Read zande Gate 34 Bible Online

Gate 34 - zande bible

Gate 34

¹Yekova ki ya fu Mose, “Mo séke kpasakpasa ambia ue wa gu naadu mbata, mi ki ke agu apai ti gu kpasakpasa ambia re nga gu nadu ti gu bambata kpasakpasa ambia nga gu mo akuadi he.

²Mo ki mbakadi tiro wiso, ki ye wiso ku ri Bagangara Sinai yo, ki yugu tiro fere yore ri bagangara yo.

³Ka boro yé nga na mo kono wa sa ya, ka i ab, nga boro rogo gu rago du ri bagangara no ya; ka arimbasa akandoro na rimbasa anya ríki nga barangba bagangara a ya.”

⁴Mose ki seke kpasakpasa ambia ue wa kina gu naadu mbata; ki guari ngbatutu wiso, ki ndu ku ri Bagangara Sinai yo, a wa Yekova arugu ko na ni, kpasakpasa ambia ki du be ko ue.

⁵Yekova ki zorõ rogo bakamikami dubo, ki ru na ko yore, ki taki pande rimo Yekova.

⁶Yekova ki susi bara bangiri Mose, ki taki pande he ya, “Yekova, Yekova, nga Mbori du adu na nunga aboro na undahe ri ko, du ni bayee ko tipa zinga, ki du na inapai kpaima na rengo,

⁷naka kuti inapai tipa aboro ni dungu akutu yo, navu aboro ti irairapai na ti samungu na ti gapai, nga gu ko ka asara nga ngbanga fu aboro ingapai wa sa ya, nambusa wiri aboro na atitayo tipa gu irairapai nga ga abayo, da kina ho rikayo ka du ni biata na biama.”

⁸Mose ki dua riko ku sende ni ipo, ki irisi Yekova.

⁹Ko ki ya, “Ako Gbia, si ngia mi ngba bangiro awere, mi nazungadi ro, Gbia ídi ka ndu dagba rani, wa vura du yo ni rikaaboro ni airanyakari vurũ; mo ki vu rani ti gaani irairapai na ti gaani ingapai, ki di rani ku gume ni gamo aboro.”

¹⁰Yekova ki ya, “Mo bi, mi namanga mokido. Mi amánga iiriwoapai ku bangiri gamo aboro dũ, nga agu apai i ata manga nga ha auru kpotosende dunduko watadu dagba kura rikaaboro yo a ya; agu aboro dunduko du mo dagba yo yo i nikabi gu mangapai nga ga Yekova; bambiko gu pai mi ka manga ha na oni, si nikadu ni baiiriwo ho.

¹¹“Mo ká kuti gu pai mi aruga ro na n areme. Mo bí, mi nadanda aAmoro bara ngba ro, na aKanano, aEto, aPereso, aIvo, na aYebuso.

¹²Mo bánda tiro, mo ka manga mokido na agu aboro du rogo gu ringara mo andú ku ho ni, si ka du ni gbina dagba roni.

¹³Ono oni akúadi gayo abamotumo, ki kuadi gayo sese duadua ambia, ki dedewe gayo aAsera nga angbama dunduko,

¹⁴bambiko oni aírisa nga kura mbori te, bambiko Yekova du rimoko nga Iraringo, iraringo Mbori nga ko,

¹⁵mo bánda tiro mo ka manga mokido na aboro gu ringara re, i ki ndu ka manga pai ni sino pa bari na gayo ambori, ki nitumo fu gayo ambori, gu boro sa ki yambu roni, oni ki ndu ka ri gani ũmotumo,

¹⁶oni ki rogo awiriyo nga ade fu awironi, awiriyo nga ade ki nindu ka amanga pai ni sino pa bari na gayo ambori, ki nigbe awironi i nindú ka amanga pai ni sino pa bari na gayo ambori.

¹⁷“Ka oni mángi nga ambori tipa roni nga ga zaragasizaragasi marã ya.

