Read zande Gate 29 Bible Online

Gate 29 - zande bible

Gate 29

¹“Gere nga gu pai mo ka manga fu yo, ya i dũ ni kparakpara yo, ka amanga pare rogo pa ga aboromotumo sunge. Mo dí paranga babagara sa na abaakandoro ue zanga serõ ti ra,

²na gu kpokuta adu nga na agbooro ti ni ya, na gu rukutu zozo akpokuta adu nga na agbooro ti ni ya, kodi yo ho na nzeme, na ayaaya kpokuta zanga agbooro, gu uka yo nzeme ku auru he. Mo amánga ha na wene ridiridi ngungo nganu.

³Mo ki moi he ku rogo baga sa, ki ye na ni rogo baga, na babagara na abaakandoro ue.

⁴Mo ki ye na aArona, na awiriko a ku ngbadimo bamburoko dungurati yo, ki zundu yo na ime.

⁵Mo ki di aroko, ki ukadi Arona na roko kuari, na gu gbanga roko nga ga efoda, na efoda, na mangu ngbaduse, ki vo bawene giri efoda dimoko i atu he ni tatamana;

⁶mo ki moi kaĩkaĩ rokori ku riko yo, ki moi gu kpakpari du ni kparakpara ha ziazia ku auru rokori.

⁷Were, mo ki di nzeme mbeda, ki uka ha ku riko yo, ki mbedi ko.

⁸Mo ki ye na awiriko a ki ukadi yo ni aroko kuari,

⁹mo ki vodi yo na agiri dimose, ki moi akutuku ku riyo yo; i ki nidu na pa du ni boromotumo ti yo mbiko nyenye rugapai. Were mo ka dika aArona na awiriko.

¹⁰“Mo ki ye na babagara ku barangba bamburoko dungurati. AArona na awiriko ki moi beyo ku auru ri babagara,

¹¹mo ki imi babagara bara bangiri Yekova pati ngbadimo bamburoko dungurati,

¹²mo ki di bete kure babagara ki moi he auru agbanga bamotumo na awirinzagaro, yangara kure mo ki uka ha dunduko pati mburu bamotumo.

¹³Mo ki di gu nzeme dunduko du ti aũvuru babagara yo, ki di ngbebe pavuru enderu na agbiiri ue, na gu nzeme du ti ni, ki zo ho ku ri bamotumo.

¹⁴Ono pasio babagara, na kpotoru a, na regboru, si mo ka nizó ho azo ku zegi gii bataya yo; si nga motumo ingapai.

¹⁵“Mo ki di gu bakandoro sa a, aArona na awiriko ki moi beyo ku auru ri bakandoro,

¹⁶mo ki imi bakandoro, ki di kureru ki migidi he kirikiri dunduko kuti bamotumo.

¹⁷Mo ki yepe gu bakandoro re rukutu, ki zundu aũvuru yo na anduru, ki moi he ku pati pasioru na riru,

¹⁸mo ki zo bakandoro na ba ru dunduko ku ri bamotumo; si nga zozo motumo fu Yekova; du ni guzuguzu fuõhe nga gu gamahe i namanga ha ni we fu Yekova.

¹⁹“Mo ki di gu kura bakandoro; aArona na awiriko ki moi beyo ku auru ri bakandoro,

²⁰mo ki imi ru, ki di bete kureru, ki moi he ti ngba kpetu Arona ku kumbabeko yo, na ti ngba kpetu awiriko yo dunduko, ku kumbabeyo yo, na ti abawirinzagakumbabeyo, na ti abawirindu kumbanduyo dunduko, mo ki migidi yangara kure kuti bamotumo kirikiri.

²¹Mo ki di bete gu kure du auru bamotumo, na gu nzeme mbeda, ki migidi he ku ri Arona na gako aroko, na ku ri awiriko na gayo aroko a; ko ki du ni kparakpara ko, na gako aroko a, awiriko a na gayo aroko wa sa.

²²“A wo mo ka adia nzeme bakandoro, na nzeme saru, na gu nzeme du ti aũvuru yo, na ngbebe pavuru enderu na agbiiri ue, na gu nzeme du ti ni, na kumbambosoru, bambiko u nga bakandoro dikatise,

²³mo ki di zozo kpokuta sa baga yo adu nga na agbooro ti ni ya, du bara bangiri Yekova;

²⁴mo ki momoi agi ahe dũ re ku be Arona yo, na ku be awiriko yo, ki wo ti beyo ni wowoti motumo ku bangiri Yekova.

