Read zande Gate 36 Bible Online

Gate 36 - zande bible

Gate 36

¹“ABesarere na Oriaba nikamanga sunge, na agu akumba dunduko du na tatamana, nga agu yo Yekova amoi rugatinapai ku kpotoyo yo na inahe, ka ina waĩ i ka manga gu sunge dunduko nga ga kparakpara ziazia ba, ringbisi he kina kuti gu pa ha dunduko Yekova arugu he.”

²Mose ki yambu aBesarere na Oriaba, na agu akumba dunduko du na tatamana, nga agu yo Yekova amoi tatamana ku kpotoyo yo, nga agu yo dunduko kpotoyo yo awo ti yo i ye sa sunge ka manga ha;

³i ki rogodi gu tumbatumba agamahe re be Mose dunduko nga gu awiri aYisaraere aye na ni tipa gu sunge nga sunge kparakpara ziazia ba, ka manga ha na ni. I ki niye na awiso na kura agamahe fu ko kindi na nyemuhe,

⁴si du aboro tatamana nangia agu yo nanamanga sunge dunduko nga ga kparakpara ziazia ba, i aye ba gayo sunge yo dunduko nga gu i amanga.

⁵I ki ta gumba pai fu Mose, niya, “Aboro naye na bakere ahe ki susi gu rengbe ka manga gu sunge na ni nga gu Yekova arugu pa manga ha.”

⁶Mose ki rũ ndika, i ki taki pande he ku bataya yo dunduko, ki ya. “Ka kumba na de nimángi nga kura sunge ki niye na tumbatumba agamahe berewe tipa kparakpara ziazia ba ya.” Si du i akaraga aboro ti ni ti ye na ahe;

⁷bambiko agu ahe nadu be yo si arengbe na manga sunge dunduko, si ki susi a.

⁸Agu akumba dunduko nadu na tatamana dagba aborosunge yo i ki mangi banye na asiasi aroko ti ni bawe; i amangi he na sunge bangbasiaha na kpia akeruba ti ni rogo tutu ndindii giri nzibi, na gire ni gbaya ha, na gu du ngungungu, na gu du ni zamba ha.

⁹Bagiza gu roko sa adu wa bagiza mbiribe 28, patihe adu wa bagiza mbiribe biama; aroko dunduko adu wa sa.

¹⁰Ko ki zungudi aroko bisue, gu kuti kura ha. Gu kura aroko bisue ko ki zungudi he a, gu kuti kura ha.

¹¹Ko ki mina agire ni gbaya ha ku pavuru gu zungudizungudi aroko sa ti kina pangbaha; ko ki mangi minamina gire a wo ti kina pangba gu zungudizungudi akura aroko re a.

¹²Ko amina agire 50 ti gu roko sa, na 50 ti pangba ue he bazungaha yo, minamina agire ti gu sa ki du wa sa kuti gu minamina agire ni ba sa sa du ti gu kura ha.

¹³Ko ki mangi angorã 50 rogo dahabu, ki kpika aroko na angorã gu kuti kura ha; were banye ki du sa.

¹⁴Ko ki mangi aroko rogo mange ameme ni bamburoko ku ri banye; ko amangi aroko wa 11.

¹⁵Bagiza gu roko re ni ba sa sa adu wa bagiza mbiribe 30, patihe ki du wa bagiza mbiribe biama; agu aroko 11 adu wa sa.

¹⁶Ko ki zungudi aroko bisue wa sa, ki zungudi aroko sita wa sa a.

¹⁷Ko ki mangi minamina agire 50 ti pangba gu roko du pavuru gu zungudizungudi he sa re na minamina agire 50 a ti pangba gu roko du pavuru gu kura zungudizungudi roko re.

¹⁸Ko ki mangi angorã 50 rogo sirigi ka kpika bamburoko na ni si du wa sa.

¹⁹Ko ki mangi roko tipa dada bamburoko ni kpoto abaakandoro nga gu i azamasi he azamasa, na gu ni kpoto wa ga agbodi a Ku ri he.

²⁰Ko ki mangi agbaraga tipa banye rogo gu ngua du wa mbegure, ki rugu he ku ari.

²¹Bagiza agbaraga ni ba sa sa adu wa bagiza mbiribe bawe, patihe ni ba sa sa ki ngia bagiza mbiribe sa na bebere he.

²²Ũzungahe ue adu ti agbaraga dunduko ni ba sa sa, si ki zungu gu gbaraga sa kuti kura ha; wo ko amangi tipa agbaraga banye dunduko.

²³Were ko ki mangi agbaraga: agbaraga 20 tipa gu pavuru banye du ku sudiyo;

²⁴ko ki mangi anduhe 40 rogo feda tii agu agbaraga yo 20 re, anduhe ue tii gu gbaraga yo sa tipa gaha azungahe ue, na anduhe ue tii gu kura ha yo tipa gaha ũzungahe ue.

²⁵Ko ki mangi agbaraga 20 tipa gu ue pavuru banye du ku nodiyo,

²⁶na anduhe 40 rogo feda, anduhe ue tii gu gbaraga yo sa, na anduhe ue tii gu kura gbaraga yo sa.

²⁷Ko ki mangi agbaraga sita tipa gu gii banye du ku dioyo.

²⁸Ko amangi agbaraga ue tipa atukpu banye ku gii he yo.

²⁹Si ki du ni zungudizungudi he in mburuhe yo, na ti rihe yo da ti bambata benge; wo ko amangi he re tipa atukpuhe ue.

³⁰Agbaraga ki du muambi, na anduhe 16 ni feda; anduhe ue tii agbaraga yo dunduko ni ba sa sa.

³¹Ko ki mangi angbongbo rogo gu ngua du wa mbegure, bisue tipa agu agbaingii du pavuru banye ku bani,

³²na angbongbo bisue tipa agu agbaraga du pavuru banye ku bani a, na angbongbo bisue tipa agu agbaraga du gii banye ku dioyo.

³³Gu ngbongbo du bebere he yo ko amangi he si susi bebere rago tona ti mburuhe yo ki da ti digidaha yo.

³⁴Ko ki dadi agbaraga ni dahabu, ki mangi abengehe rogo dahaou tipa ba angbongbo, ki dadi angbongbo ni dahabu.

³⁵Ko ki mangi róko kparaba rogo gire ni gbaya ha, na gu du ngungungu, na gu du ni zamba ha, na tutu ndindii giri nzibi; ko amangi he na kpia akeruba ti ni, ni sunge bangbasiaha.

³⁶Ko amangi adangbaha biama rogo gu ngua du wa mbegure, ki dadi he ni dahabu; angorãha adu ni dahabu, ko ki taki feda ka manga anduhe biama tipa ha.

³⁷Ko ki mangi asiasi roko kparaba tipa ngbadimo bamburoko rogo gire ni gbaya ha, na gu du ngungungu, na gu du ni zamba ha, na tutu ndindii giri nzibi ni sunge kendegekendege he;

³⁸na adangbaha bisue na angorãha. Ko ki dadi ri adangbaha na angbongboho ni dahabu; ono anduhe bisue adu ni sirigi.