Read zande Gate 3 Bible Online

Gate 3 - zande bible

Gate 3

¹Were Mose naabanda ga Yetero rimbasa anya nangia gbioko, gu boromotumo nangia ga Midiana. Ko ki ngbe fu rimbasa anya ku mbata yo ku gii rago ku ngbakungba yo, ko ki da ku Orebe yo nangia ga Mbori bagangara.

²Ga Yekova maraika ki yugu tiko fu ko rogo mirã we bebere yegbende ngua yo. Oni ngére, ko ki bi yegbende ngua naagbi be we, ono ka si arita nga ha ya.

³Mose ki ya, “Mi aké koyo, ka bi gi iiriwo pai re, tipagine yegbende ngua arita nga ti ni be we ya.”

⁴Ho Yekova abi he ni ya ko ake koyo ka bi he, Mbori ki yambu ko bebere yegbende ngua yo, ki ya, “Mose, Mose!” Ko ki ya, “Mi du re.”

⁵Ko ki ya, “Ka mo mbédi nga kono ya; mo úru rakata nduro yo bambiko gu rago ru mo rogo re kparakpara sende du.”

⁶Fuo ho ko ki ya, “Mi nga ga bamo Mbori, nga ga Abarayama Mbori, nga ga Yisaka Mbori, nga ga Yakoba Mbori.” Mose ki vagadi kpakpuko, bambiko ko agunde agunde ti bi Mbori.

⁷Yekova ki ya, “Mi bi gu imisiri nga ga gimi aboro du Ezipeta yo ni rengo, ki gi gayo kpe be gayo abanyakasi pa sunge, bambiko mi ini pa gayo aima,

⁸mi zorõ ka batasa yo be aEzipeto ka kusa yo rogo gu ringara re ku rogo wene kikii ringara, ku rogo gu ringara du adu na mamuanya na nzeme anyege kpaima, nga gu rago ho du aKanano ni na aEto, aAmoro, aPerezo, aIvo na aYebuso.

⁹Mo ngére, awere ga awiri aYisaraere kpe si da kono du mi ni. Mi bi gu mbusa aEzipeto ambusa yo na ni a.

¹⁰Mo yé tie, mi ki kedi ro koyo du Faro ni, mo kúsi gimi aboro nga awiri aYisaraere Ezipeta yo.”

¹¹Mose ki ya fu Mbori, “Da nga mi, ka ndu koyo du Faro ni, ka kusa awiri aYisaraere Ezipeta yo?”

¹²Mbori ki ya, “Mi adú na mo ni rengo; gere nikadu ni yuguyugupai ya mi kedi ro: ho mo ka kusa aboro ni Ezipeta yo, mo amánga pa Mbori ri gi bagangara re.”

¹³Mose ki ya fu Mbori, “Mo ngére, ka mi dá yo du awiri aYisaraere ni, ki ya fu yo, ‘Gu Mbori nga ga abaroni ko kedi re kono du oni ni,’ fuo gure i ki sana re, ‘Rimoko nga da?’ Mi ayá fu yo waĩ?”

¹⁴Mbori ki ya fu Mose “Mo yá fu yo rimore nga MI NGA GU NGA MI.” Ko ki ya fu ko a, “Mo gúmba gere fu awiri aYisaraere, ya, ‘MI NGA kedi re kono du oni ni.’ ”

¹⁵Mbori ki ya fu Mose a, “Mo gúmba gere fu awiri aYisaraere, ‘Yekova nga ga abamo Mbori, nga ga Abarayama Mbori, nga ga Yisaka Mbori, nga ga Yakoba Mbori, kedi re kono du oni ni’: gi nga rimore re kindi, wo i ka tingida pare fu arika ngbatunga aboro dunduko.

¹⁶Mo ndú, ki dungura ga aYisaraere abaakumba, ki ya fu yo, ‘Yekova nga ga abaroni Mbori, nga ga Abarayama Mbori, nga ga Yisaka ko, nga ga Yakoba ko, ko ayugu tiko fere, ki ya, “Mi ye kono du oni ni ni rengo, ki bi gu pai i namanga roni na ni Ezipeta yo;

¹⁷mi ki ya mi akúsa roni be gu imisiripai nga ga Ezipeta, ki ndu na oni ku rogo gu ringara nga ga aKanano, aEto, aAmoro, aPerezo, aIvo na aYebuso, nga gu ringara du adu na mamuanya na nzeme anyege kpaima.”’

¹⁸I adéga tuyo ka gia sangbaro. Oni na ga aYisaraere abaakumba ki ndu koyo du bakindo aEzipeto ni ki ya fu ko, ‘Yekova nga gu Mbori nga ga aEbere ko, ko angbisi rani, Awere ani nazungadi ro, mo ídi he fu rani, ani ndú ki ra gene biata ku ngbakungba yo, ani ki tumo fu Yekova gaani Mbori.’

¹⁹Mi ini ya bakindo aEzipeto aída nga ha fu roni oni ndú te, oõ, zegino te.

²⁰Mi atáã bere, ki gbarasi Ezipeta na gimi iiriwo mangaapai dunduko nga gu mi ka manga ha dagba yo. Fuo gure ko aída ha fu roni oni ndú.

²¹Mi ambákada rimo agi aboro re bangiri aEzipeto; si adú wa gere, ho oni ka guari ni, oni akúra nga yo ni ku beroni te,

²²ono ade dunduko i nikasana akurayo, na agu yo nasunga kpuyo yo, i fú afongo fu yo nga ga feda, na ga dahabu, na aremu a. Oni ki fongo awironi na ni nga akumba na ade a; were oni agbú ahe tie be aEzipeto.”