Read zande Gate 28 Bible Online

Gate 28 - zande bible

Gate 28

¹“Mo yé na Arona nga unvuruamo dagba awiri aYisaraere yo, ki mbedisi ko na mo, na awiriko na ko a, i mangi pare rogo pa ga boromotumo sunge ― nga kina aArona, na awiri Arona nga Nadaba, Abiu, Erazara, na Itamara.

²Mo ki mangi kparakpara ziazia aroko tipa Arona nga unvuruamo, tipa taarimo na tipa ko du ni betedi ko.

³Mo ki gumba pai fu agu yo dunduko du na tatamana kpotoyo yo, nga agu yo mi ahisi kpotoyo yo na toro tatamana, ya i mángi ga Arona aroko ka kpara ko, ko nimángi pare rogo pa ga boromotumo sunge.

⁴Gere nga agu aroko i ka manga ha: mangu ngbaduse, na efoda[1], gbanga roko, na roko kuari ni kendegekendege he, na kaĩkaĩ rokori, na giri dimose; i ki mangi ziazia aroko tipa Arona nga unvuruamo na awiriko ya i mangi pare rogo pa ga boromotumo sunge.

⁵“I afú dahabu fu agu yo namanga aroko na gire ni gbaya ha, na gu du ngungungu na gu du ni zamba ha, na tutu ndindii giri nzibi.

⁶I ki mangi efoda rogo dahabu yo, na gire ni gbaya ha, na gu du ngungungu, na gu du ni zamba ha, na tutu ndindii giri nzibi, ni gu sunge nga ga bangbasiaha.

⁷Si adú na agire ue ti pagorõho ni kpamiakpamia ha ti angbaha ue, si dú ni kpamiakpamia ha wa sa.

⁸Na gu gire ka du ti ni, ni tutu he ni tatamana ka vo ho na ni, si adú wa sa na ni, ni mangimangi he wa kina ha a, ni dahabu, na gire ni gbaya ha na gu du ngungungu, na gu du ni zamba ha, na tutu ndindii giri nzibi.

⁹Mo ki rogo ambia ue, gu i niya ti ni oniki, ki gbaki rimo awiri aYisaraere ti ni,

¹⁰rimoyo ki du sita ti gu mbia sa, na rimo agu yo sita nanye ki du ti gu kura mbia ringbisi he kina kuti rago pa batika yo.

¹¹Mo agbáka rimo awiri aYisaraere ti agu ambia ue re wa bagbakimbia nagbaka marãido; mo ki moi he ku rogo ũzadahe ni dahabu.

¹²Mo ki moi agu ambia re ku auru agire pagorõ efoda si dú ni ambia tingidapai fu awiri aYisaraere; Arona ki nitindi arimoyo auru apagorõko ue bara bangiri Yekova ni tingidapai.

¹³Mo ki mangi ũzadahe rogo dahabu,

¹⁴na azogbo ue rogo ndikidi dahabu, ni udiudi he wa kina agire; mo ki kpira gu udiudi azogbo re kuti ũzadahe.

¹⁵“Mo ki mangi mangu ngbaduse nga ga sapangbanga ni sunge bangbasiaha; mo amánga ha wa kina sunge efoda; mo amánga ha rogo dahabu, na gire ni gbaya ha, na gu du ngungungu, na gu du ni zamba ha, na tutu ndindii giri nzibi.

¹⁶Bagiza pavuruhe biama adú wa sa, ki du ni minamina ha ue, bagizaha ki du wa bazaraga awirinzaga bara sa, patihe ki du wa bazaraga awirinzaga bara sa a.

¹⁷Mo ki moi wene ambia ku auru he ti agenehe biama. Bambata genehe ki ngia sadio, topazo na bareketa;

¹⁸ue genehe ki ngia zumeradi, safero, na yaroma;

¹⁹biata genehe ki ngia yakino, sebu, na amesute;

²⁰biama genehe ki ngia berure, oniki, na yasipi; i amáa ha ku rogo dahabu ni ba sa sa si zádi he.

²¹Ambia adú 12 ringbisi he kina kuti rimo awiri aYisaraere, a wa du arimoyo; si adú tipa ngbatungayo 12, ambia dunduko ki du ni ba sa sa na rimo gu ngbatunga sa ti ni ni gbakigbaki he wa marãido.

²²Mo ki mangi azogbo tipa mangu ngbaduse wa udiudi gire rogo ndikidi dahabu;

²³mo ki mangi abenge rogo dahabu ue tipa mangu ngbaduse, ki moi ra ti pangba mangu ngbaduse ue.

