Read zande Gate 37 Bible Online

Gate 37 - zande bible

Gate 37

¹Were Besarere ki mangi sanduki rogo gu ngua du wa mbegure; bagizaha adu wa bagiza mbiribe ue na bebere he, patihe ki du wa bagiza mbiribe sa na bebere he, basonaha ki du wa bagiza mbiribe sa na beberehe.

²Ko ki dadi he ni ndikidi dahabu vuruhe yo, na ti kpotoho a, ki mangi gu he pati he kirikiri rogo dahabu du wa kina kpakpari.

³Ko ki taki abenge biama tipa ha rogo dahabu, ami adu ti anduhe biama, abenge ue adu ku pavuruhe ku bani, na abenge ue ku bani a.

⁴Ko ki mangi angbongbo rogo gu ngua du wa mbegure, ki dadi he ni dahabu,

⁵ko ki moi agu angbongbo re ku rogo abenge yo ti apavuru sanduki ka tinda ha ii ni.

⁶Ko ki mangi bainapai rogo ndikidi dahabu; bagizaha adu wa bagiza mbiribe ue na bebere he, patihe adu wa bagiza mbiribe sa na bebere he.

⁷Ko ki mangi kpia akeruba ue rogo tata dahabu. Ko amangi he auru bainapai ku bani na ku bani,

⁸gu keruba sa ku bani na gu kura keruba sa ku bani a; ko amangi akeruba rogo bete gu dahabu sa na bainapai ti amburuhe ue.

⁹Akeruba ki zaraga apupoho ku ari, ki dadi bainapai na apupoho, kpakpu gu sa ki du sa ga gu kura ha; kpakpu akeruba ki du koyo du bainapai ni.

¹⁰Ko Ki mangi mbisa rogo gu ngua du wa mbegure; bagizaha adu wa bagiza mbiribe ue, patihe ki du wa bagiza mbiribe sa, basonaha ki du wa bagiza mbiribe sa na bebere he;

¹¹ko ki dadi he ni ndikidi dahabu, ki mangi dahabu wa kina kpakpari ku pavuru rihe kirikiri.

¹²Ko ki mangi bangbandaha kirikiri, patihe ki du wa pabe boro, ko ki mangi dahabu wa kina kpakpari pavuruhe kirikiri.

¹³Ko ki taki abenge biama rogo dahabu tipa ha, ki moi ra ti atukpuhe biama nga gu du ti anduhe biama.

¹⁴Abenge ki du mbembedi na bangbandaha tipa angbongboho, nga gu i atinda mbisa ti ni.

¹⁵Ko ki mangi angbongbo rogo gu ngua du wa mbegure, ki dadi he ni dahabu, i nitindi mbisa ti ni.

¹⁶Ko ki mangi agu aũsunge ka du auru mbisa ni ndikidi dahabu, nga gaha akurungbu, na gaha abaarikare, na gaha ainga, na gaha akambu, tipa uka ahe na ni.

¹⁷Ko Ki mangi baduawe rogo ndikidi dahabu. Ko amangi mburuhe, na katakpaha rogo tata dahabu, gaha ainga, agorõho, na gaha ambumbuda adu na ni wa sa.

¹⁸Abehe ki du sita nakuru pavuruhe yo, abe gu baduawe re ki kuru biata ku bani, gu kura abehe biata ki kuru ku bani a;

¹⁹ko amangi ainga biata wa ambumbuda anzari ti gu behe sa, gorõho sa na mbumbudaha a sa; na ainga biata ni mangimangi he wa kina ambumbuda anzari ti gu kura behe, gorõho sa, na mbumbudaha a sa ― wo ko amangi tipa agu abehe sita nakuru ti katakpa baduawe.

²⁰Ti katakpaha ko amangi ainga biama wa kina ambumbuda anzari, agorõho na ambumbudaha a,

²¹gu gorõho sa tii abehe yo ue, ni mangimangi he wa sa na ni, gorõho sa tii gu abehe yo ue, ni mangimangi he wa sa na ni, tipa agu abehe sita nakuru ti ni.

²²Agorõho na abehe ko amangi he rogo gu bete dahabu sa; wa si adu dunduko i ataki he rogo gu bete ndikidi dahabu sa.

²³Ko ki mangi awehe saba, na gaha awaza, na gaha asaani kingiriwe rogo ndikidi dahabu.

²⁴Ko ki mangi he na aũhe dunduko rogo taranda sa nga ga ndikidi baroãha wa akiro 59.

²⁵Ko ki mangi bamotumo nga ga fuõngua rogo gu ngua du wa mbegure; bagizaha adu wa bagiza mbiribe sa, patihe ki du wa bagiza mbiribe sa; bagiza pavuruhe biama adu wa sa, basonaha adu wa bagiza mbiribe ue, agbangaha ki du na ni wa sa.

²⁶Ko ki dadi kpotoho ni ndikidi dahabu, rihe, na pavuruhe kirikiri, na agbangaha a; ko ki mangi he kirikiri rogo dahabu a wa kpakpari,

²⁷ko ki mangi abenge ni dahabu ue tii kpakpari yo, ku bani na ku bani, ami adu tipa angbongbo ue ka atinda ha ti ni.

²⁸Ko ki mangi angbongbo rogo gu ngua du wa mbegure, ki dadi he ni dahabu.

²⁹Ko ki mangi kparakpara ziazia nzeme tipa mbeda ha, na ziazia fuõngua ni wene fuõ tomengua, a wa bangbasia gu sunge re naamanga ha.