Read zande Gate 5 Bible Online

Gate 5 - zande bible

Gate 5

¹Fuo gure aMose ki ndu na Arona, ki ya fu Faro, “Ya Yekova nga ga aYisaraere Mbori wẽ, ‘Mo ídi he fu gimi aboro i ndu ka manga pumbo tipa re ngbakungba yo.’ ”

²Ono Faro ki ya, “Da nga Yekova, ka mi gi sangbako ki idi fu aYisaraere i ndu? Mi aina nga Yekova te, mi aída nga aYisaraere ndu a te.”

³I ki ya, “Ga aEbere Mbori angbisi rani; ani nazungadi ro, mo ídi he fu rani ani ndú, ki ra ku gene biata ku ngbakungba yo, ani ki tumo fu Yekova nga gaani Mbori, tata kaza ka ti ku ri rani be ko watadu kpio basape.”

⁴Ono bakindo aEzipeto ki ya fu yo, “Mose na Arona, tipagine rogo oni aboro ti ni ti ngba gayo sunge? Oni ndú sa gaoni asunge mbugo.”

⁵Faro ki ya, “Oni ngére, badungu aboro rogo gi ringara re awere, oni ki sa yo i ongodi be gayo asunge mbugo!”

⁶Ni kina gu rago re Faro ki ta ruga abanyakasi pa sunge, na gayo abarumbatayo niya,

⁷“Oni afú nga kazimorũ fu aboro tipa meka abiriki na ni wa mbata te; i ndú ka dungura kazimorũ ni tiyo.

⁸Ono agu abiriki i agedi he fu yo nga gu i anamanga mbata, kina wo i ka manga ha kindi, oni aúmbasi nga ha ti gu naadu mbata te; airanyomoro nga yo; si i akpara ti ni, ki ya, ‘Mo ídi he ani ndu ka tumo fu gaani Mbori.’

⁹Oni fú bakere sunge fu yo susi gu naadu mbata, i nimbú ambu be he. Ka oni gí nga gu zire re ya.”

¹⁰Abanyakasi pa sunge ki kuru na ga aboro abarumbatayo, ki ya fu aboro, “Faro niya wẽ, ‘Mi afú nga kazimoru fu roni te.

¹¹Oni ndú ni tironi ka gbata kazimoru ho ka oni bi he ni; ono pai sa i aúmbasi nga bete gaoni sunge wa gu sa te.’ ”

¹²Si du aboro agbandaka agbandaka ti ni ku ringara Ezipeta yo dunduko ka dungura kakarika ku ba kazimorũ.

¹³Abanyakasi pa sunge ki fudi yo niya, “Oni nyási pa gaoni sunge, kina gu i aringbisi na uru oni mángi kina ha, a wa si adu ho kazimoru adu ni beroni.”

¹⁴I ki nitaki ga awiri aYisaraere abarumbatayo, nga agu yo ga Faro abanyakasi pa sunge amoi yo ri yo, ki sana yo a ki ya, “Tipagine oni anyakasa nga pa gaoni sunge biriki ti ni, gba na areme, wa oni amangi he mbata ya?”

¹⁵Ga awiri aYisaraere abarumbatayo ki ye, ki kpari fu Faro, niya, “Tipagine mangi mo gamo amoyambu ti ni were?

¹⁶I afu nga kazimorũ fu gamo amoyambu te, ono i ki ya fu rani, ‘Oni mángi abiriki!’ Mo ngére, i nataka gamo amoyambu; ono ga avururo ingapai du.”

¹⁷Ono ko ki ya, “Oni nga airanyomoro, oni nga airanyomoro; si du ya oni ti ni, ‘Ani ndú ka tumo fu Yekova.’

¹⁸Oni ndú sa sunge ke; i afú nga kazimorũ fu roni te, ono oni ayé na kina abiriki a wa i agedi he.”

¹⁹Ga awiri aYisaraere abarumbatayo ki bi he, ya pai aima gberã fu yo, ho i aya ni fu yo, “Ka oni aúmbasi nga pa gu gaoni abiriki wa sa ya, nga gu oni namanga na uru.”

²⁰I ki gbia aMose na Arona i ru ngba gu gene i ayega ti ni yo du Faro ni;

²¹i ki ya fu yo, “Yekova bí gaoni pai ki sapu he. Bambiko oni gbarasi rimorani bangiri aFaro na gako amoyambu, ki moi basape ku be yo i imi rani na ni.”

²²Mose ki karaga tiko koyo du Yekova ni berewe, ki ya, “Ako Yekova, tipagine mangi mo gbigbitapai ti ni fu agi aboro re? Tipagine mo akeda re ti ni tie?

²³Fuo ye mi ka gumba pai fu Faro ni rimoro, ko ki mangi gbigbitapai fu agi aboro re, ono mo abatasa nga yo wa sa te.”