garã sa te, ringara ka du ni vurubate, anyanvuo ka maa pai kuti roni a.

³⁰Mi adánda yo ku sa yo barangba roni yee daho oni ka nge ni ki di kumbo ringara.

³¹Mi ki moi gaoni bangbandarago ti Zamba Baime ki da ti ga aFereseto baime a, na tona ngbakungba yo ki da ti di nga Ferata; mi afú araki rogo gu ringara re ku be roni, oni ki dandi yo bara bangironi ku sa yo.

³²Oni amánga nga mokido na yo na gayo ambori a te.

³³I aráka nga rogo gaoni ringara te, i ka ingisa roni, oni ki ingi pai kuti re; bambiko ka oni amánga pa gayo ambori, ni rengo si adú wa gbina fu roni.”