Read zande Gate 31 Bible Online

Gate 31 - zande bible

Gate 31

¹Yekova ki ya fu Mose,

²“Mo bí, mi ayambu Besarere ti rimoko nga wiri Uri, Uri angia wiri Ura, ni ngbatunga Yuda:

³mi hisi ko ni gu Toro nga ga Mbori ko, na tatamana, na rugatise na pai, na inahe, na rogo pa manga ngbatunga asunge dunduko,

⁴ka asanga pa asunge nga gu sunge du rogo dahabu, na rogo feda, na rogo sirigi,

⁵na rogo pa seka kikiipa ambia tipa maa ha ku rogo ũzadahe, na rogo pa seka ngua, ka manga ngbatunga asunge dunduko.

⁶Mo ngére, mi moi Oriaba na ko a, nga wiri Aisamaka ni ngbatunga Dana; mi moi tatamana ku kpoto agu yo yo nga airainahe, ya i mangi agu ahe dunduko nga gu mi arugu ro na paha nga:

⁷gu bamburoko dungurati, sanduki dezirepai, gu bainapai du auru he, na au bamburoko dunduko,

⁸mbisa na gaha aũsunge, na ziazia baduawe na gaha aũsunge dunduko, na gu bamotumo nga ga fuõngua,

⁹na gu bamotumo nga ga zozo motumo na gaha aũsunge dunduko, na kurungbu zundatise na andu mburuhe,

¹⁰na wene tutu roko mangasunge, na gu kparakpara ziazia aroko du tipa Arona nga boromotumo, na agu aroko du tipa awiriko ka amanga pai rogo pa ga aboromotumo sunge,

¹¹na gu nzeme mbeda, na gu fuõngua nga ga wene fuõ tomengua du tipa kparakpara ba. I amánga ha a wa mi arugu ro na paha dunduko.”

¹²Yekova ki ya fu Mose,

¹³“Mo yá fu awiri aYisaraere, ‘Oni aká kuti na gimi asabiti ni rengo, bambiko si nga yuguyugupai dagba rani na oni, dagba arika ngbatungaroni dunduko, oni íni he ya mi nga Yekova nakpara roni.

¹⁴Oni aká kuti pa sabiti ni rengo, bambiko si ni kparakpara ziazia uru fu roni; agu yo dunduko ka airisa nga ha ya, i aimo yo aimo; gu ni ka manga ngbatunga gini sunge rogo ho i akpára ni akpara ku sa yo ti gani aboro.

¹⁵I animangi sunge rame ki du sita, ono saba rame nga rago sabiti nga ndikidi rago ongoda, ni kparakpara uru ziazia fu Yekova; gu ni ka amanga ngbatunga gini sunge rago sabiti, i aímo ni aimo ni rengo.

¹⁶Si du awiri aYisaraere aká ti ni kuti pa rago sabiti ka irisa ha dagba arika ngbatungayo dunduko, ni nyenye mokido.

¹⁷Si nga yuguyugupai dagba rani na awiri aYisaraere nye anye kindi, bambiko rogo arame sita Yekova amangi ngbangbaturũ na sende, rogo saba rame ko ki ongodi, ki ba omeko.’ ”

¹⁸Ho ko adigisi gumba pai ni fu Mose ri Bagangara Sinai yo, ko ki fu gu kpasakpasa ambia ue fu ko nga ga dezirepai, boro wirinzaga Mbori nake he.