Read zande Gate 27 Bible Online

Gate 27 - zande bible

Gate 27

¹“Mo ki mangi bamotumo rogo gu ngua du wa mbegure, bagizaha ki du wa bagiza mbiribe bisue, na patihe wa bagiza mbiribe bisue a; bagiza pavuru bamotumo adú biama wa sa, basonaha ki du wa bagiza mbiribe biata.

²Mo ki mangi gaha agbanga ti atukpuhe biama; agu agbangaha ki du na ni wa he sa, mo ki dadi he ni sirigi.

³Mo ki mangi gaha aakoro ka aroga akuke ku sa yo na ni, na aũndukuda akuke na akurungbu, na gaha angorã tipa pasio na aũkpanawe; aũbamotumo dunduko mo amánga ha rogo sirigi.

⁴Mo ki mangi piomarã tipa ha rogo sirigi; ki mangi abenge biama rogo sirigi ti pio ti atukpuhe biama.

⁵Mo ki moi he ku tii gu purangi ka du pati bamotumo kirikiri, pio ki da ku bebere pavuru bamotumo.

⁶Mo ki mangi angbongbo tipa bamotumo, nga angbongbo rogo gu ngua du wa mbegure, ki dadi he ni sirigi;

⁷i ki moi angbongboho ku rogo abenge yo, angbongbo ki du ti apavuru bamotumo ue, ho i ka atinda ha ni.

⁸Mo amánga ha na apurangi, du vuru he yo ni ku he; wa i ayugu pa ha foro ri bagangara yo, kina wo i ka manga ha.

⁹“Mo ki mangi vurukporo nga ga banye. Asiasi aroko tipa vurukporo ki du ni tutu he ni ndindii giri nzibi tipa pavuruhe ku sudiyo, bagizaha adú wa bagiza mbiribe 100;

¹⁰adangbaha adú 20, na anduhe 20 ni sirigi, ono angorã adangba na gaha angbongbo ka du ni feda.

¹¹Asiasi aroko ki du a wo tipa gu pavuruhe du ku nodiyo, bagizaha ki du wa bagiza mbiribe 100, adangbaha ki du 20 na anduhe 20 ni sirigi, ono angorã adangba na gaha angbongbo ki dú ni feda.

¹²Asiasi aroko ki du a tipa pati vurukporo ku dioyo, bagizaha ki du wa bagiza mbiribe 50, adangbaha adú bawe na anduhe bawe a.

¹³Bagiza pavuru vurukporo ku uroyo ki du wa bagiza mbiribe 50.

¹⁴Bagiza asiasi aroko tipa pavuru ngbadimo ku bani ki du wa bagiza mbiribe 15, adangbaha ki du biata, na anduhe biata a.

¹⁵Bagiza asiasi aroko tipa pavuru ngbadimo ku bani a ki du wa bagiza mbiribe 15, adangbaha ki du biata, na anduhe biata a.

¹⁶Asiasi roko adú tipa ngbadimo vurukporo, bagizaha ki du wa bagiza mbiribe 20, i amánga ha ni gire ni gbaya ha, na gu du ngungungu, na gu du ni zamba ha, na tutu ndindii giri nzibi, ni gu sunge nga ga bangbasia kendegaahe; adangbaha adú biama, na anduhe biama a.

¹⁷Agu adangba dunduko nikadu pati vurukporo kirikiri si adú ni zunguzungu he na angbongboho ni feda; angorãha ki ngia feda, na anduhe ki ngia sirigi.

¹⁸Bagiza vurukporo adú wa bagiza mbiribe 100, pavuruhe ki du wa 50, basonaha ki du wa bagiza mbiribe bisue, asiasi aroko adú ni tutu giri nzibi, na anduhe ni sirigi.

¹⁹Aũ banye nga gu du tipa sunge he dunduko na aneri he dunduko, na aneri tipa vurukporo dunduko, i amánga ha rogo sirigi.

²⁰“Mo arúga awiri aYisaraere, i yé na ziazia nzeme du wa nzeme banga nga gu i asuka ha tipa tara, we nikí akĩ kindi.

²¹Arona na awiriko abánda paha tona nyemu ki da ku wiso bara bangiri Yekova, rogo bamburoko dungurati yo ku gii roko kparaba yo du barangba dezirepai. Si adú ni rugapai nye anye kindi awiri aYisaraere nimángi he dagba arika ngbatungayo dunduko.