²⁴Mo ki moi gu udiudi azogbo ue re du ni dahabu ti agu abenge ue du ti pangba mangu ngbaduse;

²⁵mburu gu udiudi azogbo ue re mo amáa ha ti gu ũzadahe ue re, ki tapa ha ti agu agire ue du pagorõ efoda yo ku barangba ha yo.

²⁶Mo ki mangi abenge rogo dahabu ue, ki moi ra ku auru amburu mangu ngbaduse ue ti pavuruhe nga gu du mbembedi na efoda ku pati he.

²⁷Mo ki mangi abenge rogo dahabu, ue, ki moi ra ti gire pagorõ efoda yo ku tii he yo nga gu du barangba ha, mbembedi na bazungaha ku ri giri efoda, nga gu i ka tu he ni tatamana.

²⁸I ki kpira abenge mangu ngbaduse kuti abenge efoda na gire ni gbaya ha, ya si ki du auru giri efoda nga gu i ka tu he ni tatamana, ka mangu ngbaduse agúari nga pati efoda ya.

²⁹Arona ki nitindi rimo awiri aYisaraere auru mangu ngbaduse nga ga sapangbanga ri ngbaduko, ho ko ka andu ni ku rogo kparakpara ziazia ba yo, ni nyenye tingidapai ku bara bangiri Yekova kindi.

³⁰Mo ki moi Urima na Tumima[2] ku rogo mangu ngbaduse nga ga sapangbanga, si ki du ri ngbadu Arona ho ko ka arima ni ku bara bangiri Yekova; si du Arona atínda pa gu sapangbanga ri ngbaduko nga ga awiri aYisaraere ku bara bangiri Yekova kindi.

³¹“Mo amánga gu gbanga roko nga ga efoda na gire ni gbaya ha.

³²Si ki du na yaro beberehe yo tipa ri boromotumo, i arúngo tutu roko ti ngba yaroho kirikiri, wa gu nga ga rokovura, ya ka si síri nga ya.

³³Mo ki mangi kpia zuzuhe wa andavu ti ngbaha ku sende kirikiri ni gire ni gbaya ha, na gu du ngungungu, na gu du ni zamba ha, ki mangi anzorõ rogo dahabu ku dagba ha kirikiri,

³⁴nzorõ dahabu sa, na ndavu a sa, nzorõ dahabu sa na ndavu a sa, ti ngba gbanga roko ku sende kirikiri.

³⁵Si ki nidu ti Arona tipa sunge mangapase, aboro nigí woroho ho ko ka andu ni ku rogo kparakpara ziazia ba yo ku bara bangiri Yekova, na ho ko ka akura ni ku zegi yo a, ko ka ndu ka kpi.

³⁶“Mo ki mangi saani ni kpasakpasa ha, rogo ndikidi dahabu ki gbaki pai ti ni wa i nigbaki marãido, nga ‘KPARAKPARA HF ZIAZIA FU YEKOVA.’

³⁷Mo ki moi he ti pio gire du ni gbaya ha ti kaĩkaĩ rokori; si asá ha ku barangba kaĩkaĩrokori.

³⁸Si ki du ti kpakpu Arona. Arona ki nitindi gu irairapai nga ga kparakpara ziazia ahe nga gu awiri aYisaraere ka kpara ha rogo gayo kparakpara ziazia gamahe dunduko; si ki nidu ti kpakpuko kindi, ya gayo ziazia gamahe ngba ku bangiri Yekova.

³⁹“Mo ki tu roko kuari ni ndindii giri nzibi ni gu kendegahe du ni kpakakpaka ha, mo ki mangi kaĩkaĩ rokori ni tutu ndindii giri nzibi, mo ki mangi giri dimose ni gu sunge nga ga bangbasia kendegaahe.

⁴⁰“Mo ki mangi aroko kuari tipa awiri Arona, na agiri dimose na akutuku tipa yo a, mo amánga ha tipa taarimo na tipa du yo ni betedi yo.

⁴¹Mo ki ukadi Arona nga unvuruamo na ni, na awiriko a, ki mbedi yo na nzeme, ki dika yo, ki kpara yo, i nimángi pare rogo pa ga aboromotumo sunge.

⁴²Mo ki mangi aroko sorondu ni giri nzibi, ka dada kundiri yo; si atóna ti dimoyo ki da ti rukusuyo;

⁴³si ki nidu ti Arona, na ti awiriko ho i ka andu ni ku tii bamburoko dungurati yo, watadu ho i ka ambeda ni na bamotumo ka amanga pai rogo kparakpara ziazia ba yo; i ka du na irairapai ku ri yo ki kpiki. Si adú ni rugapai fu ko na fu atitako fuo ko, nye anye kindi.