²⁵Mo ki rogo ho be yo, ki zo ho ri bamotumo, na zozo motumo, ni guzuguzu fuõhe bara bangiri Yekova; si nga gu gamahe i namanga ha ni we fu Yekova.

²⁶“Mo ki di ngbadu ga Arona bakandoro dikatise, ki wo ti ni ni wowoti moiumo ku bangiri Yekova; si ki du ni gu bete he nga gamo.

²⁷Mo ki kpara ngbadu bakandoro nga ga wowoti motumo na gu mbosoru nga ga aboromotumo he, nga gu i awo ti ni nga tumbatumba motumo, nga bakandoro dikatise, bambiko wo du he tipa Arona na awiriko.

²⁸Si adú tipa Arona na awiriko ni gayo he be awiri aYisaraere nye anye kindi, bambiko si nga ga aboromotumo he, awiri aYisaraere ka afu he dagba gayo amotumo zereda; si nga gayo tumbatumba motumo fu Yekova.

²⁹“Gu kparakpara ziazia aroko nga ga Arona si adú tipa awiriko fuo ko a, ya i niukadi he rago mbeda yo yo na nzeme, na rago dika yo a.

³⁰Gu wiriko i ka maa ko ni boromotumo ku ba ko, ko aúkadi he tipa rame saba, ho ko ka arima ni ku rogo bamburoko dungurati yo ka amanga pai rogo kparakpara ziazia ba.

³¹“Mo ki di gu bakandoro nga ga dikatise ru ki pasi pasioru rogo gu kparakpara ba;

³²aArona na awiriko ki ri pasio gu bakandoro re, na gu kpokuta du baga yo, ngbadimo bamburoko dungurati yo.

³³I ki ri agu ahe i amangi pa dada ingapai na ni, ka dika ha, na ka kpara ha, ono ka kungba boro arí nga ha ya, bambiko si ni kparakpara he ziazia.

³⁴Ka ngia yangara pasio nye nga ga dikatise, watadu kpokuta, ki da ku wiso, mo azó ho azo; ka i ari nga ha ya, bambiko si ni kparakpara he ziazia.

³⁵“Were mo ka amanga fu aArona na awiriko, a wa mi arugu ro na ni dunduko; mo adíka yo rame sunge he ki du saba,

³⁶mo ki nifu babagara na uru, ni motumo tipa dada ingapai. Mo ki fu motumo ingapai a tipa bamotumo, ho mo ka manga pa dada ingapai ni tipa ha, mo ki mbedi he ka kpara ha ziazia.

³⁷Tipa rame saba mo amánga pa dada ingapai ri bamotumo ki kpara ha, bamotumo ki du ni kparakpara he ziazia ki susi; gu he ka zadi bamotumo si ki sa tihe ni kparakpara ha ziazia a.

³⁸“Were, gere nga gu mo ka afu he auru bamotumo: awiri akandoro ue du garãra sa mo ka afu ra na uru na auru kindi.

³⁹Gu wiri kandoro sa mo ka fu ru na awiso, na gu kura ru sa mo ki nifu ru na anyemu;

⁴⁰gu bambata wiri kandoro mo afú ru na bete ngungo, wa aritere biata na beberehe, ni kodikodi he na gu nzeme i asuka ha asuka fufurũ wa ritere sa na beberehe, na imekakue wa ritere sa na beberehe a tipa motumo mbirimbiri he.

⁴¹Gu kura wiri kandoro mo afú ru nyemu, mo afú ru na gu motumo nga ga riahe a wa ga wiso ru, ni guzuguzu fuõhe, nga gu motumo i amánga ha ni we fu Yekova.

⁴²Si adú ni zozo motumo i ka atúmo na ni na uru dagba rika ngbatungaroni kindi, pa ngbadimo bamburoko dungurati yo bara bangiri Yekova, kina yo mi ka angbisa roni ni, ki nifura na mo.

⁴³Yo mi ka angbisa awiri aYisaraere ni, gi taarimo akpára Banye ni ziazia ha;

⁴⁴mi asá bamburoko dungurati ni kparakpara ha, na bamotumo a; aArona na awiriko mi akpára yo a wo, i nimángi pare rogo pa ga boromotumo sunge.

⁴⁵Mi ki nye dagba awiri aYisaraere, ki du ni gayo Mbori.

⁴⁶I ki ini he ya, mi nga Yekova nga gayo Mbori, nakusi yo ringara Ezipeta yo, ya mi nye dagba yo; mi nga Yekova nga gayo Mbori.