Read zande Gate 40 Bible Online

Gate 40 - zande bible

Gate 40

¹Yekova ki ya fu Mose,

²“Ti gu bambata uru nga ga bambata diwi, mo adúa banye ku ari nga ga bamburoko dungurati.

³Mo ki moi sanduki dezirepai ku vuru he yo, ki kpara sanduki ni roko kparahe.

⁴Mo ki ndu na mbisa ku dimo yo, ki moi agu ahe ku baha nikadu ku auru he; mo ki ndu na baduawe, ki tigi gaha awe.

⁵Mo ki moi gu bamotumo dahabu du tipa fuõngua barangba sanduki dezirepai, ki moi asiasi roko kparaba ti ngbadimo banye ku baha.

⁶Mo ki moi gu bamotumo nga ga zozo motumo barangba ngbadimo banye nga ga bamburoko dungurati,

⁷mo ki moi kurungbu zundatise dagba bamburoko dungurati na bamotumo, ki uka ime ku rogo ho.

⁸Mo ki dua agbaraga kirikiri pati vurukporo banye, ki asi gu asiasi roko kparaba tipa ngbadimo vurukporo.

⁹Mo ki di gu nzeme mbeda, ki mbedi banye, na agu ahe du vuru he yo dunduko, ki kpara ha, na aũhe dunduko; si ki du ni kparakpara ha ziazia.

¹⁰Mo ki mbedi bamotumo nga ga zozo motumo, na aũhe dunduko, ki kpara bamotumo; bamotumo ki du ni kparakpara ha ziazia ki susi.

¹¹Mo ki mbedi kurungbu zundatise na ndu mouruhe, ki kpara ha a.

¹²Mo ki ndu na aArona na awiriko ku ngbadimo bamburoko dungurati yo, ki zundu yo ni ime,

¹³mo ki ukadi Arona ni kparakpara ziazia aroko, mo ki mbedi ko ni nzeme, ki kpara ko, ya ko nimangi pare rogo pa ga boromotumo sunge.

¹⁴Mo ki ye na awiriko, ki ukadi yo ni aroko kuari

¹⁵ki mbedi yo a wa mo ambedi bayo, ya i nimangi pare rogo pa ga aboromotumo sunge: pa mbeda yo ki du fu yo tipa du yo ni aboromotumo nye anye kindi dagba arika ngbatungayo dunduko.”

¹⁶Kina wo Mose amangi he; ko amangi he kuti agu apai dunduko Yekova arugu ko na ni.

¹⁷Ti bambata diwi rogo ue garã, ti gu bambata uru nga ga diwi, i ki dua banye ku ari.

¹⁸Mose ki dua banye ku ari; ki moi anduhe ku rogo abaha, ki dua agbaragaha ku ari, ki rimisi angbongboho, ki dua adangbaha ku ari.

¹⁹Ko ki gbaragi bamburoko ku ri banye, ki moi ũdadahe tipa bamburoko ku ari, auru he, a wa Yekova arugu Mose na ni.

²⁰Ko ki di dezirepai ki moi he ku rogo sanduki, ki moi angbongbo ti sanduki, ki moi bainapai ku ari ku ri sanduki.

²¹Ko ki ndu na sanduki ku vuru banye yo, ki asi roko kparaba, ki kpara sanduki dezirepai; wa Yekova arugu Mose na ni.

²²Ko ki moi mbisa ku rogo bamburoko dungurati yo, pavuru banye ku nodiyo, pati roko kparaba ku zegi yo,

²³ko ki moi kpokuta ku auru he nzunzu ku bangiri Yekova; a wa Yekova arugu Mose na ni.

²⁴Ko ki moi baduawe vuru bamburoko dungurati yo, pati mbisa ku bani, pavuru banye ku sudiyo;

²⁵ko ki tigi awe ku bangiri Yekova, a wa Yekova arugu Mose na ni.

²⁶Ko ki moi bamotumo dahabu vuru bamburoko dungurati yo barangba roko kparaba,

²⁷ki zo wene fuõngua auru he; a wa Yekova arugu Mose na ni.

²⁸Ko ki asi roko kparaba ku baha ti ngbadimo banye.

²⁹Ko ki moi bamotumo zozo motumo pati ngbadimo banye bamburoko dungurati, ki tumo auru he ni zozo motumo, na motumo riahe a; a wa Yekova arugu Mose na ni.

³⁰Ko ki moi kurungbu zundatise dagba bamburoko dungurati na bamotumo, ki uka ime ku rogo yo, tipa mbeda ha,

³¹aMose na Arona na awiriko ki zundu abeyo na anduyo yo;

³²i ki nizundu tiyo ho i anindu ni ku vuru bamburoko dungurati yo, na ho i animbedi ni na bamotumo, wa Yekova arugu Mose na ni.

³³Ko ki dua gbaraga vurukporo ku ari kirikiri pati banye na pati bamotumo, ki asi asiasi aroko kparaba ti ngbadimo vurukporo. Were Mose anyasi gu sunge re.

³⁴Fuo gure, bakamikami dubo ki dadi ri bamburoko dungurati, ga Yekova taarimo ki hisi banye.

³⁵Ka Mose arengba nga na rima ku tii bamburoko dungurati yo ya, bambiko bakamikami dubo anye ri he, ga Yekova taarimo ki hisi banye.

³⁶Hoianidi bakamikami dubo ni ku ari ri banye, awiri aYisaraere ki nisusi ku mbata yo, ti rago gayo anunguro dunduko;

³⁷ono ka i adia nga bakamikami dubo ku ari yo ya, si du ka i andu nga a ya, dati kina gu uru di yo ho ri he yo ku ari.

³⁸Bambiko ga Yekova bakamikami dubo anidu ri banye uru, we ki du rogo ho yo na yuru, ku bangiri ngbatunga aYisaraere dunduko, rago gayo anunguro dunduko.