Read zande Gate 6 Bible Online

Gate 6 - zande bible

Gate 6

¹Yekova ki ya fu Mose, “Awere mo nikabi gu pai mi ayé ka manga fu Faro. Ko nikaida ha fu yo i ndú mbiko nyanyaki bere, ko adánda yo rogo gako ringara mbiko nyanyaki bere.”

²Mbori ki ya fu Mose, “Mi nga Yekova.

³Mi nayugu tire fu aAbarayama, na fu Yisaka, na fu Yakoba, wa Mbori du na tandu apai du, ono i aina nga re ti gu rimore nga Yekova te.

⁴Mi amangi gi zungahe na yo a ka fu ringara Kanana fu yo, nga gu ringara i araki rogo ho wa nungunungu aboro.

⁵Ku ri gere, mi gi uko awiri aYisaraere, nga agu yo zi aEzipeto yo ni akanga. Mi ki tingidi pa gi zungahe.

⁶Si du mo yá fu awiri aYisaraere, ‘Mi nga Yekova, mi akúsa roni be agu asunge mbugo nga ga aEzipeto, ki batasi roni be du ni gayo akanga. Mi ki tumo roni ni taĩtaĩ bere, na bakere ambusa.

⁷Mi adía roni ku gume ni gimi aboro, mi ki du ni gaoni Mbori; oni ki ini he ya mi nga Yekova nga gaoni Mbori, nakusa roni be agu asunge mbugo nga ga aEzipeto.

⁸Mi ayé na oni ku rogo gu ringara nga gu mi azunga he tipa ha ka fu he fu aAbarayama na fu Yisaka, na fu Yakoba; mi afú he fu roni ni gaoni ringara. Mi nga Yekova.’ ”

⁹Mose ki gumba ha wo fu awiri aYisaraere; ono i adega nga tuyo sa sangba Mose te mbiko imisin ngbaduyo, na mbiko kere asunge mbugo.

¹⁰Yekova ki ya fu Mose,

¹¹“Mo rími ki ya fu Faro nga bakindo aEzipeto, ko ídi fu awiri aYisaraere i gúari rogo gako ringara.”

¹²Ono Mose ki gumba pai bara bangiri Yekova, ki ya, “Mo ngére, awiri aYisaraere adega nga tuyo sa sangbare te; waĩ ka Faro dege tuko sa sangbare tie, wa aru nga ngbare yo ya?”

¹³Ono Yekova ki gumba pai fu aMose na Arona ki asia pai fu yo tipa awiri aYisaraere, na fu Faro bakindo aEzipeto, ya i kúsi awiri aYisaraere ringara Ezipeta yo.

¹⁴Agi yo re nangia abarumbatayo fu ga abayo aborokporo: awiri Rubena nangia bambata wiri Yisaraere: nangia Anoka, Paru, Eserone na Karumi; agi yo re nangia agu arika nga ga Rubena.

¹⁵Awiri Simona ki ngia Yemuere, Yamina, Oada, Yakima, Soara, na Saura, ko nangia wiri de Kanano; agi yo re nangia agu arika nga ga Simona.

¹⁶Gere nga rimo awiri Revi wa du pa arika ngbatungayo: Gerusona, Koata, na Merari. Revi araki tipa garã 137.

¹⁷Awiri Gerusona ki ngia Ribini, na Sima, wa du pa arikayo.

¹⁸Awiri Koata ki ngia Amurama, Yisara, Eburone na Uziere. Koata araki tipa garã 133.

¹⁹Awiri Merari ki ngia Mari na Musi. Agi yo re nangia agu arika nga ga aRevi wa du pa arika ngbatungayo.

²⁰Amurama ki di Yokebede nangia dawiri bako ni diako. Ri ki batika aArona na Mose fu ko. Amurama araki tipa garã 137.

²¹Awiri Yisara ki ngia Kora, Nefege na Zikiri.

²²Awiri Uziere ki ngia Misaere, Erisafana na Siteri.

²³Arona ki di Eriseba wiri Aminadaba ni diako, nangia dawiri Nasona. Ri ki batika Nadaba fu ko, na Abiu, Erazara na Itamara.

²⁴Awiri Kora ki ngia Asiri, Erekana na Abiasapa; agi yo re nangia agu arika nga ga aKora.

²⁵Erazara nangia wiri Arona ki di de ni diako dagba awiri Putiere; ri ki batika Fmasa fu ko. Agi yo re nangia abarumbatayo fu ga bayo aborokporo nangia aRevi wa du pa arikayo.

²⁶Agi yo re nangia agu aArona na Mose Yekova aya fu yo: “Oni kúsi awiri aYisaraere rogo gu ringara nga Ezipeta, ringbisi he na kina gayo arimbasa aborovura.”

²⁷I nangia agu yo nagumba pai fu Faro oakindo aEzipeto, ka kusa awiri aYisaraere Ezipeta yo, nangia agu aMose na Arona re.

²⁸Fuo gere, ti gu uru Yekova agumba pai fu Mose ringara Ezipeta yo,

²⁹Yekova ki ya fu Mose, “Mi nga Yekova; mo gúmba agi apai re dunduko fu Faro bakindo aEzipeto wa gumba mi he foro.”

³⁰Mose ki gumba pai bara bangiri Yekova, “Mo ngére, ru nga ngbare yo te; Faro awíra pa dega tuko sa sangbare waĩ?”