Read zande Gate 30 Bible Online

Gate 30 - zande bible

Gate 30

¹“Mo ki mangi bamotumo tipa zo fuõngua auru he; mo amánga ha rogo gu ngua du wa mbegure.

²Bagiza ha adú wa bagiza mbiribe sa, patihe ki du wa bagiza mbiribe sa, bagiza pavuruhe biama adú wa sa, basonaha ki du wa bagiza mbiribe ue; i ki mangi agbangaha si ki du na ni wa sa.

³Mo ki dadi kpotoho ni ndikidi dahabu, rihe, na pavuruhe kirikiri, na agbangaha a; mo ki mangi he kirikiri rogo dahabu wa kpakpari.

⁴Mo ki mangi abenge rogo dahabu ue tipa ha; tii akpakpari he yo ti pangba apavuruhe ue ku bani na ku bani, si adú tipa angbongbo ka tinda ha ti ni.

⁵Mo ki mangi agu angbongbo re kina rogo ngua du wa mbegure ki dadi he ni dahabu.

⁶Mo ki moi he barangba gu roko kparaba du pati sanduki dezirepai, ku barangba bainapai du ku ri dezirepai, yo mi ka angbisa ro ni.

⁷Arona nikazo wene fuõngua auru he; na awiso ho ko ka ambakada awe ni, ko ki nizo ho,

⁸ho Arona ka nitigi awe ni na anyemu ko anizo ho a, si ki ningia gu fuõngua nye anye kindi ku bara bangiri Yekova tipa rika angbatungaroni dũ.

⁹Oni atúmo nga na kungba fuõngua auru he, na zozo motumo, na gu motumo nga ga riahe te; oni aúka nga mbirimbiri motumo ku auru he a te.

¹⁰Arona animangi pa dada ingapai ri agbangaha bara sa na garã na agarã; ko amánga pa dada ingapai tipa ha bara sa na garã na agarã ni kure gu motumo du tipa ingapai, nga gu nga ga dada ingapai, dagba arika ngbatungaroni dunduko; si ni kparakpara he ziazia fu Yekova ki susi.”

¹¹Yekova ki ya fu Mose,

¹²“Ho mo ka geda bange awiri aYisaraere ni ki ini pa bange yo, akumba ki fu motumo dunduko fu Yekova tipa mbisimoyo, ho mo ka geda yo ni, gberãngbi ka ye ku dagba yo yo ho mo ka geda yo ni.

¹³Agu aboro dunduko ni ba sa sa ka susi tipa geda yo yo i afú bebere sekere sa ringbisi he na pa gu sekere nga ga kparakpara ba, (sekere sa nga agera 20), bebere sekere ki du ni tumbatumba gamahe fu Yekova.

¹⁴Agu yo dunduko ka susi tipa geda yo yo, garãyo nidu 20 watadu susi he, i ki fu gu tumbatumba gamahe nga ga Yekova.

¹⁵Ho aboro ka fu gu tumbatumba gamahe ni nga ga Yekova ka manga pa gayo dada ingapai, airakumuko afú nga ha ki susi bebere sekere sa te, ka rungorungo aboro afú nga ha si ki kpa ti bebere sekere sa a ya.

¹⁶Mo ki di gu marã re be awiri aYisaraere tipa manga pa dada ingapai, ki kpara ha sa sunge bamburoko dungurati; ya si du ni ũtingidapa bara bangiri Yekova tipa awiri aYisaraere ka manga pa dada ingapai tipa yo.”

¹⁷Yekova ki ya fu Mose,

¹⁸“Mo amánga akurungbu a rogo sirigi, ndu mburuhe ki du kina rogo sirigi a, tipa zundatise. Mo ki moi he dagba bamburoko dungurati na bamotumo, ki uka ime ku rogo ho,

¹⁹aArona na awiriko i ki nizundu beyo na nduyo yo.

²⁰Ho i ka andu ni ku bamburoko dungurati yo, i ka azunda tiyo na ime, ya ka i kpiki nga ya, watadu ho i ka nimbedi ni na bamotumo ka amanga pai, ka zo gu motumo i amanga ha ni we fu Yekova.

²¹Si du i ka nizundu beyo ti ni na nduvo, ka i kpiki nga ya: si ki du ni rugapai fu yo nye anye kindi, fu kina ko na fu atitako a tipa arika ngbatungayo dunduko.”

²²Ku ri gere, Yekova ki ya fu Mose,

²³“Mo dí gi bawene fuõngua re: nga ziazia tome mure wa akiro muambi na agarama 400, na wene fuõ sisi ngua nga kinanona wa beberehe nga akiro biama na agarama 200, na wene fuõ nzinziri koko wa akiro biama na agarama 200,

²⁴na sisi kinanona wa akiro muambi na agarama 400, ringbisi he dunduko kuti pa barõa gu sekere nga ga kparakpara ziazia ba, na nzeme ngua wa banga wa aruere sita;

²⁵mo ki mangi agi ahe re ni kparakpara ziazia nzeme tipa mbeda ha ni kodikodi he wa abangbasiaha namanga ha; si ki du ni kparakpara ziazia nzeme tipa mbeda ha.

²⁶Mo ki mbedi bamburoko dungurati na ni, na sanduki dezirepai a,

²⁷na mbisa, na gaha aũsunge dunduko, na baduawe na gaha aũsunge, na bamotumo nga ga fuõngua,

²⁸na gu bamotumo nga ga zozo motumo na gaha aũsunge dunduko, na kurungbu zundatise na ndu mburuhe a;

²⁹mo ki kpara ha si du ni kparakpara ziazia ha ki susi; gu he ka azada ha si ki du ni kparakpara ziazia he a.

³⁰Mo ki mbedi Arona na awiriko ki kpara yo, i nimángi pare rogo pa ga aboromotumo sunge.

³¹Mo ki gumba pai fu awiri aYisaraere, ki ya, ‘Gere nikangia kparakpara ziazia nzeme mbeda fere dagba arika ngbatungaroni dunduko.

³²Ka i aúka nga ha ku ti kpoto kura aboro ya, ka oni amánga nga gu kura ha wa kina ha a ya; si ni kparakpara ha ziazia, si ki du adu ni kparakpara ziazia he fu roni.

³³Gu boro ka mangi gu wa kina ha, watadu ka uka ha kuti kungba boro i akpára ni ku sa yo ti gani aboro.’ ”

³⁴Yekova ki ya fu Mose, “Mo di wene fuõngua, na tomengua, na wene fuõ ngbaandi, na wene tomengua nga garabana, na fuõngua, wa sa na fuõngua du wa tomegiwi, (barõaha dunduko ki du wa sa),

³⁵mo ki mangi wene fuõngua na ni, wa abangbasiaha namanga ha, ki ba tikpo ti ni, ni gigiri he, ni kparakpara ha ziazia;

³⁶mo ki suka gu ni umba ha tubutubu, ki moi bete he barangba dezirepai tii bamburoko dungurati yo, yo mi ka angbisa ro ni; si adu fu roni ni kparakpara ziazia he ki susi.

³⁷Gu wene fuõngua mo ka manga ha ringbisi he na kina pa manga ha, ka oni amánga nga ha tipa roni ya; si adu tipa roni ni kparakpara ziazia he fu Yekova.

³⁸Gu boro ka mangi gu wa kina ha, ka gia fuõ ho, i akpára ni ku sa yo ti gain aboro.”