Read zande Gate 25 Bible Online

Gate 25 - zande bible

Gate 25

¹Yekova ki ya fu Mose,

²“Mo gúmba ha fu awiri aYisaraere, ya i ye na tumbatumba gamahe fere; agu aboro dunduko du nyemuhe kpotoyo yo, mo aróga tumbatumba gamahe be kina yo tipa re.

³Gere nga gu tumbatumba gamahe oni ka rogoda ha be yo; nga dahabu, na feda, na sirigi,

⁴na gire ni gbaya ha, na gu du ngungungu, na gu du ni zamba ha, na ndindii giri nzibi, na mange meme,

⁵na kpoto abaakandoro, nga gu i azamasi he azamasa, na kpoto du wa ga agbodi, na ngua du wa mbegure,

⁶nzeme tipa we, tome fuõngua tipa gu nzeme i nambeda ha, na tipa wene fuõngua,

⁷na agu kikiipa ambia nga oniki, na wene ambia tipa efoda, na tipa mangu ngbaduse.

⁸I mángi kparakpara ba tipa re, ya mi nye dagba yo kindi.

⁹Mo amánga banye, na agu ahe nikadu vuru he yo kina kuti kpia gu mi akayúgo ho foro.

¹⁰“I ka manga sanduki rogo gu ngua du wa mbegure; bagizaha ki du wa bagiza mbiribe ue na bebere he, patihe ki du wa bagiza mbiribe sa na bebere he, na basonaha ki du wa bagiza mbiribe sa na bebere he a.

¹¹Mo ki dadi he ni ndikidi dahabu, vuruhe yo na ti kpotoho a, mo ka dada ha, mo ki mangi he kirikiri rogo dahabu wa kpakpari.

¹²Mo ki taki abenge rogo dahabu biama tipa ha, ki moi ra ti anduhe biama, abenge ue ki du ku pavuruhe ku bani na gu kura abenge ue ki du ku bani.

¹³Mo ki mangi angbongbo rogo gu ngua du wa mbegure, ki dadi he ni dahabu.

¹⁴Mo ki moi angbongbo ku rogo agu abenge nikadu ti pavuru sanduki tipa tinda sanduki ti ni.

¹⁵Agu angbongbo re ki du rogo agu abenge du ti sanduki; i aróga nga ha ku sa yo te.

¹⁶Mo ki moi gu dezirepai mi ka fu foro ku vuru sanduki yo.

¹⁷Mo ki mangi bainapai rogo ndikidi dahabu; bagizaha ki du wa bagiza mbiribe ue na bebere he, pati he ki du wa bagiza mbiribe sa na bebere he.

¹⁸Mo ki mangi kpia akeruba ue rogo dahabu; mo amánga ha rogo tata dahabu, auru bainapai ku bani na ku bani.

¹⁹Mo mángi gu keruba sa ti gu mburuhe ku bani, na gu kura keruba a sa ti gu kura mburuhe; mo amánga akeruba ti amburuhe ue rogo kina gu bete dahabu wa sa na bainapai.

²⁰Akeruba ki zaraga apupoho ku ari ki dadi bainapai na apupoho, kpakpu gu sa ki du sa gu kura ha; kpakpu akeruba ki du koyo du bainapai ni.

²¹Mo ki moi bainapai ku ri sanduki; mo ki moi gu dezirepai mi ka fu foro ku vuru sanduki yo.

²²Yo mi ka angbisa ro ni ki nifura na mo ba ri bainapai, dagba agu akeruba du ue ba ri sanduki dezirepai, tipa agu apai dunduko mi afú foro ni rugute fu awiri aYisaraere.

²³“Mo ki mangi mbisa rogo gu ngua du wa mbegure; bagizaha adú wa bagiza mbiribe ue, patihe ki du wa bagiza mbiribe sa, basonaha ki du wa bagiza mbiribe sa na bebere he.

²⁴Mo ki dadi he ni ndikidi dahabu, ki mangi dahabu wa kina kpakpari pavuru rihe kirikiri.

²⁵Mo ki mangi bangbandaha kirikiri, patihe ki du wa pabe boro, ki mangi dahabu tipa ha kirikiri wa kina kpakpari.

²⁶Mo ki mangi abenge rogo dahabu tipa ha, ki moi ra ti atukpuhe biama nga gu du ti anduhe biama.

²⁷Abenge adú mbembedi na bangbandaha tipa angbongbo nga gu i ka atinda mbisa ti ni.

²⁸Mo ki mangi angbongbo rogo gu ngua du wa mbegure, ki dadi he ni dahabu, ya i nitindi mbisa ti ni.

²⁹Mo ki mangi gaha akurungbu, na abaarikare, na gaha akambu, na gaha ainga tipa uka he na ni; mo amánga ha rogo ndikidi dahabu.

³⁰Mo ki nimoi kpokuta yugopai ri mbisa ku bara bangire na uru dedede.

³¹“Mo ki mangi baduawe rogo ndikidi dahabu. I mángi mburu baduawe na katakpaha rogo tata dahabu; gaha ainga, agorõho, na gaha mbumbuda, i ka manga ha rogo kina gu bete dahabu sa;

³²abehe ki du sita kuru pavuruhe yo, abe gu baduawe re ki kuru biata ku bani, gu kura abehe biata ki kuru ku bani a;

³³i amánga ainga biata wa ambumbuda anzari ti gu behe sa, gorõho sa na mbumbudaha a sa, na ainga biata ni mangimangi he wa kina ambumbuda anzari ti gu kura behe, gorõho sa na mbumbudaha a sa ― kina wo i ka manga tipa agu abehe sita ka kuru ti katakpa baduawe.

³⁴Ti katakpaha i mángi ainga biama wa kina ambumbuda anzari, agorõho na ambumbudaha a,

³⁵gu gorõho sa tii abehe ue, ni mangimangi he sa na ni; kina wo i ka manga tipa agu abehe sita ka kuru ti katakpa baduawe.

³⁶Agorõho na abehe i mángi he rogo kina gu bete dahabu sa, wa du he dunduko i táki he rogo gu bete ndikidi dahabu sa.

³⁷Mo ki mangi awehe saba; i ki tigi awehe, si nihasi rago ku barangba ha.

³⁸Gaha awaza na gaha asaani kingiriwe i amánga ha rogo ndikidi dahabu.

³⁹Oni amánga ha rogo gu taranda sa nga ga ndikidi dahabu du baroãha wa akiro 59, na aũhe dunduko.

⁴⁰Mo ki bi he ya mo mángi he kuti gu kpiaha i ayugo ho foro ri bagangara yo.