¹⁸“Oni niká kuti gu pumbo nga ga gu kpokuta adu nga na agbooro ti ni ya. Oni arí gu kpokuta adu nga na agbooro ti ni ya tipa rame saba, a wa mi arugu ro na ni, oni arí he ti kina gu rago mi aringbisi he rogo gu diwi nga Abiba; bambiko rogo gu diwi nga Abiba oni akuru Ezipeta yo.

¹⁹Bambata avungu dunduko gimi yo du, gbiakuti bambata avungu nga abara dagba gamo zogozogo anya, na awiri abaabagara na awiri akandoro.

²⁰Gu bambata wiri dongi oni atúmo ru na kina wiri kandoro, ono ka oni aída nga ka tumo ru ya, oni ki kiti goru. Bambata awironi nga akumba dunduko oni ka tumo yo. A nga boro sa nikaye ni ku beni ku bara bangire te.

²¹“Tipa rame sita oni ka amanga sunge, ono ti saba rame oni ka aongoda; rago sopa bino na rago dungura aũati oni ki niongodi.

²²Oni ki nika kuti gu pumbo aposo nga ga ke zendeahe, na pumbo dungura aũati ti digida garã.

²³Bara biata rogo garã sa, na garã na agarã gamo akumba ka aye ku bara bangiri Yekova Mbori, gu Mbori nga ga aYisaraere ko.

²⁴Bambiko mi abáfa arikaaboro abafa barangba roni, ki kiisi bangbanda gaoni ringara akiisa; a nga boro sa nikakpi nyemu gaoni ringara te, ho oni ka andu ni ku bara bangiri Yekova gaoni Mbori bara biata na garã na agarã.

²⁵“Ka oni afú nga kure gi motumo wa sa na gu kpokuta du na agbooro ti ni ya; gu motumo nga ga pumbo susiri ka i mbú nga ha ki da ku wiso a ya.

²⁶Bambata makawa agu ahe nikazuka ti gaoni sende, oni ayé na ni ku rogo ga Yekova bambu yo nga gaoni Mbori. Ka oni pási nga wiri meme rogo mamu nai ya.”

²⁷Yekova ki ya fu Mose, “Mo ké agi apai re; bambiko ku sangba agi apai yo re zunga mi he ti ni foro na fu aYisaraere a.”

²⁸Ko ki du yo na Yekova tipa uru 40 na yuru 40 a; ko ari nga riahe nimbiri ime a te. Ko ki ke agu apai nga ga zungahe ti kpasakpasa ambia nga arugute bawe.

²⁹Ho Mose azorõ ni ri Bagangara Sinai yo, na gu kpasakpasa ambia dezirepai ue be ko, ho ko azorõ ni ri bagangara yo, Mose aina nga ha ya kpakpuko du imaima mbiko wa ko afura na Yekova te.

³⁰Ho aArona abi Mose ni na awiri aYisaraere dunduko, oni ngére, kpakpuko ki au adu imaima i ki nigunde agunde ti mbeda na ko.

³¹Ono Mose ki yambu yo; aArona ki karaga tiko na abazogo rimbasa aboro koyo du ko ni. Mose ki gumba pai fu yo.

³²Fuo gure awiri aYisaraere ki ye dunduko ki mbedi, ko ki rugu yo na rugute nga agu apai dunduko nga gu Yekova agumba paha fu ko ri Bagangara Sinai yo.

³³Ho Mose anyasi gumba pai ni fu yo ko ki dadi kpakpuko ni roko dadari;

³⁴ono ho Mose anarima ni ku bara bangiri Yekova ka afura na ko, ko ki nidi roko dadari ku sa yo, daho ko anikuru ni ku zegi yo berewe. Ko ki nikuru ku zegi yo ki nigumba agu apai fu awiri aYisaraere nga gu Yekova arugu ko na ni.

³⁵Awiri aYisaraere ki bi he ya kpakpu Mose du adu imaima; si du Mose aniaadi kpakpuko adada ti ni berewe ni roko dadari, daho ko anirimi ni ku dimoyo ka afura na Yekova.