Read zande Gate 39 Bible Online

Gate 39 - zande bible

Gate 39

¹I amangi wene tutu aroko rogo gire ni gbaya ha, na gu du ngungungu, na gu du ni zamba ha, tipa manga apai rogo kparakpara ziazia ba; ki mangi kparakpara ziazia aroko tipa Arona; a wa Yekova arugu Mose na ni.

²Ko ki mangi efoda ni dahabu, na gire du ni gbaya ha, na gu du ngungungu, na gu du ni zamba ha, na tutu ndindii giri nzibi.

³I ki taki dahabu nzaranzara ki kafu he ku rogo agirihe, ka tu he na gu gire du ni gbaya ha, na gu du ngungungu, na gu du ni zamba ha na ndindii giri nzibi ni sunge bangbasiaha.

⁴I amangi agire tipa pagorõ efoda ni kpamiakpamia ha kuti angbaha ue.

⁵Na gu gire i atu he ni tatamana, nadu ti ni tipa vo ho na ni si adu wa sa na ni, ni mangimangi he wa kina ha, rogo dahabu, na gire ni gbaya ha, na gu du ngungungu, na gu du ni zamba ha, na tutu ndindii giri nzibi; a wa Yekova arugu Mose na ni.

⁶I ki mbakadi agu ambia nga oniki, si adu rogo ũzadahe yo ni dahabu, ki du na gbakigbaki he ti ni, i nigbaki wa marãido, na rimo awiri aYisaraere ti ni.

⁷Ko ki moi he ku auru gu gire du pagorõ efoda, si du ni ambia tingidapai fu awiri aYisaraere; a wa Yekova arugu Mose na ni.

⁸Ko ki mangi mangu ngbaduse ni sunge bangbasiaha, wa kina ga efoda, ni dahabu, na gire ni gbaya ha, na gu du ngungungu, na gu du ni zamba ha, na tutu ndindii giri nzibi.

⁹Si adu na bagiza pavuruhe biama wa sa; i amangi mangu ngbaduse ni minamina ha ue, bagizaha adu wa bazaraga awirinzaga bara sa, patihe adu wa bazaraga awirinzaga a bara sa, ho si adu ni ni minamina ha ue.

¹⁰I ki moi wene ambia ku auru he ti agenehe biama. Ti bambata genehe sadio nadu na topazo, na bareketa;

¹¹ti ue genehe zumeradi ki du na safero, na yaroma;

¹²ti biata genehe yakino ki du na sebu, na amesute;

¹³ti biama genehe berure ki du, na oniki, na yasipi; i amoi he ku rogo ũzadahe ni ba sa sa ni dahabu.

¹⁴Agu ambia re adu 12 ni ringbisiringbisi he kuti rimo awiri aYisaraere; si adu wa marãido, i agbaki rimo ngbatunga ti ni ni ba sa sa wa du he 12.

¹⁵I ki mangi azogbo tipa mangu ngbaduse wa udiudi gire nga ndikidi dahabu;

¹⁶i ki mangi ũzadahe ue rogo dahabu, na abenge dahabu ue, ki moi agu abenge ue re ti pangba mangu ngbaduse ue;

¹⁷i ki moi gu udiudi giri azogbo dahabu ue re ti agu abenge ue nadu ti pangba mangu ngbaduse.

¹⁸I ki moi mburu gu udiudi azogbo ue re kuti agu aũzadahe ue re; ki tapa ha kuti agu agire du pagorõ efoda, ku barangba ha.

¹⁹I ki mangi abenge ue rogo dahabu, ki moi he ti amburu mangu ngbaduse ue, ti kina pangbaha nga gu nadu mbembedi na pavuru efoda ku vuru he yo.

²⁰I ki mangi abenge rogo dahabu ue, ki moi he ti agire pagorõ efoda tii he yo, ku barangba ha, mbembedi na ku bazungaha yo, ku ri tutu giri efoda nga gu i atu he ni tatamana.

²¹I ki vo mangu ngbaduse na abengehe kuti abenge efoda ni gire du ni gbaya ha si du auru giri efoda nga gu i atu he ni tatamana, ya ka mangu ngbaduse aguari nga ti efoda ya; a wa Yekova arugu Mose na ni.

²²Ko ki mangi gbanga roko efoda ni tutu gire ni gbaya ha;

²³yaro gu roko re ku bebere he yo adu wa kina yaro rogo rokovura, ngba yaroho adu ni rungurungu he ya ka si síri nga ya.

²⁴I ki mangi kpia zuzuhe wa andavu ti ngba gbanga roko na gire ni gbaya ha, na gu du ngungungu, na gu du ni zamba ha, na ndindii giri nzibi.

²⁵I ki mangi anzorõ rogo ndikidi dahabu, ki moi he dagba andavu ti ngba gu gbanga roko re ku sende kirikiri, dagba andavu;

²⁶nzorõ sa na dagba na ndavu a sa, nzorõ sa na dagba na ndavu a sa, ti ngba gu gbanga roko re ku sende kirikiri ka amanga pai rogo ho; a wa Yekova arugu Mose na ni.

²⁷I ki mangi aroko kuari a ni ndindii giri nzibi ni tutu he tipa aArona na awiriko,

²⁸na kaĩkaĩ rokori ni ndindii giri nzibi, na akutuku ni ndindii giri nzibi, na aroko sorondu ni tutu ndindii giri nzibi,

²⁹na giri dimose ni tutu ndindii giri nzibi, na gire ni gbaya ha, na gu du ngungungu, na gu du ni zamba ha, ni gu sunge nga ga bangbasia kendega ahe; a wa Yekova arugu Mose na ni.

³⁰I ki mangi kpasakpasa saani rogo ndikidi dahabu, tipa kparakpara ziazia kpakpari, ki gbaki pai ti ri he wa i nigbaki marãido, nga “KPARAKPARA HE ZIAZIA FU YEKOVA.”

³¹I ki kpira gire ni gbaya ha kuti ni ka vo ho kuti kaĩkaĩ rokori ba ri he, a wa Yekova arugu Mose na ni.

³²Were i anyasi sunge banye nga ga bamburoko dungurati; awiri aYisaraere ki mangi he wa Yekova arugu Mose na ni dunduko; kina wo i amangi he.

³³I ki ndu na banye koyo du Mose ni, gu bamburoko re, na aũhe dunduko, angorãha, agbaragaha, angbongboho, adangbaha, na anduhe;

³⁴kpoto dadahe nangia kpoto abaakandoro nga gu i azamasi he azamasa, na gu ũdadahe nangia kpoto wa ga agbodi, na roko kparaba;

³⁵sanduki dezirepai, na angbongboho, na bainapai;

³⁶mbisa na aũhe dunduko, na kpokuta yugopai;

³⁷baduawe ni ndikidi dahabu, na agu awe du kina rogo gu baha, na aũhe dunduko, na nzeme tipa we;

³⁸gu bamotumo dahabu, na nzeme mbeda, na wene fuõngua, na asiasi roko kparaba tipa ngbadimo bamburoko,

³⁹gu bamotumo sirigi na gaha piosirigi, angbongboho, na aũhe dunduko; kurungbu zundatise na andu mburuhe;

⁴⁰asiasi aroko vurukporo, adangbaha, na anduhe, na asiasi roko kparaba tipa ngbadimo vurukporo, agirihe, na anerihe; na aũmanga sunge dunduko nangia ga banye, tipa bamburoko dungurati;

⁴¹gu wene tutu aroko tipa mangapai rogo kparakpara ziazia ba, na kparakpara ziazia aroko tipa Arona nangia boromotumo, na agu aroko nangia ga awiriko, ka amanga apai rogo pa ga aboromotumo sunge.

⁴²A wa Yekova arugu Mose na ni dunduko, kina wo awiri aYisaraere amangi gu sunge re dunduko.

⁴³Mose ki bi gu sunge re dunduko, mo ngére, i aima manga ha; a wa Yekova arugu paha, kina wo i amangi he. Were, Mose ki fu maku fu yo.